[6-text p 671] for to accomplice thilke brennynge delit / they rekke neuere how ofte. soothly it is deedly synne. and yet with sorwe somme folk wol peynen hem moore to doon / than to hire appetit suffiseth
[944] The seconde manere of chastitee / is for to been [¶ Of chastitee in wydwehede] a clene wydewe and eschue the embracynges of man and desiren the embracynge of Ihesu crist. [945] thise been tho þat han been wyues and han forgoon hire hous|bondes. and eek wommen þat han doon leccherie and been releeued by Penitence [946] ¶ And certes. if þat a wyf koude kepen hire al chaast by licence of hir housbonde so þat she yeue neuere noon occasion þat he agilte. it were to hire a greet merite [947] ¶ Thise manere wommen þat obseruen chastitee . . . . . [no gap in the MS.] in clothynge and in contenance / & been abstinent in etynge. and drynkynge. in spekynge / and in dede. they been the vessel / or the boyste of the blissed Magdelene / þat fulfilleth hooly chirche of good odour [948] The thridde [¶ Of chastitee in virginitee] manere of chastitee is virginitee. and it bihoueth þat she be hooly in herte and clene of body / thanne is she spouse to Ihesu crist and she is the lyf of Angeles. [949] she is the preisynge of this world. and she is as thise martirs in egalitee. she hath in hire. that tonge may nat telle ne herte thynke ‖. [950] Virginitee baar oure lord Ihesu crist and virgine was hym selue
[951] Another remedie agayns leccherie. is specially / [¶ Of another remedie agayns leccherye] to withdrawen swiche thynges / as yeue occasion to thilke vileynye. as ese. etynge and drynkynge / for certes / whan the pot boyleth strongly /. the beste remedie is to with|drawe the fyr [952] ¶ Slepynge. longe in greet quiete. is eek a greet norice to leccherie
[953] ¶ Another remedie agayns leccherie. is / þat a [¶ Another remedie agayns leccherie] man or a womman eschue the compaignye of hem by whiche he douteth to be tempted. for al be it so þat the dede is withstonden. yet is ther greet temptacion ‖.
