[6-text p 338]
Thanne were they maad / vp-on a creature
To purge vryne / and eek for engendrure
¶ But I seye noght þat euery wight is holde
That hath swich harneys / as I to yow tolde
Line 136
To goon / and vsen hem in engendrure
Thanne sholde men take / of Chastitee no cure
Crist was a mayde / and shapen as a man
And many a Seynt sith that the world bigan
Line 140
yet lyued they euere / in parfit Chastitee
I nyl envie / no virgynytee
Lat hem be breed / of pured whete seed
And lat us wyues / hote Barlybreed
Line 144
And yet with Barlybreed / Mark telle kan
Oure lord Ihesu / refresshed many a man
In swich estat as god hath clepyd vs
I wol perseuere / I nam nat precius
Line 148
In wifhode / wol I vse myn Instrument
As frely / as my makere hath it sent
If I be daungerous / god yeue me sorwe
Myn housbonde / shal it han / bothe eue and morwe
Line 152
Whan that hym list com forth and paye his dette
And housbonde / wol I haue / I wol nat lette
Which shal be / bothe / my dettour and my thral
And haue / his tribulacion / with-al
Line 156
Vp-on his flessh / whil that I am his wyf [folio 60a]
I haue the power / duryng al my lyf
Vp-on his propre body / and nat he
Right thus / thapostle / tolde it vn-to me
Line 160
And bad oure housbondes / for to loue vs wel
Al this sentence / me liketh euery del
Vp stirte the Pardoner / and that anon
Now dame quod he / by god and by Seint Iohn
Line 164
Ye been a noble Prechour / in this cas
I was aboute / to wedde a wyf allas
What sholde I bye it / on my flessh so deere
Yet hadde I leuere / wedde no wyf to yeere
Line 168
