The Ellesmere ms of Chaucer's Canterbury tales / edited by Frederick J. Furnivall.
About this Item
- Title
- The Ellesmere ms of Chaucer's Canterbury tales / edited by Frederick J. Furnivall.
- Author
- Chaucer, Geoffrey, d. 1400.
- Publication
- London :: Published for the Chaucer Society by N. Trübner,
- 1868-1879.
- Rights/Permissions
The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
DPLA Rights Statement: No Copyright - United States
- Link to this Item
-
http://name.umdl.umich.edu/AGZ8232.0001.001
- Cite this Item
-
"The Ellesmere ms of Chaucer's Canterbury tales / edited by Frederick J. Furnivall." In the digital collection Corpus of Middle English Prose and Verse. https://name.umdl.umich.edu/AGZ8232.0001.001. University of Michigan Library Digital Collections. Accessed June 17, 2024.
Pages
Page 1
GROUP A. FRAGMENT I.
§ 1. GENERAL PROLOGUE.
ELLESMERE MS.
Here bygynneth the Book of the tales of Caunterbury.
WHan that Aprille with hise shoures soote [folio 5a]
The droghte of March / hath perced to the roote
And bathed euery veyne / in swich licour
Of which vertu / engendred is the flour
Line 4
Whan Zephirus eek / with his swete breeth
Inspired hath / in euery holt and heeth
The tendre croppes / and the yonge sonne
Hath in the Ram / his half[e] cours yronne [¶ .i. sol in Arieto]
And smale foweles / maken melodye
That slepen al the nyght / with open eye
So priketh hem nature in hir corages
Thanne longen folk / to goon on pilgrimage
Line 12
And Palmeres / for to seken straunge strondes
To ferne halwes / kowthe in sondry londes
And specially / from euery shires ende
Of Engelond / to Caunturbury they wende
Line 16
The hooly blisful martir for to seke
That hem hath holpen / whan þat they were seeke
Bifil that / in that seson on a day
In Southwerk / at the Tabard as I lay
Line 20
Redy / to wenden on my pilgrymage
To Caunterbury / with ful deuout corage
At nyght / were come / in to that hostelrye
Wel nyne and twenty in a compaignye
Line 24
Of sondry folk / by aventure y-falle
In felaweshipe / and pilgrimes were they alle
That toward Caunterbury wolden ryde
Page 2
The chambres and the stables weren wyde
Line 28
And wel we weren esed atte beste
And shortly / whan the sonne was to reste
So hadde I spoken / with hem everychon
That I was / of hir felaweshipe anon
Line 32
And made forward / erly for to ryse
To take oure wey / ther as I yow deuyse
But nathelees / whil I haue tyme and space
Er that I ferther / in this tale pace
Line 36
Me thynketh it acordaunt to reson
To telle yow / al the condicion
Of ech of hem / so as it semed me
And whiche they were / and of what degree
Line 40
And eek in what array / that they were Inne
And at a knyght / than wol I first bigynne
Aknyght ther was / and that a worthy man [¶ Knyght]
That fro the tyme / that he first bigan
Line 44
To riden out / he loued chiualrie
Trouthe and honour / fredom and curteisie
fful worthy was he / in his lordes werre
And therto / hadde he riden / no man ferre
Line 48
As wel in cristendom / as in Hethenesse [folio 5b]
And euere / honoured for his worthynesse
¶ At Alisaundre he was / whan it was wonne
fful ofte tyme / he hadde the bord bigonne
Line 52
Abouen alle nacions in Pruce
In Lettow / hadde he reysed and in Ruce
No cristen man so ofte of his degree
In Gernade / at the seege eek hadde he be
Line 56
Of Algezir /. and riden in Belmarye
At Lyeys was he / and at Satalye
Whan they were wonne / and in the grete See
At many a noble Armee / hadde he be
Line 60
At mortal batailles / hadde he been fiftene
And foughten for oure feith at Tramyssene
In lystes thries / and ay slayn his foo
Page 3
This ilke worthy knyght hadde been also
Line 64
Somtyme / with the lord of Palatye
Agayn / another hethen in Turkye
And eueremoore / he hadde a souereyn prys
And though þat he were worthy he was wys
Line 68
And of his port / as meeke as is a mayde
He neuere yet / no vileynye ne sayde
In al his lyf / vn to no maner wight
He was a verray parfit gentil knyght
Line 72
¶ But for to tellen yow / of his array
His hors weren goode / but he was nat gay
Of ffustian / he wered a gypon
Al bismotered with his habergeon
Line 76
ffor he was late / ycome from his viage
And wente / for to doon his pilgrymage
With hym ther was his sone a yong Squier [¶ Squier]
A louyere / and a lusty Bacheler
Line 80
With lokkes crulle / as they were leyd in presse
Of twenty yeer of Age / he was I gesse
Of his stature / he was of euene lengthe
And wonderly delyuere / and of greet strengthe
Line 84
And he hadde been somtyme in chyuachie
In fflaundres / in Artoys and Pycardie
And born hym weel / as of so litel space
In hope / to stonden in his lady grace
Line 88
Embrouded was he / as it were a meede
Al ful of fresshe floures / whyte and reede
Syngynge he was / or floytynge al the day
He was as fressh / as in the Monthe of May
Line 92
Short was his gowne / with sleues longe and wyde
Wel koude he sitte on hors and faire ryde
He koude songes make / and wel endite
Iuste and eek daunce / and weel purtreye and write
Line 96
So hoote he louede / that by nyghtertale [folio 6a]
He slepte namoore than dooth a nyghtyngale
Curteis he was / lowely / and seruysable
Page 4
And carf / biforn his fader at the table
Line 100
A Yeman hadde he / and seruantz namo [¶ Yeman]
At that tyme / for hym liste ride soo
And he was clad / in cote and hood of grene
A sheef of pecok arwes / bright and kene
Line 104
Vnder his belt he bar ful thriftily
Wel koude he / dresse his takel yemanly
Hise arwes drouped noght with fetheres lowe
And in his hand / he baar a myghty bowe
Line 108
A not heed hadde he / with a broun visage
Of woodecraft / wel koude he al the vsage
Vp on his arm / he baar a gay bracer
And by his syde / a swerd / and a bokeler/
Line 112
And on that oother syde / a gay daggere
Harneised wel / and sharpe as point of spere
A Cristophere on his brest of siluer sheene
An horn he bar / the bawdryk was of grene
Line 116
A fforster was he / soothly as I gesse
Ther was also / a Nonne a PRIORESSE [¶ Prioresse]
That of hir smylyng / was ful symple and coy
Hire gretteste ooth / was but by seint Loy
Line 120
And she was cleped / madame Eglentyne
fful weel she soong the seruice dyuyne,
Entuned in hir nose / ful semeely
And frenssh / she spak / ful faire and fetisly
Line 124
After the scole of Stratford atte Bowe
ffor frenssh of Parys / was to hire vnknowe
At mete / wel ytaught was she with alle
She leet no morsel / from hir lippes falle
Line 128
Ne wette hir fyngres / in hir sauce depe
Wel koude she carie a morsel / and wel kepe
That no drope / ne fille vp on hire brist
In curteisie was set ful muchel hir list/
Line 132
Hire ouer lippe / wyped she so clene
That in hir coppe / ther was no ferthyng sene
Of grece / whan she dronken hadde hir draughte
Page 5
fful semely / after hir mete she raughte
Line 136
And sikerly / she was of greet desport
And ful plesaunt / and amyable of port
And peyned hire to countrefete cheere
Of Court and to been estatlich of manere
Line 140
And to ben holden digne of reuerence
But for to speken of hire conscience
She was so charitable and so pitous
She wolde wepe / if that she saugh a Mous
Line 144
Kaught in a trappe / if it were deed or bledde [folio 6b]
Of smale houndes / hadde she þat she fedde
With rosted flessh / or Milk / and wastel breed
But soore wepte she / if any of hem were deed
Line 148
Or if men smoot it / with a yerde smerte
And al was conscience and tendre herte
fful semyly / hir wympul pynched was
Hire nose tretys / hir eyen greye as glas
Line 152
Hir mouth ful smal / and ther to softe and reed
But sikerly / she hadde a fair forheed
It was almoost . a spanne brood I trowe
ffor hardily / she was nat vndergrowe
Line 156
fful fetys was hir cloke / as I was war
Of smal coral / aboute hire Arm she bar
A peire of bedes / gauded al with grene
And ther on / heng a brooch of gold ful sheene
Line 160
On which / ther was first write a crowned .A.
And after / Amor vincit omnia.
Another Nonne / with hire hadde she [¶ Nonne & .iij. preestes.]
That was hire Chapeleyne and preestes thre
Line 164
A Monk ther was / a fair for the maistrie [¶ Monk/]
An outridere / that louede venerie
A manly man / to been an Abbot able
fful many a deyntee hors / hadde he in stable
Line 168
And whan he rood / men myghte his brydel heere
Gynglen / in a whistlynge wynd als cleere
And cek as loude / as dooth þe Chapel belle
Page 6
Ther as this lord / was kepere of the Celle
Line 172
The reule of seint Maure / or of seint Beneit /
By cause that it was old / and som del streit /
This ilke Monk / leet olde thynges pace
And heeld / after the newe world the space
Line 176
He yaf nat of that text a pulled hen
That seith / that hunters beth nat hooly men
Ne that a Monk / whan he is recchelees
Is likned / til a fissh / þat is waterlees
Line 180
This is to seyn / a Monk out of his Cloystre
But thilke text / heeld he nat worth an Oystre
And I seyde / his opinion was good
What sholde he studie / and make hym seluen wood
Line 184
Vpon a book / in Cloystre alwey to poure
Or swynken with his handes, and laboure
As Austyn bit / how shal the world be serued
Lat Austyn / haue his owene swynk / to him reserued
Line 188
Therfore / he was a prikasour aright
Grehoundes he hadde / as swift as fowel in flight
Of prikyng and of huntyng for the hare
Was al his lust . for no cost wolde he spare
Line 192
I seigh his sleues / ypurfiled at the hond [folio 7a]
With grys / and that the fyneste of a lond
And for to festne his hood vnder his chyn
He hadde of gold / ywroght / a ful curious pyn
Line 196
A loue knotte / in the gretter ende ther was
His heed was balled / þat shoon as any glas
And eek his face / as it hadde been enoynt/
He was a lord ful fat / and in good poynt
Line 200
Hise eyen stepe / and rollynge in his heed
That stemed / as a forneys of a leed
His bootes souple / his hors in greet estaat
Now certeinly / he was a fair prelaat
Line 204
He was nat pale / as a forpyned goost
A fat swan loued he best of any roost
His palfrey / was as broun as is a berye
Page 7
Affrere ther was / a wantowne and a merye, [¶ ffrere]
A lymytour / a ful solempne man
Line 209
In alle the ordres foure / is noon þat kan
So muchel of daliaunce / and fair langage
He hadde maad / ful many a mariage
Line 212
Of yonge wommen / at his owene cost
Vn to his ordre / he was a noble post
And wel biloued / and famulier was he
With frankeleyns / ouer al in his contree
Line 216
And [eek] with worthy wommen of the toun
ffor he hadde power of confessioun
As seyde hym self / moore than a Curat
ffor of his ordre / he was licenciat
Line 220
fful swetely / herde he confession
And plesaunt was his absolucion
He was an esy man / to yeue penaunce
Ther as he wiste / to haue a good pitaunce
Line 224
ffor vnto a poure ordre / for to yiue
Is signe / þat a man is wel yshryue
ffor if he yaf / he dorste make avaunt
He wiste / that a man was repentaunt
Line 228
ffor many a man / so harde is of his herte
He may nat wepe / al thogh hym soore smerte
Therfore in stede of wepynge and preyeres
Men moote yeue siluer / to the poure freres
Line 232
His typet was ay farsed ful of knyues
And pynnes / for to yeuen yonge wyues
And certeinly / he hadde a murye note
Wel koude he synge / and pleyen on a rote
Line 236
Of yeddynges / he baar outrely the pris
His nekke / whit was / as the flour delys
Ther to / he strong was as a Champion
He knew the Tauernes wel in al the toun
Line 240
And euerich Hostiler / and Tappestere [folio 7b]
Bet than a lazar / or a beggestere
ffor vn to swich a worthy man as he
Page 8
Acorded nat / as by his facultee
Line 244
To haue with sike lazars Aqueyntance
It is nat honeste / it may nat avance
ffor to deelen / with no swich poraille
But al with riche / and selleres of vitaille
Line 248
And ouer al / ther as profit sholde arise
Curteis he was / and lowely of seruyse
Ther nas no man / nowher so vertuous
He was / the beste beggere in his hous
Line 252
. . . . . [no gap in the MS.]
