[6-text p 348]
Ther was no wight saue god and he þat wiste
In many wise / how soore I hym twiste
He deyde / whan I cam fro Ierusalem
And lith ygraue / vnder the roode beem
Line 496
Al is his tombe / noght so curyus
As was the sepulcre / of hym Daryus
Which that Appelles / wroghte subtilly [¶ Appelles / fecit mirabile opus in tumulo Darij / vnde in Alex|andro. libro. 6o.]
It nys but wast to burye hym preciously
Line 500
Lat hym fare wel / god yeue his soule reste
He is now / in his graue / and in his cheste
NOw / of my fifthe housbonde wol I telle [¶ Of the fifthe housbonde of this wyf / . and hou she bar hire ayens hym]
God lete his soule / neuere come in helle
Line 504
And yet was he to me / the mooste shrewe
That feele I / on my ribbes al by rewe
And euere shal / vn-to myn endyng day
But in oure bed / he was / ful fressh and gay
Line 508
And ther-with-al / so wel koude he me glose
Whan that he wolde han my bele chose
That thogh / he hadde me bet on euery bon
He koude wynne / agayn my loue anon
Line 512
I trowe I loued hym best for that he [folio 72b]
Was of his loue / daungerous to me
We wommen han / if that I shal nat lye
In this matere / a queynte fantasye
Line 516
Wayte what thyng we may nat lightly haue
Ther after / wol we crie / al day and craue
fforbede vs thyng and that desiren we
Preesse on vs faste / and thanne wol we fle
Line 520
With daunger / oute we al oure chaffare
Greet prees at Market maketh deere ware
And to greet cheepe / is holde at litel prys
This knoweth / euery womman that is wys
Line 524
¶ My fifthe housbonde / god his soule blesse
Which þat I took for loue / and no richesse
He som tyme / was a clerk of Oxenford
And hadde left scole / and wente at hom to bord
Line 528
