[1081]
NOw preye I to hem alle that herkne this litel tretys or rede that if ther be any thyng/ in it that liketh hem / that ther-of they thanken oure lord Ihesu crist. of whom procedeth al wit and al goodnesse. [1082] And if ther be any thyng that displese hem. I preye hem also that they arrette it to the defaute of myn vnkonnynge and nat to my wyl. that wolde ful fayn haue seyd bettre / if I hadde had konnynge. [1083] ffor oure boke seith / al that is writen / is writen for oure doctrine. and that is myn entente [1084] ¶ Wherfore / I biseke yow mekely for the mercy of god / that ye preye for me / that crist haue mercy on me and foryeue me my giltes. ‖ [1085] and namely of my translacions and endit|ynges of worldly vanitees / the whiche I reuoke in my re|traccions [1086] ¶ As is the book of Troilus ¶ The book also of ffame ‖ The book of the .xxv. Ladies ¶ The book of the Duchesse ¶ The book of seint Valentynes day of the parlement of briddes ‖. The tales of Caunter|bury / thilke that sownen in to synne [1087] ¶ The book of the Leon And many another book/ if they were in my remembrance / and many a song and many a leccherous lay. that crist for his grete mercy foryeue me the synne [1088] ¶ But of the translacion of Boece de consolacione / and othere bookes of Legendes of seintes / and Omelies / and moralitee / and deuocion / [1089] that thanke I oure lord Ihesu crist and his blisful mooder / and alle the seintes of heuene / [1090] bisekynge hem / þat they from hennes forth vn-to my lyues ende / sende me grace to biwayle my giltes / and to studie to the saluacion of my soule / and graunte me grace of verray penitence / con|fession