sfor thogh a wydwe / hadde noght a sho
So plesaunt / was his In principio
Yet wolde he haue / a ferthyng er he wente
His purchas / was wel bettre than his rente
Line 256
And rage he koude / as it were right a whelpe
In loue dayes / ther koude he muchel helpe
ffor there he was nat lyk a Cloystrer
With a thredbare cope / as is a poure scoler
Line 260
But he was lyk / a maister / or a pope
Of double worstede / was his semycope
That rounded as a belle / out of the presse
Somwhat he lipsed / for his wantownesse
Line 264
To make his englissh / sweete vp on his tonge
And in his harpyng. whan þat he hadde songe
Hise eyen twynkled in his heed aryght
As doon the sterres / in the frosty nyght
Line 268
This worthy lymytour / was cleped Huberd
A Marchant was ther with a forked berd [¶ Marchant]
In Motlee and hye on horse he sat
Vp on his heed a fflaundryssh Beuere hat /
Line 272
His bootes clasped / faire and fetisly
Hise resons he spak / ful solempnely
Sownynge alway thencrees of his wynnyng
He wolde the see were kept for any thing
Line 276
Bitwixe Middelburgh and Orewelle
Page 9
Wel koude he in eschaunge sheeldes selle
This worthy man / ful wel his wit bisette
Ther wiste no wight þat he was in dette
Line 280
So estatly / was he of his gouernaunce
With his bargaynes / and with his cheuyssaunce
ffor sothe / he was a worthy man with alle
But sooth to seyn / I noot how men hym calle
Line 284
A Clerk ther was / of Oxenford also [¶ Clerk of Oxenford,]
That vn to logyk / hadde longe ygo
And leene was his hors as is a rake
And he nas nat right fat, I vndertake
Line 288
But looked holwe / and ther to sobrely [folio 8a]
fful thredbare / was his ouereste courtepy
ffor he hadde geten hym yet no benefice
Ne was so worldly / for to haue office
Line 292
ffor hym was leuere / haue at his beddes heed
Twenty bookes / clad in blak or reed
Of Aristotle / and his Philosophie
Than robes riche / or fithele / or gay sautrie
Line 296
But al be / that he was a Philosophre
Yet hadde he / but litel gold in cofre
But al þat he myghte / of his freendes hente
On bookes / and his lernynge he it spente
Line 300
And bisily / gan for the soules preye
Of hem / þat yaf hym wher with to scoleye
Of studie took he moost cure and moost heede
Noght o word / spak he moore than was neede
Line 304
And that was seyd / in forme and reuerence
And short and quyk and ful of hy sentence
Sownynge in moral vertu / was his speche
And gladly wolde he lerne and gladly teche
Line 308
A Sergeant of the Lawe / war and wys [¶ Sergeant of lawe]
That often hadde been at the Parvys
Ther was also / ful riche of excellence
Discreet he was / and of greet reuerence
Line 312
He semed swich / hise wordes weren so wise
Page 10
Iustice he was / ful often in Assise,
By patente / and by pleyn commissioun
ffor his science / and for his heigh renoun
Line 316
Of fees and robes / hadde he many oon
So greet a purchasour / was nowher noon
Al was fee symple to hym in effect
His purchasyng / myghte nat been infect
Line 320
Nowher / so bisy a man as he ther nas
And yet he semed / bisier than he was
In termes hadde he caas and doomes alle
That from the tyme / of kyng william were yfalle
Line 324
Ther-to / he koude endite and make a thyng
Ther koude no wight / pynchen at his writyng
And euery statut / koude he pleyn by rote
He rood but hoomly / in a medlee cote
Line 328
Girt with a ceint of silk / with barres smale
Of his array telle I no lenger tale.
A ffrankeleyn / was in his compaignye [¶ ffrankeleyn]
Whit was his heed / as is a dayesye
Line 332
Of his complexion / he was sangwyn
Wel loued he by the morwe a sope in wyn
To lyuen in delit was euere his wone
For he was / Epicurus owene sone
Line 336
That heeld opinion that pleyn delit [folio 8b]
Was verray felicitee parfit
An housholdere / and that a greet was he
Seint Iulian was he in his contree
Line 340
His breed / his Ale / was alweys after oon
A bettre envyned man / was neuere noon
With oute bake mete / was neuere his hous
Of fissh and flessh / and that so plenteuous
Line 344
It snewed in his hous / of mete and drynke
Of alle deyntees / that men koude thynke
After the sondry sesons / of the yeer
So chaunged he / his mete and his soper
Line 348
fful many a fat partrich / hadde he in Muwe
Page 11
And many a Breem / and many a luce in Stuwe
Wo was his Cook / but if his sauce were
Poynaunt / and sharpe / and redy al his geere
Line 352
His table dormant in his halle alway
Stood redy couered / al the longe day
At sessions ther was he lord and sire
fful ofte tyme / he was knyght of the shire
Line 356
An Anlaas / and a gipser al of silk
Heeng at his girdel / whit as morne Milk /
A shirreue hadde he been and Countour
Was nowher / such a worthy Vauasour
Line 360
AN haberdasshere and a Carpenter [¶ Haberdasshere] [¶ Carpenter]
A Webbe / a Dyere / and a Tapycer [¶ Webbe] [¶ Dyere]
And they were clothed alle in o lyueree [¶ Tapicer]
Of a solempne / and a greet fraternitee
Line 364
fful fressh and newe / hir geere apiked was
Hir knyues / were chaped noght with bras
But al with siluer / wroght ful clene and weel
Hire girdles and hir pouches euerydeel
Line 368
Wel semed ech of hem / a fair burgeys
To sitten in a yeldehalle / on a deys
Euerich / for the wisdom þat he kan
Was shaply / for to been an Alderman
Line 372
ffor catel hadde they ynogh and rente
And eek hir wyues wolde it wel assente
And elles certeyn / were they to blame
It is ful fair / to been ycleped ma Dame
Line 376
And goon to vigilies / al bifore
And haue a Mantel roialliche ybore
A Cook they hadde with hem for the nones [¶ Cook.]
To boille the chiknes with the Marybones
Line 380
And poudre Marchant tart and galyngale
Wel koude he knowe / a draughte of London ale
He koude rooste and sethe / and boille and frye
Maken Mortreux / and wel bake a pye
Line 384
But greet harm was it / as it thoughte me [folio 9a]
Page 12
That on his shyne / a mormal hadde he
ffor blankmanger / that made he with the beste
A Shipman was ther / wonynge fer by weste [¶ Shipman]
ffor aught I woot / he was of Dertemouthe
Line 389
He rood vp on a Rouncy / as he kouthe
In a gowne of faldyng to the knee
A daggere / hangynge on a laas hadde he
Line 392
Aboute his nekke / vnder his Arm adoun
The hoote somer / hadde maad his hewe al broun
And certeinly / he was a good felawe
fful many a draughte of wyn / had he [y-]drawe
Line 396
ffro Burdeuxward / whil that the Chapman sleepe
Of nyce conscience / took he no keepe
If þat he faught and hadde the hyer hond
By water / he sente hem hoom to euery lond
Line 400
But of his craft / to rekene wel his tydes
His stremes / and his daungers hym bisides
His herberwe / and his moone / his lodemenage
Ther nas noon swich / from Hulle to Cartage
Line 404
Hardy he was and wys / to vndertake
With many a tempest / hadde his berd been shake
He knew alle the hauenes / as they were
ffron Gootlond to the Cape of ffynystere
Line 408
And euery cryke / in Britaigne and in Spayne
His Barge / ycleped was the Maudelayne
With vs ther was a Doctour of Phisik [¶ Doctour of Phisik/]
In al this world / ne was ther noon hym lik
Line 412
To speke of phisik / and of Surgerye
ffor he was grounded in Astronomye
He kepte his pacient a ful greet deel
In houres / by his magyk natureel
Line 416
Wel koude he fortunen the Ascendent
Of hise ymages / for his pacient
He knew the cause / of euerich maladye
Were it of hoot or cold / or moyste / or drye
Line 420
And where they engendred / and of what humour
Page 13
He was a verray parfit praktisour
The cause yknowe / and of his harm the roote
Anon he yaf / the sike man his boote
Line 424
fful redy hadde he / hise Apothecaries
To sende him drogges and his letuaries
ffor ech of hem / made oother for to wynne
Hir frendshipe / nas nat newe to bigynne
Line 428
Wel knew he / the olde Esculapius
And Deyscorides / and eek Risus
Olde ypocras / Haly / and Galyen
Serapion Razis / and Auycen
Line 432
Auerrois / Damascien / and Constantyn [folio 9b]
Bernard / and Gatesden / and Gilbertyn
Of his diete / mesurable was he
ffor it was / of no superfluitee
Line 436
But of greet norissyng / and digestible
His studie / was but litel on the Bible
In sangwyn and in pers / he clad was al
Lyned with Taffata / and with Sendal
Line 440
And yet he was / but esy of dispence
He kepte / that he wan in pestilence
ffor gold in Phisik / is a cordial
Therfore he louede gold in special
Line 444
A good wif was ther of biside Bathe [¶ The goode Wif of] [¶ Bathe]
But she was som del deef and þat was scathe
Of clooth makyng she hadde swich an haunt
She passed hem of ypres and of Gaunt
Line 448
In al the parisshe / wif ne was ther noon
That to the offrynge / bifore hire sholde goon
And if ther dide / certeyn so wrooth was she
That she was / out of alle charitee
Line 452
Hir couerchiefs / ful fyne weren of ground
I dorste swere / they weyeden ten pound
That on a sonday / weren vpon hir heed
Hir hosen weren / of fyn scarlet reed
Line 456
fful streite yteyd / and shoes ful moyste and newe
Page 14
Boold was hir face / and fair and reed of hewe
She was a worthy womman al hir lyue
Housbondes at chirche dore / she hadde fyue
Line 460
Withouten oother compaignye in youthe
But ther of / nedeth nat to speke as nowthe
And thries / hadde she been at Ierusalem
She hadde passed / many a straunge strem
Line 464
At Rome she hadde been and at Boloigne
In Galice at Seint Iame / and at Coloigne
She koude muchel / of wandrynge by the weye
Gat tothed was she / soothly for to seye
Line 468
Vp on an Amblere / esily she sat
Ywympled wel / and on hir heed an hat
As brood / as is a bokeler / or a targe
A foot mantel / aboute hir hipes large
Line 472
And on hire feet a paire of spores sharpe
In felaweshipe / wel koude she laughe and carpe
Of remedies of loue / she knew per chaunce
For she koude of that Art the olde daunce
Line 476
A good man was ther of Religioun
And was / a poure Person of a toun [¶ Person of a toun.]
But riche he was / of hooly thoght and werk/
He was also / a lerned man a clerk
Line 480
That cristes gospel / trewely wolde preche [folio 10a]
Hise parisshens / deuoutly wolde he teche
Benygne he was / and wonder diligent
And in Aduersitee ful pacient
Line 484
And swich / he was [y-]preued ofte sithes
fful looth were hym / to cursen for hise tithes
But rather wolde he yeuen out of doute
Vn to his poure parisshens aboute
Line 488
Of his offryng and eek of his substaunce
He koude / in litel thyng haue suffisaunce
Wyd was his parisshe / and houses fer a sonder
But he ne lafte nat for reyn ne thonder
Line 492
In siknesse nor in meschief / to visite
Page 15
The ferreste in his parisshe muche and lite
Vp on his feet and in his hand a staf
This noble ensample to his sheepe he yaf
Line 496
That firste he wroghte / and afterward that he taughte
Out of the gospel / he tho wordes caughte
And this figure / he added eek ther to
That if gold ruste / what shal Iren doo
Line 500
For if a preest be foul / on whom we truste
No wonder is / a lewed man to ruste
And shame it is / if [that] a prest take keepe
A shiten shepherde / and a clene sheepe
Line 504
Wel oghte a preest / ensample for to yeue
By his clennesse / how þat his sheepe sholde lyue
He sette nat his benefice to hyre
And leet his sheepe / encombred in the Myre
Line 508
And ran to London / vn to seint Poules
To seken hym a chauntrie for soules
Or with a bretherhed / to been withholde
But dwelleth at hoom and kepeth wel his folde
Line 512
So that the wolf / ne made it nat myscarie
He was a shepherde / and noght a Mercenarie
And though he hooly were / and vertuous
He was nat to synful man despitous
Line 516
Ne of his speche / daungerous ne digne
But in his techyng discreet and benygne
To drawen folk to heuene by fairnesse
By good ensample / this was his bisynesse
Line 520
But it were any persone obstinat
What so he were / of heigh or lough estat
Hym wolde he snybben sharply for the nonys
A bettre preest I trowe / þat nowher noon ys
Line 524
He waiteth / after no pompe and reuerence
Ne maked him a spiced conscience
But cristes loore / and hise Apostles twelue
He taughte / but first he folwed it hym selue
Line 528
With hym ther was a Plowman was his brother [folio 10b] [¶ Plowman.]
Page 16
That hadde ylad of dong ful many a fother
A trewe swynkere / and a good was he
Lyuynge in pees / and parfit charitee
Line 532
God loued he best / with al his hoole herte
At alle tymes / thogh he gamed or smerte
And thanne his neighebore / right as hym selue
He wolde thresshe / and ther to dyke and delue
Line 536
For cristes sake / for euery poure wight
Withouten hire / if it lay in his myght
Hise tithes / payde he ful faire and wel
Bothe of his propre swynk and his catel
Line 540
In a Tabard he rood / vpon a Mere
Ther was also / a Reue and a Millere [¶ Millere.]
