[6-text p 338]
Thanne were they maad / vp-on a creature
To purge vryne / and for engendrure
¶ But I seye noght þat euery wight is holde
That hath swich harneys / as I of tolde
Line 136
To goon and vsen hem in engendrure
They shul nat take / of chastitee no cure
Crist was a mayde / and shapen as a man
And many a seint sith the world bigan
Line 140
Yet lyued they euere / in perfit chastitee
I nyl nat enuye / no virginitee
Lat hem be breed / of pured whete seed
And lat vs wyues / hoten barly breed
Line 144
And yet with barly breed / Mark telle kan
Oure lord / refresshed many a man
In swich estaat as god hath cleped vs [¶ Ea vocacione qua vooati estis & cetera]
I wol perseuere / I nam nat precius
Line 148
In wyfhode I wol vse myn Instrument/
As frely / as my makere hath it sent
If I be daungerous / god yeue me sorwe
Myn housbonde shal it haue / bothe eue and morwe
Line 152
Whan þat hym list com forth and paye his dette
An housbonde I wol haue / I nyl nat lette
Which shal be / bothe my dettour / and my thral [¶ Qui vxorem habet & debitor dicitur. & esse i prepucio & seruu vxoris & qui malorum seruo|rum est alligatus]
And haue / his tribulacion with al
Line 156
Vp-on his flessh / whil that I am his wyf/
I haue the power / durynge al my lyf
Vp-on his propre body / and noght he
Right thus / the Apostel / tolde it vn-to me [¶ Et iterum seruus vxoris es / noli propter hoc habere tristiciam]
Line 160
And bad oure housbondes / for to loue vs weel
Al this sentence / me liketh euery deel [¶ Item si acceperis vxorem non peccasti tribula|cionem tamen carnis habebunt huiusmodi & cetera]
Vp stirte the Pardoner / and that anon
Now dame quod he / by god and by seint Iohn
Line 164
Ye been a noble prechour in this cas
I was aboute / to wedde a wyf allas [¶ Item vir corporis sui non habet potestatem/ set vxor]
What sholde I bye it on my flessh so deere
Yet hadde I leuere / wedde no wyf to yeere
Line 168
