[6-text p 420]
¶ Madame he seyde / ye moote foryeue it me
Line 526
Though I do thyng to which I am constreyned
Ye been so wys / that ful wel knowe ye
That lordes heestes / mowe nat been yfeyned
Line 529
They mowe wel been / biwailled and compleyned
But men moote nede / vn-to hire lust obeye
And so wol I / ther is namoore to seye
Line 532
This child / I am comanded for to take [folio 98a]
Line 533
And spak namoore / but out the child he hente
Despitously / and gan a cheere make
As though he wolde / han slayn it er he wente
Line 536
Grisildis / moot al suffren and consente
And as a lamb / she sitteth meke and stille
And leet this crueel sergeant doon his wille
Line 539
¶ Suspecious / was the diffame of this man [¶ suspecta viri fama]
Suspect his face / suspect his word also [¶ suspecta facie] [¶ suspecta hora]
Suspect the tyme / in which he this bigan [¶ suspecta erat oratio]
Allas hir doghter/ that she loued so
Line 543
She wende / he wolde han slawen it right tho
But nathelees / she neither weepe ne syked
Consentynge hire / to that the Markys lyked
Line 546
But atte laste / to speken she bigan
Line 547
And mekely / she to the sergeant preyde
So as he was / a worthy gentil man
That she moste kisse hire child / er þat it deyde
Line 550
And in hir barm / this litel child she leyde
With ful sad face / and gan the child to kisse
And lulled it and after gan it blisse
Line 553
And thus she seyde / in hire benigne voys
Line 554
ffare weel my child / I shal thee neuere see
But sith / I thee / haue marked with the croys
Of thilke fader/ blessed moote he be
Line 557