A Somnour / and a Pardoner also
A Maunciple / and my self ther were namo
Line 544
¶ The Millere was a stout carl for the nones
Ful byg he was / of brawn / and eek of bones
That proued wel / for ouer al ther he cam
At wrastlynge / he wolde haue alwey the Ram
Line 548
He was short sholdred / brood / a thikke knarre
Ther nas no dore / þat he ne wolde heue of harre
Or breke it / at a rennyng with his heed
His berd / as any sowe / or fox was reed
Line 552
And ther to brood / as though it were a spade
Vp on the cope / right of his nose he hade
A werte / and ther on stood a toft of herys
Reed / as the brustles / of a sowes erys
Line 556
Hise nosethirles / blake were and wyde
A swerd and a bokeler / bar he by his syde
His mouth as greet was / as a greet forneys
He was a Ianglere and a goliardeys
Line 560
And that was moost / of synne and harlotries
Wel koude he stelen corn / and tollen thries
And yet he hadde / a thombe of gold pardee
A whit cote / and a blew hood wered he
Line 564
A baggepipe / wel koude he blowe and sowne
Page 17
And ther with al / he broghte vs out of towne
A gentil Maunciple / was ther of a temple [¶ Maunciple.]
Of which Achatours / myghte take exemple
Line 568
ffor to be wise / in byynge of vitaille
ffor wheither that he payde / or took by taille
Algate / he wayted so / in his Achaat
That he was ay biforn / and in good staat
Line 572
Now is nat that of god a ful fair grace
That swich a lewed mannes wit shal pace
The wisdom / of an heepe of lerned men
Of maistres hadde he / mo than thries ten
Line 576
That weren of lawe / expert and curious [folio 11a]
Of whiche / þer weren a duszeyne in that hous
Worthy to been stywardes / of rente and lond
Of any lord / that is in Engelond
Line 580
To maken hym lyue / by his propre good
In honour dettelees / but if he were wood
Or lyue as scarsly / as hym list desire
And able / for to helpen al a shire
Line 584
In any caas / þat myghte falle or happe
And yet this manciple / sette hir aller cappe
The Reue was / a sclendre colerik man [¶ Reue.]
His berd was shaue / as ny as euer he kan
Line 588
His heer was by his erys / ful round yshorn
His tope was doked / lyk a preest biforn
fful longe were his legges / and ful lene
ylyk a staf / ther was no calf ysene
Line 592
Wel koude he kepe a gerner / and a bynne
Ther was noon Auditour / koude of him wynne
Wel wiste he / by the droghte / and by the reyn
The yeldynge / of his seed / and of his greyn
Line 596
His lordes sheepe / his neet his dayerye
His swyn / his hors / his stoor / and his pultrye
Was hoolly / in this Reues gouernyng /
And by his couenant yaf the rekenyng
Line 600
Syn that his lord / was twenty yeer of age
Page 18
Ther koude no man / brynge hym in Arrerage
Ther nas baillif ne hierde / nor oother hyne
That he [ne] knew his sleighte and his couyne
Line 604
They were adrad of hym / as of the deeth
His wonyng was ful faire vp on an heeth
With grene trees / shadwed was his place
He koude bettre than his lord purchace
Line 608
fful riche he was astored pryuely
His lord / wel koude he plesen subtilly
To yeue and lene hym / of his owene good
And haue a thank / yet a gowne and hood
Line 612
In youthe he hadde lerned a good myster
He was a wel good wrighte a Carpenter
This Reue sat vp on a ful good stot
That was al pomely grey / and highte Scot
Line 616
A long surcote of pers / vp on he hade
And by his syde / he baar a rusty blade
Of Northfolk was this Reue / of which I telle
Biside a toun / men clepen Baldeswelle
Line 620
Tukked he was / as is a frere aboute
And euere he rood / the hyndreste of oure route
A Somonour was ther with vs in that place [¶ Somonour.]
That hadde / a fyr reed Cherubynnes face
Line 624
ffor sawcefleem he was with eyen narwe [folio 11b]
As hoot he was / and lecherous as a sparwe
With scaled browes blake and piled berd
Of his visage / children were aferd
Line 628
Ther nas quyk siluer / lytarge ne brymstoon
Boras / Ceruce / ne oille of Tartre noon
Ne oynement that wolde clense and byte
That hym myghte helpen / of the whelkes white
Line 632
Nor of the knobbes / sittynge on his chekes
Wel loued he garleek / oynons / and eek lekes
And for to drynken strong wyn / reed as blood
Thanne wolde he speke / and crie as he were wood
Line 636
And whan þat he / wel dronken hadde the wyn
Page 19
Than wolde he speke no word but latyn
A fewe termes hadde he / two or thre
That he had lerned / out of som decree
Line 640
No wonder is / he herde it al the day
And eek ye knowen wel / how þat a Iay
Kan clepen watte / as wel as kan the pope
But who so koude in oother thyng hym grope
Line 644
Thanne hadde he spent al his Philosophie
Ay questio quid iuris / wolde he crie
He was / a gentil harlot and a kynde
A bettre felawe / sholde men noght fynde
Line 648
He wolde suffre / for a quart of wyn
A good felawe / to haue his concubyn
A twelf monthe / and excuse hym atte fulle
And priuely / a fynch eek koude he pulle
Line 652
And if he foond owher / a good felawe
He wolde techen him / to have noon Awe
In swich caas / of the Ercedekenes curs
But if a mannes soule / were in his purs
Line 656
ffor in his purs / he sholde ypunysshed be
Purs / is the Ercedekenes helle seyde he
But wel I woot / he lyed right in dede
Of cursyng oghte ech gilty man [to] drede
Line 660
ffor curs wol slee / right as assoillyng sauith
And also / war him of a Significauit/
In daunger hadde he / at his owene gise
The yonge girles / of the diocise
Line 664
And knew hir conseil / and was al hir reed
A gerland / hadde he set vp on his heed
As greet / as it were for an Ale stake
A bokeleer / hadde he maad him of a Cake
Line 668
With hym ther was / a gentil Pardoner [¶ Pardoner.]
Of Rounciuale / his freend and his compeer
That streight was comen / fro the court of Rome.
fful loude he soong com hider loue to me
Line 672
This Somonour / bar to hym a stif burdoun [folio 12a]
Page 20
Was neuere trompe / of half so greet a soun
This Pardoner hadde heer / as yelow as wex
But smothe it heeng as dooth a strike of flex
Line 676
By ounces / henge hise lokkes þat he hadde
And ther with / he hise shuldres ouerspradde
But thynne it lay / by colpons oon and oon
But hood for Iolitee / wered he noon
Line 680
For it was trussed / vp in his walet
Hym thoughte / he rood / al of the newe Iet
Discheuelee saue his cappe / he rood al bare
Swiche glarynge eyen hadde he as an hare
Line 684
A vernycle hadde he sowed / vp on his cappe
His walet [lay] biforn hym / in his lappe
Bret ful of pardon / comen from Rome al hoot/
A voys he hadde / as smal as hath a goot/
Line 688
No berd hadde he / ne neuere sholde haue
As smothe it was / as it were late shaue
I trowe / he were a geldyng or a mare
But of his craft fro Berwyk in to Ware
Line 692
Ne was ther / swich another Pardoner
ffor in his male / he hadde a pilwe beer
Which þat he seyde / was oure lady veyl
He seyde he hadde / a gobet of the seyl
Line 696
That seint Peter hadde / whan þat he wente
Vp on the see / til Ihesu crist hym hente
He hadde a croys of laton / ful of stones
And in a glas / he hadde pigges bones
Line 700
But with thise relikes / whan þat he fond
A poure person / dwellynge vp on lond
Vp on a day / he gat hym moore moneye
Than þat the person gat / in Monthes tweye
Line 704
And thus / with feyned flaterye and Iapes
He made the person and the peple his Apes
But trewely / to tellen atte laste
He was in chirche a noble ecclesiaste
Line 708
Wel koude he rede / a lesson or a storie
Page 21
But alderbest / he song an Offertorie
ffor wel he wiste / whan þat song was songe
He moste preche / and wel affile his tonge
Line 712
To wynne siluer / as he ful wel koude
Therefore he song / the murierly and loude
NOw haue I toold you shortly in a clause
The staat tharray / the nombre and eek the cause
Line 716
Why þat assembled was this compaignye
In Southwerk / at [[MS. as]] this gentil hostelrye
That highte the Tabard / faste by the belle
But now is tyme / to yow for to telle
Line 720
How that we baren vs that ilke nyght [folio 12b]
Whan we were / in that hostelrie alyght
And after wol I telle / of our viage
And al the remenaunt of oure pilgrimage
Line 724
But first I pray yow / of youre curteisye
That ye narette it nat my vileynye
Thogh þat I pleynly speke in this mateere
To telle yow / hir wordes and hir cheere
Line 728
Ne thogh I speke hir wordes proprely
ffor this ye knowen / al so wel as I
Who so shal telle a tale / after a man
He moote reherce / as ny as euere he kan
Euerich a word / if it be in his charge
Al speke he / neuer so rudeliche or large
Or ellis / he moot telle his tale vntrewe
Or feyne thyng . or fynde wordes newe
Line 736
He may nat spare / al thogh he were his brother
He moot as wel / seye o word as another
Crist spak hym self / ful brode in hooly writ
And wel ye woot no vileynye is it
Line 740
Eek Plato seith / who so kan hym rede
The wordes / moote be cosyn to the dede
Also I prey yow / to foryeue it me
Al haue I nat set folk in hir degree
Line 744
Heere in this tale / as þat they sholde stonde
Page 22
My wit is short ye may wel vnderstonde
¶ Greet chiere made oure hoost vs euerichon
And to the soper / sette he vs anon
Line 748
And serued vs / with vitaille at the beste
Strong was the wyn / and wel to drynke vs leste
A semely man / oure hoost was with alle
ffor to been / a Marchal in an halle
Line 752
A large man he was / with eyen stepe
A fairer Burgeys / was ther noon in Chepe
Boold of his speche / and wys and well ytaught
And of manhod / hym lakked[e] right naught
Line 756
Eek therto / he was right a myrie man
And after soper / pleyen he bigan
And spak of myrthe / amonges othere thynges
Whan that we / hadde maad our rekenynges
Line 760
And seyde thus / now lordynges trewely
Ye been to me / right welcome hertely
ffor by my trouthe / if that I shal nat lye
I saugh nat this yeer / so myrie a compaignye
Line 764
Atones in this herberwe as is now
ffayn wolde I doon yow myrthe / wiste I how
And of a myrthe / I am right now bythoght
To doon yow ese / and it shal coste noght
Line 768
¶ Ye goon to Caunterbury / god yow speede [folio 13a]
The blisful martir / quite yow youre meede
And wel I woot / as ye goon by the weye
Ye shapen yow / to talen and to pleye
Line 772
ffor trewely / confort ne myrthe is noon
To ride by the weye doumb as the stoon
And therfore / wol I maken yow disport
As I seyde erst and doon yow som confort
Line 776
And if yow liketh alle / by oon assent
ffor to stonden / at my Iuggement
And for to werken / as I shal yow seye
To morwe / whan ye riden by the weye
Line 780
Now by my fader soule that is deed
Page 23
But if ye be myrie / I wol yeue yow myn heed
¶ Hoold vp youre hond withouten moore speche
Oure conseil / was nat longe for to seche
Line 784
Vs thoughte / it was noght worth / to make it wys
And graunted hym / wit outen moore auys
And bad him seye his voirdit as hym leste
¶ Lordynges quod he / now herkneth for the beste
Line 788
But taak it nought / I prey yow in desdeyn
This is the poynt to speken short and pleyn
That ech of yow / to shorte with oure weye
In this viage / shal telle tales tweye
Line 792
To Caunterburyward / I mene it so
And homward / he shal tellen othere two
Of auentures / that whilom han bifalle
And which of yow / that bereth hym best of alle
Line 796
That is to seyn / that telleth in this caas
Tales of best sentence / and moost solaas
Shal haue a soper / at oure aller cost
Heere in this place / sittynge by this post
Line 800
Whan that we come agayn fro Caunterbury
And for to make yow / the moore mury
I wol my self / goodly with yow ryde
Right at myn owene cost and be youre gyde
Line 804
And who so wole / my Iuggement withseye
Shal paye / al that we spenden by the weye
And if ye vouche sauf / that it be so
Tel me anon / with outen wordes mo
Line 808
And I wol erly / shape me therfore
¶ This thyng was graunted and oure othes swore
With ful glad herte / and preyden hym also
That he would vouche sauf / for to do so
Line 812
And that he / wolde been oure gouernour
And of our tales / Iuge and Reportour
And sette a soper / at a certeyn pris
And we / wol reuled been at his deuys
Line 816
¶ In heigh and lough / and thus by oon assent [folio 13b]
Page 24
We been acorded / to his Iuggement
And ther vp on / the wyn was fet anon
We dronken / and to reste wente echon
Line 820
With outen / any lenger taryynge
Amorwe / whan þat day / gan for to sprynge
Vp roos oure hoost and was oure aller cok
And gadrede vs togidre / alle in a flok
Line 824
And forth we riden / a litel moore than paas
Vn to the wateryng of Seint Thomas
And there oure hoost bigan his hors areste
And seyde lordynges / herkneth if yow leste
Line 828
¶ Ye woot youre foreward / and [I] it yow recorde
If euen song / and morwe song accorde
Lat se now / who shal telle the firste tale
As euere mote I drynke / wyn or ale
Line 832
Who so be / rebel to my Iuggement
Shal paye / for al þat by the wey is spent
Now draweth cut er þat we ferrer twynne
He / which þat hath the shorteste shal bigynne
Line 836
Sire knyght quod he / my mayster and my lord
Now draweth cut / for that is myn accord
Cometh neer quod he / my lady Prioresse
And ye sire clerk / lat be your shamefastnesse
Line 840
Ne studieth noght / ley hond to euery man
Anon to drawen / euery wight bigan
And shortly / for to tellen as it was
Were it by auenture / or sort or cas
Line 844
The sothe is this / the cut fil to the knyght
Of which / ful blithe and glad was every wyght
And telle he moste his tale / as was reson
By foreward / and by composicion
Line 848
As ye han herd / what nedeth wordes mo
An whan this goode man / saugh þat it was so
As he / that wys was and obedient
To kepe his foreward / by his free assent
Line 852
He seyde / syn I shal bigynne the game
Page 25
Page 26
[folio 14a]
¶ Heere bigynneth the knyghtes tale
Iamque domos patrias Sithice post aspera gentis presia laurigero &c.
