The Ellesmere ms of Chaucer's Canterbury tales / edited by Frederick J. Furnivall.

[6-text p 312]

¶ The wordes of the Hoost to the Phisicien and the Pardoner.

Ovre Hoost gan to swere / as he were wood Harrow quod he / by nayles and by blood Line 288 This was a fals cherl and a fals Iustise As shameful deeth / as herte may deuyse Come to thise false Iuges / and hire Aduocatz Algate / this sely mayde / is slayn allas Line 292 Allas / to deere boughte she beautee Wherfore I seye / al day / as men may see That yiftes of ffortune and of Nature Been cause of deeth / to many a creature Line 296 . . . . . . . . . . [no gap in the MS.] Of bothe yiftes / that I speke of now Men han ful ofte / moore for harm than prow Line 300 ¶ But trewely / myn owene maister deere This is / a pitous tale for to heere But nathelees / passe ouer / is no fors I pray to god / so saue thy gentil cors Line 304 And eek/ thyne vrynals / and thy Iurdones Thyn ypocras / and eek thy Galiones And euery boyste / ful of thy letuarie God blesse hem / and oure lady Seint Marie Line 308 So moot I theen / thou art a propre man And lyk a prelat by Seint Ronyan Seyde I nat wel / I kan nat speke in terme But wel I woot thou doost myn herte to erme Line 312 That I almoost/ haue caught a Cardynacle [folio 140b] By corpus bones / but I haue triacle Or elles a draughte / of moyste and corny Ale Or but I heere anon / a myrie tale Line 316

[6-text p 313] Line 316 Myn herte is lost for pitee of this mayde Thou beel amy / thou Pardoner he sayde Telle vs som myrthe / or Iapes right anon ¶ It shal be doon quod he / by Seint Ronyon Line 320 But first quod he / heere at this Ale stake I wol bothe drynke / and eten of a Cake ¶ And right anon / the gentils gonne to crye Nay / lat hym telle vs of no ribaudye Line 324 Telle vs som moral thyng þat we may leere Som wit and thanne wol we gladly heere ¶ I graunte ywis quod he / but I moot thynke Vp-on som honeste thyng while þat I drynke Line 328