WHilom / as olde stories / tellen vs [[Painting of the Knight in the margin.]]
Ther was a duc þat highte Theseus
Of Atthenes / he was lord and gouernour
Line 861
And in his tyme swich a Conquerour,
That gretter / was ther noon vnder the Sonne
fful many a riche contree hadde he wonne
Line 864
That with his wysdom / and his chiualrie
He conquered / al the regne of ffemenye
That whilom / was ycleped Scithia
And wedded[e] the queene ypolita
Line 868
And broghte hire hoom with hym in his contree
With muchel glorie / and greet solempnytee
And eek hir faire suster Emelye
And thus / with victorie and with melodye
Line 872
Lete I this noble duc / to Atthenes ryde
An al his hoost in Armes hym bisyde
¶ And certes / if it nere / to long to heere
I wolde yow haue toold / fully the manere
Line 876
How wonnen was the regne of ffemenye
By Theseus / and by his chiualrye
And of the grete bataille for the nones
Bitwixen Atthenes and Amazones
Line 880
And how asseged was ypolita
The faire hardy queene of Scithia
And of the feste / þat was at hir weddynge
And of the tempest / at hir hoom comynge
Line 884
But al that thyng I moot as now forbere
I haue god woot / a large feeld to ere
And wayke been / the Oxen in my Plough
The remenant of the tale / is long ynough
Line 888
I wol nat letten eek noon of this route
Page 27
Lat euery felawe / telle his tale aboute
And lat se now / who shal the soper wynne
And ther I lefte / I wol ayeyn bigynne
Line 892
This duc / of whom I make mencioun [¶ Narratio]
Whan he was come / almoost vn to the toun
In al his wele / and in his mooste pride
He was war / as he caste his eye aside
Line 896
Where that ther kneled in the weye
A compaignye of ladyes / tweye and tweye
Ech after oother / clad in clothes blake [folio 14b]
But swich a cry / and swich a wo they make
Line 900
That in this world / nys creature lyuynge
That herde / swich another waymentynge
And of this cry / they nolde neuere stenten
Til they / the reynes of his brydel henten
Line 904
¶ What folk been ye / that at myn hom comynge
Perturben so my feste / with criynge
Quod Theseus / haue ye so greet enuye
Of myn honour / þat thus compleyne and crye
Line 908
Or who hath yow / mysboden or offended
And telleth me / if it may been amended
And why / þat ye been / clothed thus in blak
¶ The eldeste lady of hem alle spak
Line 912
Whan she hadde swowned / with a deedly cheere
That it was routhe / for to seen and heere
And seyde lord / to whom ffortune hath yeuen
Victorie / and as a Conqueror to lyuen
Line 916
Nat greueth vs / youre glorie and youre honour
But we / biseken mercy and socour
Haue mercy on oure wo / and oure distresse
Som drope of pitee / thurgh thy gentillesse
Line 920
Vp on vs wrecched wommen / lat thou falle
ffor certes lord / ther is noon of vs alle
That she ne hath been / a duchesse / or a queene
Now be we caytyues / as it is wel seene
Line 924
Thanked be ffortune / and hire false wheel
Page 28
That noon estat assureth to be weel
And certes lord / to abyden youre presence
Heere in the temple / of the goddesse clemence
Line 928
We han ben waitynge / al this fourtenyght
Now help vs lord / sith it is in thy myght
¶ I wrecche / which þat wepe and crie thus
Was whilom wyf / to kyng Cappaneus
Line 932
That starf at Thebes / cursed be that day
And alle we that been in this array
And maken / al this lamentacioun
We losten / alle oure housbondes at that toun
Line 936
Whil that the seege / ther aboute lay
And yet now the olde Creon weylaway
That lord is now / of Thebes the Citee
ffulfild of Ire / and of Iniquitee
Line 940
He for despit and for his tirannye
To do the dede bodyes vileynye
Of alle oure lordes / whiche that been slawe
He hath alle the bodyes / on an heepe ydrawe
Line 944
And wol nat suffren hem / by noon assent
Neither to been yburyed nor ybrent
But maketh houndes / ete hem in despit [folio 15a]
And with that word / with outen moore respit
Line 948
They fillen gruf / and criden pitously
Haue on vs wrecched wommen som mercy
And lat oure sorwe / synken in thyn herte
¶ This gentil duc doun from his courser sterte
Line 952
With herte pitous / whan he herde hem speke
Hym thoughte / þat his herte wolde breke
Whan he saugh hem / so pitous and so maat
That whilom weren / of so greet estaat
Line 956
And in his Armes / he hem alle vp hente
And hem conforteth / in ful good entente
And swoor his ooth / as he was trewe knyght
He wolde doon / so ferforthly his myght
Line 960
Vp on the tiraunt Creon / hem to wreke
Page 29
That all the peple of Grece / sholde speke
How Creon / was of Theseus yserued
As he þat hadde / his deeth ful wel deserued
Line 964
And right anoon / with outen moore abood
His Baner he desplayeth and forth rood
To Thebesward / and al his hoost biside
No neer Atthenes / wolde he go ne ride
Line 968
Ne take his ese / fully half a day
But onward on his wey / that nyght he lay
And sente anon / ypolita the queene
And Emelye / hir yonge suster sheene
Line 972
Vn to the toun of Atthenes to dwelle
And forth he rit ther is namoore to telle
The rede statue of Mars / with spere and targe
So shyneth / in his white baner large
Line 976
That alle the feeldes / glyteren vp and doun
And by his Baner / born is his penoun
Of gold ful riche / in which ther was ybete
The Mynotaur / which þat he slough in Crete
Line 980
¶ Thus rit this duc thus rit this Conquerour
And in his hoost of Chiualrie the flour
Til þat he cam to Thebes and alighte
ffaire in a feeld / ther as he thoughte fighte
Line 984
But shortly / for to speken of this thyng
With Creon / which þat was of Thebes kyng
He faught / and slough hym manly as a knyght
In pleyn bataille / and putte the folk to flyght
Line 988
And by assaut he wan the Citee after
And rente adoun / bothe wall and sparre and rafter
And to the ladyes / he restored agayn
The bones / of hir housbondes that weren slayn
Line 992
To doon obsequies / as was tho the gyse
But it were al to longe / for to deuyse
The grete clamour / and the waymentynge [folio 15b]
That the ladyes made / at the brennynge
Line 996
Of the bodies / and the grete honour
Page 30
That Theseus / the noble Conquerour
Dooth to the ladyes / whan they from hym wente
But shortly for to telle / is myn entente
Line 1000
¶ Whan þat this worthy duc this Theseus
Hath Creon slayn / and wonne Thebes thus
Stille in that feeld / he took al nyght his reste
And dide with al the contree / as hym leste
Line 1004
¶ To ransake in the taas / of the bodyes dede
Hem for to strepe / of harneys and of wede
The pilours / diden bisynesse and cure
After the bataille and disconfiture
Line 1008
And so bifel / þat in the taas they founde
Thurgh girt with many a greuous blody wounde
Two yonge knyghtes / liggynge by and by
Bothe in oon Armes / wroght ful richely
Line 1012
Of whiche two / Arcita highte that oon
And that oother knyght / highte Palamon
Nat fully quyke / ne fully dede they were
But by here Cote Armures / and by hir gere
Line 1016
The heraudes / knewe hem best in special
As they þat weren / of the blood roial
Of Thebes / and of sustren two yborn
Out of the taas / the pilours han hem torn
Line 1020
And han hem caried / softe vn to the tente
Of Theseus / and ful soone he hem sente
To Atthenes / to dwellen in prison
Perpetuelly / he nolde no raunson
Line 1024
And whan this worthy duc hath thus ydon
He took his hoost and hoom he rood anon
With laurer crowned / as a Conquerour
And ther he lyueth / in ioye and in honour
Line 1028
Terme of [his] lyue / what nedeth wordes mo
And in a tour / in angwissh and in wo
This Palamon / and his felawe Arcite
ffor eueremoore / ther may no gold hem quite
Line 1032
¶ This passeth / yeer by yeer / and day by day
Page 31
Till it fil ones / in a morwe of May
That Emelye / þat fairer was to sene
Than is the lylie / vpon his stalke grene
Line 1036
And fressher than the May / with floures newe
ffor with the Rose colour stroof hire hewe
I noot which was the fyner of hem two
Er it were day / as was hir wone to do
Line 1040
She was arisen / and al redy dight
ffor May wole haue / no slogardrie a nyght
The seson / priketh / euery gentil herte [folio 16a]
And maketh hym / out of his slepe to sterte
Line 1044
And seith arys / and do thyn obseruance
This maked Emelye / haue remembrance
To doon honour to May / and for to ryse
Yclothed was she / fressh for to deuyse
Line 1048
Hir yelow heer / was broyded in a tresse
Bihynde hir bak / a yerde long I gesse
And in the gardyn / at the sonne vp riste
She walketh vp and doun / and as hire liste
Line 1052
She gadereth floures party / white and rede
To make a subtil gerland for hire hede
And as an Aungel / heuenysshly she soong
The grete tour / þat was so thikke and stroong
Line 1056
Which of the Castel / was the chief dongeon
Ther as the knyghtes / weren in prison
Of whiche I tolde yow / and tellen shal
Was euene ioynant to the gardyn wal
Line 1060
Ther as this Emelye / hadde hir pleyynge
Bright was the sonne / and cleer that morwenynge
And this Palamon / this woful prisoner
As was his wone / bi leue of his gayler
Line 1064
Was risen / and romed / in a chambre an heigh
In which / he al the noble Citee seigh
And eek the gardyn / ful of braunches grene
Ther as this fresshe Emelye the sheene
Line 1068
Was in hire walk and romed vp and doun
Page 32
This sorweful prisoner / this Palamoun
Goth in the chambre / romynge to and fro
And to hym self / compleynynge of his wo
Line 1072
That he was born / ful ofte he seyde allas
And so bifel / by auenture or cas
That thurgh a wyndow / thikke of many a barre
Of Iren / greet and square as any sparre
Line 1076
He cast his eye / vpon Emelya
And ther with al he bleynte and cride .A.
As though he stongen were vn to the herte
And with that cry / Arcite anon vp sterte
Line 1080
And seyde cosyn myn / what eyleth thee
That art so pale / and deedly on to see
Why cridestow / who hath thee doon offence
ffor goddes love / taak al in pacience
Line 1084
Oure prison / for it may noon oother be
Fortune / hath yeuen vs this Aduersitee
Som wikke aspect / or disposicion
Of Saturne / by sum constellacion
Line 1088
Hath yeuen vs this / al though we hadde it sworn
So stood the heuene / whan þat we were born
We moste endure / this is the short and playn [folio 16b]
¶ This Palamon answerde / and seyde agayn
Line 1092
Cosyn for sothe / of this opinion
Thow hast a veyn ymaginacion
This prison caused me nat for to crye
But I was hurt right now thurgh out myn eye
Line 1096
In to myn herte / that wol my bane be
The fairnesse / of that lady þat I see
Yond in the gardyn / romen to and fro
Is cause / of al my criyng and my wo
Line 1100
I noot wher she be / womman or goddesse
But Venus is it / soothly as I gesse
And ther with al / on knees doun he fil
And seyde Venus / if it be thy wil
Line 1104
Yow in this gardyn / thus to transfigure
Page 33
Bifore me / sorweful wrecche creature
Out of this prison / helpe þat we may scapen
And if so be / my destynee be shapen
Line 1108
By eterne word / to dyen in prison
Of oure lynage / haue som compassion
That is so lowe ybroght by tirannye
And with that word / Arcite gan espye
Line 1112
Wher as this lady / romed to and fro
And with that sighte / hir beautee hurte hym so
That if that Palamon / [was] wounded sore
Arcite is hurt as moche as he / or moore
Line 1116
And with a sigh / he seyde pitously
The fresshe beautee / sleeth me sodeynly
Of hire / that rometh / in the yonder place
And but I haue / hir mercy and hir grace
Line 1120
That I may seen hire / atte leeste weye
I nam but deed / ther is namoore to seye
¶ This Palamon / whan he tho wordes herde
Dispitously / he looked and answerde
Line 1124
Wheither seistow this / in ernest or in pley?
¶ Nay quod Arcite / in ernest by my fey
God helpe me so / me list ful yuele pleye
¶ This Palamon / gan knytte his browes tweye
Line 1128
It nere quod he to thee / no greet honour
ffor to be fals / ne for to be traitour
To me / þat am thy cosyn and thy brother
Ysworn ful depe / and ech of vs til oother
Line 1132
That neuere for to dyen in the peyne
Til þat deeth / departe shal vs tweyne
Neither of vs / in loue to hyndre oother
Ne in noon oother cas / my leeue brother
Line 1136
But þat thou sholdest trewely forthren me
In euery cas / as I shal forthren thee
This was thyn ooth / and myn also certeyn [folio 17a]
I woot right wel / thou darst it nat withseyn
Line 1140
Thus artow of my conseil out of doute
Page 34
And now / thow woldest falsly been aboute
To loue my lady / whom I loue and serue
And euere shal / til þat myn herte sterue
Line 1144
Nay certes false Arcite / thow shalt nat so
I loued hire first / and tolde thee my wo
As to my conseil / and to my brother sworn
To forthre me / as I haue toold biforn
Line 1148
ffor which / thou art ybounden as a knyght
To helpen me / if it lay in thy myght
Or elles artow fals / I dar wel seyn
¶ This Arcite / ful proudly spak ageyn
Line 1152
Thow shalt quod he / be rather fals than I
And thou art fals / I telle thee outrely
ffor paramour I loued hire first er thow
What wiltow seyn / thou wistest nat yet now
Line 1156
Wheither she be / a womman or goddesse
Thyn is / affeccion of hoolynesse
And myn is loue / as to a creature
ffor which / I tolde thee myn auenture
Line 1160
As to my cosyn / and my brother sworn
I pose / that thow louedest hire biforn
Wostow nat wel / the olde clerkes sawe
That / who shal yeue a louere any lawe [¶ Quis legem det amantibus.]
Loue is a gretter lawe / by my pan
Than may be yeue / of any erthely man
And therfore / positif lawe and swich decree
Is broken al day for loue in ech degree
Line 1168
A man moot nedes loue / maugree his heed
He may nat flee it thogh he sholde be deed
Al be she mayde / or wydwe / or elles wyf
And eek it is nat likly al thy lyf
Line 1172
To stonden in hir grace / namoore shal I
ffor wel thou woost thy seluen verraily
That thou and I / be dampned to prison
Perpetuelly / vs gayneth no raunson
Line 1176
We stryuen / as dide / the houndes for the boon
Page 35
They foughte al day / and yet hir part was noon
Ther cam a kyte / whil they weren so wrothe
And baar awey the boon / bitwixe hem bothe
Line 1180
And therfore / at the kynges court my brother
Ech man for hym self / ther is noon oother
Loue if thee list for I loue and ay shal
And soothly / leeue brother this is al
Line 1184
Heere in this prison / moote we endure
And euerich of vs / take his auenture
GReet was the strif / and long / bitwix hem tweye [folio 17b]
If that I hadde / leyser for to seye
Line 1188
But to theffect / it happed on a day
To telle it yow / as shortly as I may
A worthy duc that highte Perotheus
That felawe was / to duc Theseus
Line 1192
Syn thilke day / that they were children lite
Was come to Atthenes / his felawe to visite
And for to pleye / as he was won[t] to do
ffor in this world / he loued no man so
Line 1196
And he loued hym / als tendrely agayn
So wel they louede / as olde bookes sayn
That whan þat oon was deed / soothly to telle
His felawe wente / and soughte hym doun in helle
Line 1200
But of that storie / list me nat to write
Duc Perotheus / loued wel Arcite
And hadde hym knowe at Thebes yeer by yere
And finally / at requeste and preyere
Line 1204
Of Perotheus / with outen any raunson
Duc Theseus / hym leet out of prison
ffrely to goon / wher þat hym liste ouer al
In swich a gyse / as I you tellen shal
Line 1208
¶ This was the forward / pleynly for tendite
Bitwixen Theseus / and hym Arcite
That if so were / þat Arcite were yfounde
Euere in his lif / by day / or nyght or stounde
Line 1212
In any contree / of this Theseus
Page 36
And he were caught it was acorded thus
That with a swerd / he sholde lese his heed
Ther nas / noon oother remedie ne reed
Line 1216
But taketh his leue / and homward he him spedde
Lat hym be war / his nekke lith to wedde
¶ How greet a sorwe / suffreth now Arcite
The deeth he feeleth / thurgh his herte smyte
Line 1220
He wepeth / wayleth / crieth pitously
To sleen hym self / he waiteth priuely
He seyde allas / that day þat he was born
Now is my prison / worse than biforn
Line 1224
Now is me shape / eternally to dwelle
Nat in my purgatorie / but in helle
Allas / þat euere knew I Perotheus
ffor elles / hadde I. dwelled with Theseus
Line 1228
Yfetered in his prison eueremo
Thanne hadde I been in blisse and nat in wo
Oonly / the sighte of hire / whom þat I serue
Though þat I neuere / hir grace may deserue
Line 1232
Wolde han suffised / right ynough for me
O deere cosyn / Palamon quod he
Thyn is the victorie / of this auenture [folio 18a]
fful blisfully in prison maistow dure
Line 1236
In prison? certes nay / but in Paradys
Wel hath ffortune / y-turned thee the dys
That hast the sighte of hire / and I thabsence
ffor possible is / syn thou hast hire presence
Line 1240
And art a knyght a worthy and an able
That som cas / syn ffortune is chaungeable
Thow maist to thy desir / som tyme atteyne
But I / þat am exiled and bareyne
Line 1244
Of alle grace / and in so greet dispeir
That ther nys erthe / water / fir / ne eir
Ne creature / þat of hem maked is
That may me heele / or doon confort in this
Line 1248
Wel oughte I sterue / in wanhope and distresse
Page 37
ffarwel / my lif / my lust and my gladnesse
¶ Allas / why pleynen folk so in commune
Of puruieaunce of god / or of ffortune
Line 1252
That yeueth hem ful ofte / in many a gyse
Wel bettre / than they kan hem self deuyse
Som man desireth / for to han richesse
That cause is of his moerdre / or greet siknesse
Line 1256
And som man wolde / out of his prison fayn
That in his hous / is of his meynee slayn
Infinite harmes / been in this mateere
We witen nat what [thing] we preyen heere
Line 1260
We faren / as he that dronke is as a Mous
A dronke man woot wel / þat he hath an hous
But he noot which the righte wey is thider
And to a dronke man / the wey is slider
Line 1264
And certes / in this world so faren we
We seken faste / after felicitee
But we goon wrong ful often trewely
Thus may we seyn alle / and namely I
Line 1268
That wende / and hadde a greet opinion
That if I myghte / escapen from prison
Thanne hadde I been in ioye / and perfit heele
That now / I am exiled fro my wele
Line 1272
Syn þat I may nat seen you Emelye
I nam but deed / ther nys no remedye
¶ Vp on that oother syde / Palamon
Whan þat he wiste / Arcite was agon
Line 1276
Swich sorwe he maketh / þat the grete tour
Resouned / of his youlyng and clamour
The pure fettres / on his shynes grete
Weren / of his bittre salte teeres wete
Line 1280
Allas quod he / Arcita cosyn myn
Of al oure strif / god woot the fruyt is thyn
Thow walkest now in Thebes at thy large [folio 18b]
And of my wo / thow yeuest litel charge
Line 1284
Thou mayst / syn thou hast wysdom and manhede
Page 38
Assemblen / alle the folk / of oure kynrede
And make a werre / so sharpe on this Citee
That by som auenture / or som tretee
Line 1288
Thow mayst haue hire to lady and to wyf
ffor whom / þat I moste nedes lese my lyf
ffor / as by wey of possibilitee
Sith thou art at thy large / of prison free
Line 1292
And art a lord / greet is thyn auauntage
Moore than is myn / þat sterue here in a cage
ffor I moot wepe / and wayle whil I lyue
With al the wo / þat prison may me yeue
Line 1296
And eek with peyne / þat loue me yeueth also
That doubleth / al my torment / and my wo
Ther with / the fyr of Ialousie vp sterte
With Inne his brest and hente him by the herte
Line 1300
So woodly / that he lyk was to biholde
The Boxtree / or the Asshen dede and colde
¶ Thanne seyde he / o crueel gooddes þat gouerne
This world / with byndyng of youre word eterne
Line 1304
And writen in the table of Atthamaunt
Youre parlement and youre eterne graunt
What is mankynde / moore vn to you holde
Than is the sheepe / þat rouketh in the folde
Line 1308
ffor slayn is man / right as another beest
And dwelleth eek / in prison and arreest
And hath siknesse / and greet aduersitee
And ofte tymes / gilt[e]lees pardee
Line 1312
¶ What gouernance / is in this prescience
That gilt[e]lees / tormenteth Innocence
And yet encresseth this / al my penaunce
That man is bounden / to his observaunce
Line 1316
ffor goddes sake / to letten of his wille
Ther as a beest / may al his lust fulfille
And whan a beest is deed / he hath no peyne
But after his deeth / man moot wepe and pleyne
Line 1320
Though in this world / he haue care and wo
Page 39
With outen doute / it may stonden so
The answere of this / lete I to dyuynys
But well I woot þat in this world greet pyne ys
Line 1324
Allas / I se a serpent or a theef /
That many a trewe man / hath doon mescheef
Goon at his large / and where hym list may turne
But I moot been in prison / thurgh Saturne
Line 1328
And eek thurgh Juno / Ialous and eek wood
That hath destroyed / wel ny al the blood
Of Thebes / with hise waste walles wyde [folio 19a]
And venus / sleeth me on that oother syde
Line 1332
ffor Ialousie / and fere of hym Arcite
¶ Now wol I stynte of Palamon a lite
And lete hym / in his prison stille dwelle
And of Arcita / forth I wol yow telle
Line 1336
¶ The sonne passeth / and the nyghtes longe
Encressen double wise / the peynes stronge
Bothe / of the louere / and the prisoner
I noot which hath the wofuller mester
Line 1340
ffor shortly for to seyn / this Palamon
Perpetuelly / is dampned to prison
In cheynes and in fettres / to been deed
And Arcite / is exiled vpon his heed
Line 1344
ffor euere mo / as out of that contree
Ne neuere mo / he shal his lady see
NOw loueres / axe I now this question
Who hath the worse / Arcite / or Palamon?
Line 1348
That oon may seen his lady / day by day
But in prison / he moot dwelle alway
That oother / wher hym list may ride or go
But seen his lady / shal he neuere mo
Line 1352
Now demeth as yow list ye that kan
ffor I wol telle forth / as I bigan.
¶ Explicit prima Pars.
Page 40
¶ Sequitur pars secunda.
Whan that Arcite / to Thebes comen was
fful ofte a day / he swelte and seyde allas
Line 1356
ffor seen his lady / shal he neuere mo
And shortly / to concluden al his wo
So muche sorwe / hadde neuere creature
That is / or shal / whil þat the world may dure
Line 1360
His slepe / his mete / his drynke / is hym biraft
That lene he wexeth / and drye as is a shaft
Hise eyen holwe / and grisly to biholde
His hewe falow / and pale as Asshen colde
Line 1364
And solitarie he was / and euere allone
And waillynge al the nyght makynge his mone
And if he herde / song or Instrument
Thanne wolde he wepe / he myghte nat be stent
Line 1368
So feble eek were hise spiritz and so lowe
And chaunged so / that no man koude knowe
His speche nor his voys / though men it herde
And in his geere / for al the world he ferde
Line 1372
Nat oonly / lik the loueris maladye [folio 19b]
Of Hereos / but rather lyk Manye [¶ Mania]
Engendred / of humour malencolik
Biforn his owene Celle fantastik
Line 1376
And shortly / turned was al vp so doun
Bothe habit / and eek disposicioun
Of hym this woful louere daun Arcite
¶ What sholde I / al day of his wo endite
Line 1380
Whan he endured hadde / a yeer or two
This crueel torment and this peyne and woo
At Thebes in his contree / as I seyde
Vp on a nyght / in sleepe as he hym leyde
Line 1384
Hym thoughte / how that the wynged god Mercurie
Biforn hym stood / and bad hym to be murie
His slepy yerde / in hond he bar vprighte
An hat he werede / vp hise heris brighte
Line 1388
Page 41
Line 1388
Arrayed was this god / as I took keepe
As he was / whan þat Argus took his sleepe
And seyde hym thus / to Atthenes shaltou wende
Ther is thee shapen / of thy wo an ende
Line 1392
And with that word / Arcite wook and sterte
Now trewely / hou soore þat me smerte
Quod he / to Atthenes / right now wol I fare
Ne for the drede of deeth / shal I nat spare
Line 1396
To se my lady / that I loue and serue
In hire presence / I recche nat to sterue
¶ And with that word / he caughte a greet Mirour
And saugh / þat chaunged was al his colour
Line 1400
And saugh his visage / al in another kynde
And right anon / it ran hym in his mynde
That sith his face / was so disfigured
Of maladye / the which he hadde endured
Line 1404
He myghte wel / if þat he bar hym lowe
Lyue in Atthenes / eueremoore vnknowe
And seen his lady / wel ny day by day
And right anon / he chaunged his array
Line 1408
And cladde hym / as a poure laborer
And al allone / saue oonly a Squier
That knew his priuetee / and al his cas
Which was disgised / pourely as he was
Line 1412
To Atthenes / is he goon the nexte way
And to the court he wente vp on a day
And at the gate / he profreth his seruyse
To drugge and drawe / what so men wol deuyse
Line 1416
And shortly / of this matere for to seyn
He fil in office / with a Chamberleyn
The which þat dwellynge was with Emelye
ffor he was wys / and koude soone espye
Line 1420
Of euery seruant which that serueth here [folio 20a]
Wel koude he / hewen wode / and water bere
ffor he was yong / and myghty for the nones
And ther to / he was long / and big of bones
Line 1424
Page 42
Line 1424
To doon / that any wight / kan hym deuyse
A yeer or two / he was in this seruyse
Page of the chambre / of Emelye the brighte
And Philostrate / he seyde þat he highte
Line 1428
But half / so wel / biloued a man as he
Ne was ther neuere in Court of his degree
He was so gentil of his condicioun
That thurghout al the Court was his renoun
Line 1432
They seyden / that it were a charitee
That Theseus / wolde enhauncen his degree
And putten hym / in worshipful seruyse
Ther as he myghte / his vertu excercise
Line 1436
And thus / with Inne a while / his name is spronge
Bothe of hise dedes / and his goode tonge
That Theseus / hath taken hym so neer
That of his chambre / he made hym a Squier
Line 1440
And gaf him gold / to mayntene his degree
And eek men broghte hym / out of his contree
ffrom yeer to yeer / ful pryuely his rente
But honestly / and slyly he it spente
Line 1444
That no man wondred / how þat he it hadde
And thre yeer in this wise / his lif he ladde
And bar hym so / in pees / and eek in werre
Ther was no man / þat Theseus hath derre
Line 1448
And in this blisse / lete I now Arcite
And speke I wole / of Palamon a lite
IN derknesse and horrible / and strong prison
Thise seuen yeer / hath seten Palamon
Line 1452
fforpyned / what for wo / and for distresse
Who feeleth / double soor heuynesse
But Palamon / that loue destreyneth so
That wood out of his wit he goth for wo
Line 1456
And eek ther to / he is a prisoner
Perpetuelly / noght oonly / for a yer
¶ Who koude ryme in englyssh proprely
His martirdom / for sothe it am nat I.
Line 1460
Page 43
Line 1460
Therfore I passe / as lightly as I may
¶ It fel / that in the seuenthe yer in May
The thridde nyght as olde bookes seyn
That al this storie / tellen moore pleyn
Line 1464
Were it by auenture or / destynee
As whan a thyng is shapen / it shal be
That soone after the mydnyght Palamon
By helpyng of a freend / brak his prison
Line 1468
¶ And fleeth the Citee / faste as he may go [folio 20b]
ffor he hade yeue / his gayler drynke so
Of a Clarree maad / of a certeyn wyn
Of Nercotikes / and Opie of Thebes fyn [¶ Opium Thebaicum.]
That al that nyght thogh þat men wolde him shake
The gayler sleepe / he myghte nat awake
¶ And thus he fleeth / as faste as euere he may
The nyght was short and faste by the day
Line 1476
That nedes cost he moot hym seluen hyde
And til a groue / faste ther bisyde
With dredeful foot thanne stalketh Palamon
ffor shortly / this was his opinion ·
Line 1480
That in that groue / he wolde hym hyde al day
And in the nyght / thanne wolde he take his way
To Thebes ward / his freendes for to preye
On Theseus / to helpe him to werreye
Line 1484
And shortly / outher he wolde lese his lif
Or wynnen Emelye / vn to his wyf
This is theffect and his entente pleyn
¶ Now wol I turne / to Arcite ageyn
Line 1488
That litel wiste / how ny þat was his care
Til þat ffortune / had broght him in the snare
The bisy larke / messager of day
Salueth in hir song / the morwe gray
Line 1492
And firy Phebus / riseth vp so brighte
That al the Orient laugheth of the lighte
And with hise stremes / dryeth in the greues
The siluer dropes / hangynge on the leues
Line 1496
Page 44
Line 1496
And Arcita / that is in the court Roial
With Theseus / his Squier principal
Is risen / and looketh on the myrie day
And for to doon / his obseruaunce to May
Line 1500
Remembrynge / on the poynt of his desir
He on a Courser / startlynge as the fir
Is riden in to the feeldes / hym to pleye
Out of the Court were it a myle or tweye
Line 1504
And to the groue / of which þat I yow tolde
By auenture / his wey / he gan to holde
To maken hym / a gerland / of the greues
Were it of wodebynde / or hawethorn leues
Line 1508
And loude he song ayeyn the sonne shene
May / with alle thy floures and thy grene
Wel come be thou / faire fresshe May
In hope / þat I som grene gete may
Line 1512
And from his courser / with a lusty herte
In to a groue / ful hastily he sterte
And in a path / he rometh vp and doun
Ther as by auenture / this Palamon
Line 1516
Was in a bussh / that no man myghte hym se [folio 21a]
ffor soore aferd of his deeth / thanne was he
No thyng ne knew he / that it was Arcite
God woot he wolde haue trowed it ful lite
Line 1520
But sooth is seyd / go sithen many yeres
That feeld hath eyen / and the wode hath eres
It is ful fair / a man to bere hym euene
ffor al day / meeteth men at vnset steuene
Line 1524
fful litel woot Arcite of his felawe
That was so ny / to herknen al his sawe
ffor in the bussh / he sitteth now ful stille
¶ Whan þat Arcite / hadde romed al his fille
Line 1528
And songen al the roundel lustily
In to a studie / he fil al sodeynly
As doon thise loueres / in hir queynte geres
Now in the crope / now doun in the breres
Line 1532
Page 45
Line 1532
Now vp / now doun / as boket in a welle
Right as the friday / soothly for to telle
Now it shyneth / now it reyneth faste
Right so / kan geery Venus ouer caste
Line 1536
The hertes of hir folk / right as hir day
Is gereful / right so chaungeth she array
Selde is the friday / al the wowke ylike
¶ Whan þat Arcite had songe / he gan to sike
Line 1540
And sette hym doun / with outen any moore
Allas quod he / that day þat I was bore
How longe Iuno / thurgh thy crueltee
Woltow werreyen Thebes the Citee
Line 1544
Allas / ybroght is to confusion
The blood roial / of Cadme and Amphion [¶ Cadmus]
Of Cadmus / which þat was the firste man
That Thebes bulte / or first the toun bigan
Line 1548
And of the Citee / first was crouned kyng
Of his lynage am I / and his of spryng /
By verray ligne / as of the stok roial
And now I am / so caytyf / and so thral
Line 1552
That he / that is my mortal enemy
I serue hym / as his squier pourely
And yet / dooth Iuno me / wel moore shame
ffor I dar noght biknowe myn owene name
Line 1556
But ther as I / was wont to highte Arcite
Now highte I Philostrate / noght worth a myte
Allas thou felle Mars / allas Iuno
Thus hath youre Ire / oure kynrede al fordo
Line 1560
Saue oonly me / and wrecched Palamon
That Theseus / martireth in prison
And ouer al this / to sleen me outrely
Loue hath / his firy dart so brennyngly
Line 1564
Ystiked / thurgh my trewe careful herte [folio 21b]
That shapen was my deeth / erst than my sherte
Ye sleen me / with youre eyen Emelye
Ye been the cause / wherfore þat I dye
Line 1568
Page 46
Line 1568
Of al the remenant of myn oother care
Ne sette I nat the montance of a tare
So þat I koude / doon aught to youre plesaunce
And with that word / he fil doun in a traunce
Line 1572
A longe tyme / and after he vp sterte
¶ This Palamon / þat thoughte þat thurgh his herte
He felte a coold swerd / sodeynliche glyde
ffor Ire he quook / no lenger wolde he byde
Line 1576
And whan þat he / had herd Arcites tale
As he were wood / with face / deed and pale
He stirte hym vp / out of the buskes thikke
And seide Arcite / false traytour wikke
Line 1580
Now artow hent that louest my lady so
ffor whom þat I haue / al this peyne and wo
And art my blood / and to my conseil sworn
As I ful ofte / haue seyd thee heer biforn
Line 1584
And hast byiaped heere / duc Theseus
And falsly / chaunged hast / thy name thus
I wol be deed / or elles thou shalt dye
Thou shalt nat / loue my lady Emelye
Line 1588
But I wol loue hire oonly / and namo
ffor I am Palamon / thy mortal foo
And though þat I no wepene haue in this place
But out of prison / am astert by grace
Line 1592
I drede noght / þat outher thow shalt dye
Or thow ne shalt nat louen Emelye
Chees which thou wolt or thou shalt nat asterte
¶ This Arcite / with ful despitous herte
Line 1596
Whan he hym knew / and hadde his tale herd
As fiers as leon / pulled out his swerd
And seyde thus / by god þat sit aboue
Nere it / þat thou art sik and wood for loue
Line 1600
And eek þat thow no wepne hast in this place
Thou sholdest neuere / out of this groue pace
That thou ne sholdest dyen of myn hond
ffor I defye / the seurete and the bond
Line 1604
Page 47
Line 1604
Which that thou seist þat I haue maad to thee
What verray fool / thynk wel / þat loue is fre
And I wol loue hire / mawgree al thy myght
But for as muche / thou art a worthy knyght
Line 1608
And wilnest to darreyne hire by bataille
Haue heer my trouthe / tomorwe I wol nat faile
With oute wityng of any oother wight
That heere / I wol be founden as a knyght
Line 1612
And bryngen harneys / right ynough for thee [folio 22a]
And chese the beste / and leue the worste for me
And mete and drynke / this nyght wol I brynge
Ynough for thee / and clothes for thy beddynge
Line 1616
And if so be / that thou my lady wynne
And sle me in this wode / ther I am Inne
Thow mayst wel haue thy lady / as for me
¶ This Palamon answerde / I graunte it thee
Line 1620
And thus they been departed / til amorwe
Whan ech of hem / had leyd his feith to borwe
O Cupide / out of alle charitee
O regne / þat wolt no felawe haue with thee
Line 1624
fful sooth is seyd / þat loue ne lordshipe
Wol noght hir thankes / haue no felaweshipe
Wel fynden that Arcite and Palamon
Arcite is riden anon / vn to the toun
Line 1628
And on the morwe / er it were dayes light
fful priuely / two harneys hath he dight
Bothe suffisaunt and mete to darreyne
The bataille in the feeld / bitwix hem tweyne
Line 1632
And on his hors / allone as he was born
He carieth / al the harneys / hym biforn
And in the groue / at tyme and place yset
This Arcite / and this Palamon ben met
Line 1636
To chaungen / gan the colour in hir face
Right as the hunters / in the regne of Trace
That stondeth at the gappe with a spere
Whan hunted is / the leon and the bere
Line 1640
Page 48
Line 1640
And hereth hym / come russhyng in the greues
And breketh / bothe bowes / and the leues
And thynketh / heere cometh my mortal enemy
With oute faile / he moot be deed / or I
Line 1644
ffor outher / I moot sleen hym at the gappe
Or he moot sleen me / if þat me myshappe
So ferden they / in chaungyng of hir hewe
As fer / as euerich of hem oother knewe
Line 1648
¶ Ther nas no good day ne no saluyng
But streight with outen word / or rehersyng
Euerich of hem / heelpe for to armen oother
As freenly / as he were his owene brother
Line 1652
And after that with sharpe speres stronge
They foynen ech at oother wonder longe
Thou myghtest wene / that this Palamon
In his fightyng were [as] a wood leon
Line 1656
And as a crueel Tigre was Arcite
As wilde bores / gonne they to smyte
That frothen whit as foom / for Ire wood
Vp to the Anclee / foghte they in hir blood
Line 1660
¶ And in this wise / I lete hem fightyng dwelle [folio 22b]
And forth I wole / of Theseus yow telle
The destinee / Ministre general
That executeth / in the world ouer al
Line 1664
The purueiaunce / that god hath seyn biforn
So strong it is / þat though the world had sworn
The contrarie of a thyng by ye or nay
Yet somtyme / it shal fallen on a day
Line 1668
That falleth nat eft with Inne a thousand yeere
ffor certeinly / oure appetites heere
Be it of werre / or pees / or hate / or loue
Al is this reuled / by the sighte aboue
Line 1672
¶ This mene I now / by myghty Theseus
That for to hunten / is so desirus
And namely / at the grete hert in May
That in his bed / ther daweth hym no day
Line 1676
Page 49
Line 1676
That he nys clad / and redy for to ryde
With hunte and horn / and houndes hym bisyde
ffor in his huntyng . hath he swich delit
That it is / al his ioye and appetit
Line 1680
To been hym self / the grete hertes bane
ffor after Mars / he serueth now dyane
¶ Cleer was the day / as I haue toold er this
And Theseus / with alle ioye and blis
Line 1684
With his ypolita / the faire queene
And Emelye / clothed al in grene
On huntyng be they riden roially
And to the groue / that stood ful faste by
Line 1688
In which ther was an hert as men hym tolde
Duc Theseus / the streighte wey hath holde
And to the launde / he rideth hym ful right/
ffor thider was the hert wont haue his flight
Line 1692
And ouer a brook / and so forth in his weye
This duc . wol han a cours at hym or tweye
With houndes / swiche as hym list comaunde
¶ And whan this duc was come vn to the launde
Line 1696
Vnder the sonne he looketh / and anon
He was war / of Arcite and Palamon
That foughten breme / as it were bores two
The brighte swerdes / wenten to and fro
Line 1700
So hidously / that with the leeste strook
It semed / as it wolde fille an ook
But what they were / no thyng he ne woot
This duc his courser / with his spores smoot
Line 1704
And at a stert he was bitwix hem two
And pulled out a swerd / and cride hoo
Namoore / vp on peyne of lesynge of youre heed
By myghty Mars / he shal anon be deed
Line 1708
That smyteth any strook . that I may seen [folio 23a]
But telleth me / what mystiers men ye been
That been so hardy / for to fighten heere
With outen Iuge / or oother Officere
Line 1712
Page 50
Line 1712
As it were / in a lystes roially
¶ This Palamon / answerde hastily
And seyde / sire / what nedeth wordes mo
We haue / the deeth / disserued bothe two
Line 1716
Two woful wrecches been we / two caytyues
That been encombred / of oure owene lyues
And as thou art a rightful lord and Iuge
Ne yeue vs / neither mercy ne refuge
Line 1720
But sle me first for seinte charitee
But sle my felawe eek as wel as me
Or sle hym first . for though thow knowest it lite
This is thy mortal foo / this is Arcite
Line 1724
That fro thy lond / is banysshed on his heed
ffor which / he hath deserued to be deed
ffor this is he / þat cam vn to thy gate
And seyde / þat he highte Philostrate
Line 1728
Thus hath he iaped thee / ful many a yer
And thou hast maked hym thy chief Squier
And this is he / that loueth Emelye
ffor sith the day is come / þat I shal dye
Line 1732
I make pleynly / my confession
That I am / thilke woful Palamon
That hath / thy prison broken wikkedly
I am thy mortal foo / and it am I
Line 1736
That loueth so hoote / Emelye the brighte
That I wol dye / present in hir sighte
Therfore I axe deeth / and my Iuwise
But sle my felawe / in the same wise
Line 1740
ffor bothe / han we deserued to be slayn
¶ This worthy duc answerde anon agayn
And seyde / this is a short conclusion
Youre owene mouth / by youre confession
Line 1744
Hath dampned yow / and I wol it recorde
It nedeth noght / to pyne yow with the corde
Ye shal be deed / by myghty Mars the rede
¶ The queene anon / for verray wommanhede
Line 1748
Page 51
Line 1748
Gan for to wepe / and so dide Emelye
And alle the ladyes / in the compaignye
Greet pitee was it as it thoughte hem alle
That euere / swich a chaunce sholde falle
Line 1752
ffor gentil men they were / of greet estaat
And no thyng but for loue was this debaat
And saugh hir blody woundes / wyde and soore
And alle crieden / bothe lasse and moore
Line 1756
Haue mercy Lord / vp on vs wommen alle [folio 23b]
And on hir bare knees / adoun they falle
And wolde haue kist his feet ther as he stood
Til at the laste / aslaked was his mood
Line 1760
ffor pitee / renneth soone in gentil herte
And though / he first for Ire quook and sterte
He hath considered / shortly in a clause
The trespas of hem bothe / and eek the cause
Line 1764
And al though þat his Ire / hir gilt accused
Yet in his reson / he hem bothe excused
And thus / he thoghte wel þat euery man
Wol helpe hym self in loue / if that he kan
Line 1768
And eek deliuere hym self / out of prison
And eek his herte hadde compassion
Of wommen / for they wepen euere in oon
And / in his gentil herte / he thoughte anon
Line 1772
And softe vn to hym self / he seyde fy s
Vp on a lord / that wol haue no mercy [¶ Notate domini.]
But been a leon / bothe in word and dede
To hem / þat been in repentance and drede
Line 1776
As wel / as to a proud despitous man
That wol maynteyne / that he first bigan
That lord / hath litel of discrecion
That in swich cas / kan no diuision
Line 1780
But weyeth / pride and humblesse after oon
And shortly / whan his Ire / is thus agoon
He gan to looken vp / with eyen lighte
And spak thise same wordes / al on highte
Line 1784
Page 52
Line 1784
¶ The god of loue / A benedicite
How myghty / and how greet a lord is he
Ayeyns his myght ther gayneth none obstacles
He may be cleped a god / for hise myracles
Line 1788
ffor he kan maken / at his owene gyse
Of euerich herte / as þat hym list diuyse
Lo heere this Arcite / and this Palamon
That quitly weren / out of my prison
Line 1792
And myghte / han lyued in Thebes roially
And witen / I am hir mortal enemy
And þat hir deth / lith in my myght also
And yet hath loue / maugree hir eyen two
Line 1796
[Y-]Broght hem hyder / bothe for to dye
Now looketh / is nat that an heigh folye
¶ Who may [nat] been a fole / but if he loue
Bihoold / for goddes sake þat sit aboue
Line 1800
Se how they blede / be they noght wel arrayed
Thus hath hir lord / the god of loue ypayed
Hir wages / and hir fees / for hir seruyse
And yet they wenen / for to been ful wyse
Line 1804
That seruen loue / for aught that may bifalle [folio 24a]
But this is yet the beste game of alle
That she / for whom they han this Iolitee
Kan hem ther fore / as muche thank / as me
Line 1808
She woot namoore / of al this hoote fare
By god / than woot a Cokkow of an hare
But all moot ben assayed / hoot and coold
A man moot ben a fool / or yong or oold
Line 1812
I woot it by my self / ful yore agon
ffor in my tyme / a seruant was I oon
And therfore / syn I knowe of loues peyne
And woot hou soore / it kan a man distreyne
Line 1816
As he / þat hath / ben caught ofte in his laas
I yow foryeue / al hoolly this trespaas
At requeste of the queene / þat kneleth heere
And eek of Emelye / my suster deere
Line 1820
Page 53
Line 1820
And ye shul bothe / anon vn to me swere
That neuere mo / ye shal my contree dere
Ne make werre vp on me nyght ne day
But been my freendes / in al that ye may
Line 1824
I yow foryeue / this trespas euery deel
And they him sworen / his axyng faire and weel
And hym of lordshipe / and of mercy preyde
And he hem graunteth grace / and thus he seyde
Line 1828
TO speke / of roial lynage and richesse
Though þat she were a queene or a princesse
Ech of you bothe / is worthy doutelees
To wedden whan tyme is doutelees
Line 1832
I speke / as for my suster Emelye
ffor whom ye haue / this strif and Ialousye
Ye woot your self she may nat wedden two
Atones / though ye fighten eueremo
Line 1836
That oon of you / al be hym looth or lief/
He moot[e] pipen / in an yuy leef
This is to seyn / she may nat now han bothe
Al be ye neuer so Ialouse / ne so wrothe
Line 1840
And for thy / I yow putte in this degree
That ech of yow / shal haue his destynee
As hym is shape / and herkneth in what wyse
Lo heere your ende / of that I shal deuyse
Line 1844
My wyl is this / for plat conclusion
With outen / any repplicacion
If that you liketh / take it for the beste
That euerich of you / shal goon where hym leste
Line 1848
ffrely / with outen raunson / or daunger
And this day fifty wykes / fer ne ner
Euerich of you / shal brynge an hundred knyghtes
Armed for lystes / vp at alle rightes
Line 1852
¶ Al redy / to darreyne hire by bataille [folio 24b]
And this bihote I yow / with outen faille
Vp on my trouthe / and as I am a knyght
That wheither of yow bothe þat hath myght
Line 1856
Page 54
Line 1856
This is to seyn / that wheither he or thow
May with his hundred / as I spak of now
Sleen his contrarie / or out of lystes dryue
Thanne shal I yeue / Emelya to wyue
Line 1860
To whom þat ffortune / yeueth so fair a grace
Tho lystes / shal I maken in this place
And god so wisly / on my soule rewe
As I shal euene Iuge been and trewe
Line 1864
Ye shul noon oother ende / with me maken
That oon of yow / ne shal be deed or taken
And if yow thynketh / this is weel ysayd
Seyeth youre auys / and holdeth you apayd
Line 1868
This is youre ende / and youre conclusion
¶ Who looketh lightly now / but Palamon
Who spryngeth vp for ioye / but Arcite
Who kouthe telle / or who kouthe endite
Line 1872
The ioye / þat is maked in the place
Whan Theseus / hath doon so fair a grace
But doun on knees / wente every maner wight
And thonken hym / with al hir herte and myght
Line 1876
And namely the Thebans often sithe
And thus with good hope / and with herte blithe
They taken hir leue / and homward gonne they ride
To Thebes / with hise olde walles wyde
Line 1880
¶ Explicit secunda pars
¶ Sequitur pars tercia
I trowe / men wolde deme it necligence
If I foryete / to tellen the dispence
Of Theseus / that gooth so bisily
To maken vp / the lystes roially
Line 1884
That swich a noble Theatre / as it was
I dar wel seyn / in this world ther nas
The circuit / a myle was aboute
Walled of stoon / and dyched al with oute
Line 1888
Round was the shape / in manere of compaas
Page 55
fful of degrees / the heighte of sixty pas
That whan a man / was set / on o degree
He lette nat his felawe for to see
Line 1892
¶ Estward / ther stood a gate of Marbul whit/
Westward right swich another in the opposit
¶ And shortly to concluden / swich a place [folio 25a]
Was noon in erthe / as in so litel space
Line 1896
ffor in the lond / ther was no crafty man
That geometrie or Ars Metrik kan
Ne portreitour / ne keruere of ymages
That Theseus / ne yaf [hem] mete and wages
Line 1900
The Theatre / for to maken and deuyse
And for to doon / his ryte and sacrifise
He Estward / hath vp on the gate aboue
In worshipe of Venus goddesse of loue
Line 1904
Doon make an Auter / and an Oratorie
And on the westward / in memorie
Of Mars / he maked hath right swich another
That coste largely / of gold a fother
Line 1908
And Northward / in a Touret / on the wal
Of Alabastre whit and reed coral
An Oratorie / riche for to see
In worshipe of Dyane of Chastitee
Line 1912
Hath Theseus doon wroght in noble wyse
¶ But yet hadde I foryeten to deuyse
The noble keruyng and the portreitures
The shape / the contenaunce and the figures
Line 1916
That weren / in thise Oratories thre
¶ ffirst in the temple of Venus / maystow se
Wroght on the wal / ful pitous to biholde
The broken slepes / and the sikes colde
Line 1920
The sacred teeris / and the waymentynge
The firy strokes / and the desirynge
That loues seruauntz / in this lyf enduren
The othes / that her couenantz assuren
Line 1924
Plesaunce and hope / desir foolhardynesse
Page 56
Beautee and youthe / bauderie richesse
Charmes and force / lesynges flaterye
Despense / bisynesse and Ialousye
Line 1928
That wered of yelewe gooldes a gerland
And a Cokkow / sittynge on hir hand
ffestes / Instrumentz / caroles daunces
Lust and array / and alle the circumstaunces
Line 1932
Of loue / whiche þat I rekned haue / and rekne shal
By ordre / weren peynted on the wal
And mo / than I kan make of mencion
ffor soothly / al the mount of Citheron
Line 1936
Ther Venus / hath hir principal dwellynge
Was shewed on the wal / in portreyynge
With al the gardyn / and the lustynesse
Nat was foryeten / the Porter ydelnesse
Line 1940
Ne Narcisus the faire / of yore agon
And yet the folye / of kyng Salamon
¶ And eek the grete strengthe of Ercules [folio 25b]
Thenchauntementz of Medea and Circes
Line 1944
Ne of Turnus / with the hardy fiers corage
The riche Cresus / kaytyf / in seruage
Thus may ye seen / þat wysdom ne richesse
Beautee ne sleighte / strengthe hardynesse
Line 1948
Ne may with Venus / holde champartie
ffor as hir list the world than may she gye
Lo alle thise folk so caught were in hir las
Til they for wo / ful ofte seyde allas
Line 1952
Suffiseth heere / ensamples oon or two
And though / I koude rekene a thousand mo
The statue of Venus / glorious for to se
Was naked / fletynge in the large see
Line 1956
And fro the nauele doun / al couered was
With wawes grene / and brighte as any glas
A Citole / in hir right hand / hadde she
And on hir heed / ful semely for to se
Line 1960
A Rose gerland fressh / and wel smellynge
Page 57
Aboue hir heed / hir dowues flikerynge
Biforn hire / stood hir sone Cupido
Vp on his shuldres / wynges hadde he two
Line 1964
And blynd he was / as it was often seene
A bowe he bar / and Arwes brighte and kene
¶ Why sholde I noght / as wel eek telle yow al
The portreiture / that was vp on the wal
Line 1968
With Inne the temple / of myghty Mars the rede
Al peynted was the wal / in lengthe and brede
Lyk to the estres / of the grisly place
That highte the grete temple of Mars in Trace
Line 1972
In thilke colde / frosty Region
Ther as Mars / hath his souereyn mansion
¶ ffirst on the wal / was peynted a forest
In which ther dwelleth / neither man ne best
Line 1976
With knotty knarry / bareyne trees olde
Of stubbes sharpe / and hidouse to biholde
In which ther ran / a rumbel and a swough
As though a storm / sholde bresten euery bough
Line 1980
And dounward from an hille / vnder a bente
Ther stood the temple of Mars Armypotente
Wroght al of burned steel / of which the entree
Was long and streit and gastly for to see [.i. impetus]
Line 1984
And ther out came a rage / and suche a veze
That it made / al the gate for to rese
The Northren lyght in at the dores shoon
ffor wyndowe / on the wal ne was ther noon
Line 1988
Thurgh which men myghten / any light discerne
The dore was al / of Adamant eterne
Yclenched / ouerthwart and endelong [folio 26a]
With Iren tough / and for to make it strong
Line 1992
Euery pyler the temple to sustene
Was tonne greet of Iren bright and shene
¶ Ther saugh I first the dirke ymaginyng
Of felonye / and the compassyng
Line 1996
The crueel Ire / reed as any gleede
Page 58
The pykepurs / and the pale drede
The smylere / with the knyfe vnder the cloke
The shepne / brennynge / with the blake smoke
Line 2000
The treson / of the mordrynge in the bedde
The open werre / with woundes al bibledde
Contek with blody knyf and sharpe manace
Al ful of chirkyng. was that sory place
Line 2004
¶ The sleere of hym self / yet saugh I ther
His herte blood / hath bathed al his heer
The nayl ydryuen / in the shode a nyght
The colde deeth / with mouth gapyng vp right
Line 2008
Amyddes of the temple / sat meschaunce
With disconfort and sory contenaunce
¶ Yet saugh I woodnesse / laughynge in his rage
Armed compleint out hees / and fiers outrage
Line 2012
The careyne in the busk with throte ycorue
A thousand slayn / and nat oon of qualm ystorue
The tiraunt with the pray by force yraft
The toun destroyed / ther was no thy[ng laft [[in a later hand]] ]
¶ Yet saugh I brent the shippes hoppesteres
The hunte strangled / with the wilde beres
The sowe / freten the child right in the Cradel
The Cook yscalded / for al his longe ladel
Line 2020
¶ Noght was foryeten / by the Infortune of Marte
The Cartere / ouer ryden with his Carte
Vnder the wheel / ful lowe / he lay adoun
¶ Ther were also / of Martes diuisioun
Line 2024
The laborer / and the Bocher and the Smyth
That forgeth sharpe swerdes on his Styth
¶ And al aboue / depeynted in a tour
Saugh I Conquest sittynge in greet honour
Line 2028
With the sharpe swerd / ouer his heed
Hangynge / by a soutil twynes threed
¶ Depeynted was / the slaughtre of Iulius
Of grete Nero / and of Antonius
Line 2032
Al be þat thilke tyme / they were vnborn
Page 59
Yet was hir deth / depeynted ther biforn
By manasynge of Mars / right by figure
So was it shewed in that portreiture
Line 2036
As is depeynted / in the Certres aboue
Who shal be slayn / or elles deed for loue
Suffiseth oon ensample in stories olde [folio 26b]
I may nat rekene hem alle though I wolde
Line 2040
The Statue of Mars / vp vn a Carte stood
Armed / and looked grym as he were wood
And ouer his heed / ther shynen two figures
Of sterres / that been cleped in scriptures
Line 2044
That oon Puella / that oother Rubeus
This god of Armes / was arrayed thus
A wolf ther stood / biforn hym at his feet
With eyen rede / and of a man he eet
Line 2048
With soutil pencel / was depeynted this storie
In redoutynge / of Mars and of his glorie
NOw / to the temple / of Dyane the chaste
As shortly as I kan I wol me haste
Line 2052
To telle yow / al the descripsioun
Depeynted been the walles vp and doun
Of huntyng / and of shamefast chastitee
¶ Ther saugh I / how woful Calistopee
Line 2056
Whan þat Diane / agreued was with here
Was turned / from a womman to a Bere
And after was she maad the loode sterre [¶ Vrsa maior]
Thus was it peynted / I kan sey yow no ferre
Line 2060
Hir sone is eek a sterre as men may see
¶ Ther saugh I Dane / yturned til a tree
I mene nat the goddesse Diane
But Penneus doughter / which þat highte Dane
Line 2064
¶ Ther saugh I Attheon / an hert ymaked
ffor vengeance / þat he saugh Diane al naked
I saugh / how þat hise houndes / haue hym caught
And freeten hym / for þat they knewe hym naught
Line 2068
¶ Yet peynted / [was] a litel forther moor
Page 60
How Atthalante / hunted the wilde boor
And Meleagree / and many another mo
ffor which Dyane / wroghte hym care and wo
Line 2072
¶ Ther saugh I / many another wonder storie
The whiche / me list nat drawen to memorie
¶ This goddesse on an hert ful wel hye seet
With smale houndes / al aboute hir feet
Line 2076
And vndernethe hir feet she hadde a moone
Wexynge it was / and sholde wanye soone
In gaude grene / hir statue clothed was
With bowe in honde / and Arwes in a cas
Line 2080
Hir eyen caste she / ful lowe adoun
Ther Pluto / hath his derke regioun
¶ A womman trauaillynge / was hire biforn
But for hir child / so longe was vnborn
Line 2084
fful pitously / Lucyna / gan she calle
And seyde helpe / for thou mayst best of alle
Wel koude he peynten lifly / that it wroghte [folio 27a]
With many a floryn / he the hewes boghte
Line 2088
NOw been the lystes maad / and Theseus
That at his grete cost / arrayed thus
The temples / and the Theatre euery deel
Whan it was doon / hym lyked wonder weel
Line 2092
But stynte I wole / of Theseus a lite
And speke of Palamon / and of Arcite
¶ The day approcheth / of hir retournynge
That euerich / sholde an hundred knyghtes brynge
Line 2096
The bataille to darreyne / as I yow tolde
And til Atthenes / hir couenantz for to holde
Hath euerich of hem / broght an hundred knyghtes
Wel armed for the werre / at alle rightes
Line 2100
And sikerly / ther trowed many a man
That neuere sithen / that the world bigan
As for to speke / of knyghthod of hir hond
As fer / as god hath maked see or lond
Line 2104
Nas of so fewe / so noble a compaignye
Page 61
ffor euery wight that louede chiualrye
And wolde his thankes / han a passant name
Hath preyd / þat he myghte been of that game
Line 2108
And wel was hym / that ther to chosen was
ffor if ther fille tomorwe swich a caas
Ye knowen wel / þat euery lusty knyght
That loueth paramours / and hath his myght
Line 2112
Were it in Engelond / or elles where
They wolde hir thankes / wilnen to be there
To fighte for a lady / benedicitee
It were a lusty sighte / for to see
Line 2116
¶ And right so / ferden they with Palamon
With hym / ther wenten knyghtes many on
Som wol ben armed in an haubergeon
And in bristplate / and in a light gypon
Line 2120
And somme woln haue / a paire plates large
And somme woln haue / a Pruce sheeld / or a targe
Somme woln ben armed / on hir legges weel
And haue an Ax / and somme a Mace of steel
Line 2124
Ther is no newe gyse / that it nas old
Armed were they / as I haue yow told
Everych / after his opinion
Ther maistow seen / comynge with Palamon
Line 2128
Lygurge hym self the grete kyng of Trace
Blak was his berd / and manly was his face
The cercles / of hise eyen in his heed
They gloweden / bitwyxen yelow and reed
Line 2132
And lik a grifphon / looked he aboute
With kempe heeris / on hise browes stoute
Hise lymes grete / hise brawnes harde and stronge [folio 27b]
Hise shuldres brode / hise armes rounde and longe
Line 2136
And as the gyse was in his contree
fful hye / vpon a Chaar of gold / stood [he [[in a later hand]] ]
With foure white boles in the trays
In stede of Cote Armure / ouer his harnays
Line 2140
With nayles yelewe / and brighte as any gold
Page 62
He hadde a Beres skyn / colblak / for old
His longe heer / was kembd / bihynde his bak
As any Rauenes fethere / it shoon for blak
Line 2144
A wrethe of gold arm greet / of huge wighte
Vpon his heed / set ful of stones brighte
Of fyne Rubyes / and of dyamauntz
Aboute his Chaar / ther wenten white Alauntz
Line 2148
Twenty and mo / as grete as any steer
To hunten at the leon or [[MS. or / or]] / the deer
And folwed hym / with mosel faste ybounde
Colered of gold / and tourettes fyled rounde
Line 2152
An hundred lordes / hadde he in his route
Armed ful wel / with hertes stierne and stoute
With Arcite / in stories as men fynde
The grete Emetreus / the kyng of Inde
Line 2156
Vp on a steede bay / trapped in steel
Couered in clooth of gold / dyapred weel
Cam ridynge / lyk the god of Armes Mars
His Cote Armure / was of clooth of Tars
Line 2160
Couched with perles / white and rounde and grete
His sadel / was of brend gold newe ybete
A Mantel [was] / vp on his shulder hangynge
Brat ful of Rubyes rede / as fyr sparklynge
Line 2164
His crispe heer / lyk rynges was yronne
And that was yelow / and glytered as the sonne
His nose was heigh / hise eyen bright citryn
Hise lippes rounde / his colour was sangwyn
Line 2168
A fewe frakenes / in his face yspreynd
Bitwixen yelow / and somdel blak ymeynd
And as a leon / he his lookyng caste
Of fyue and twenty yeer / his age I caste
Line 2172
His berd was wel bigonne for to sprynge
His voys / was as a trompe thondrynge
Vp on his heed / he wered of laurer grene
A gerland / fressh / and lusty for to sene
Line 2176
Vp on his hand / he bar for his deduyt
Page 63
An Egle tame / as any lilye whyt
An hundred lordes / hadde he with hym there
Al armed saue hir heddes / in al hir gere
Line 2180
fful richely / in alle maner thynges
ffor trusteth wel / þat dukes / Erles kynges
Were gadered / in this noble compaignye [folio 28a]
ffor loue / and for encrees of chiualrye
Line 2184
Aboute this kyng ther ran on euery part
fful many a tame leon / and leopard
And in this wise / thise lordes alle and some
Been on the Sonday to the Citee come
Line 2188
Aboute pryme / and in the toun alight
¶ This Theseus / this duc this worthy knyght
Whan he had broght hem / in to his Citee
And Inned hem / euerich in his degree
Line 2192
He festeth hem / and dooth so greet labour
To esen hem / and doon hem al honour
That yet men weneth / þat no maner wit
Of noon estaat ne koude amenden it
Line 2196
¶ The Mynstralcye / the seruice / at the feeste
The grete yiftes / to the meeste and leeste
The riche array / of Theseus paleys
Ne who sat first ne last vp on the deys
Line 2200
What ladyes fairest been / or best daunsynge
Or which of hem / kan dauncen best and synge
Ne who moost felyngly speketh of loue
What haukes / sitten on the perche aboue
Line 2204
What houndes / liggen in the floor adoun
Of al this / make I now no mencioun
But al theffect that thynketh me the beste
Now cometh the point and herkneth if yow leste
Line 2208
The sonday nyght er day bigan to sprynge
Whan Palamon / the larke herde synge
Al though it nere nat day / by houres two
Yet song the larke / and Palamon also
Line 2212
With hooly herte / and with an heigh corage
Page 64
He roos / to wenden on his pilgrymage
Vn to the blisful Citherea benigne
I mene Venus / honurable and digne
Line 2216
And in hir houre / he walketh forth a paas
Vn to the lystes / ther hire temple was
And doun he kneleth / with ful humble cheer
And herte soor / and seyde in this manere
Line 2220
Faireste of faire / o lady myn Venus [¶ The preyere of Palamon.]
Doughter to Ioue / and spouse of Vulcanus [¶ to Venus goddesse of loue.]
Thow gladere / of the Mount of Citheron
ffor thilke loue / thow haddest to Adoon
Line 2224
Haue pitee / of my bittre teeris smerte
And taak myn humble preyere at thyn herte
Allas / I ne haue / no langage to telle
Theffectes / ne the tormentz of myn helle
Line 2228
Myn herte / may myne harmes nat biwreye
I am so confus / that I kan noght seye
But mercy lady bright that knowest weele [folio 28b]
My thought and seest what harmes þat I feele
Line 2232
Considere al this / and rewe vp on my soore
As wisly / as I shal for eueremoore
Emforth my myght thy trewe seruant be
And holden werre / alwey with chastitee
Line 2236
That make I myn auow / so ye me helpe
I kepe noght of Armes for to yelpe
Ne I ne axe nat tomorwe to haue victorie
Ne renoun in this cas / ne veyne glorie
Line 2240
Of pris of Armes / blowen vp and doun
But I wolde haue / fully possessioun
Of Emelye / and dye in thy seruyse
ffynd thow the manere / hou and in what wyse
Line 2244
I recche nat / but it may bettre be
To haue victorie of hem / or they of me
So that I haue / my lady in myne Armes
ffor though so be / that Mars is god of Armes
Line 2248
Youre vertu is so greet in heuene aboue
Page 65
That if yow list I shal wel haue my loue
¶ Thy temple wol I worshipe eueremo
And on thyn Auter / where I ride or go
Line 2252
I wol doon sacrifice / and fires beete
And if ye wol nat so / my lady sweete
Thanne preye I thee / tomorwe / with a spere
That Arcita / me thurgh the herte bere
Line 2256
Thanne rekke I noght / whan I haue lost my lyf
Though that Arcita / wynne hire to his wyf
This is theffect and ende of my preyere
Yif me my loue / thow blisful lady deere
Line 2260
¶ Whan the orison / was doon of Palamon
His sacrifice he dide / and that anon
fful pitously / with alle circumstance
Al telle I noght as now / his obseruance
Line 2264
But atte laste / the statue of Venus shook /
And made a signe / wher by þat he took
That his preyere / accepted was that day
ffor thogh the signe / shewed a delay
Line 2268
Yet wiste he wel / þat graunted was his boone
And with glad herte / he wente hym hoom ful soone
The thridde houre in-equal that Palamon
Bigan / to Venus temple for to gon
Line 2272
Vp roos the sonne / and vp roos Emelye
And to the temple of Dyane gan hye
Hir maydens / þat she thider with hire ladde
fful redily / with hem the fyr they ladde
Line 2276
Thencens / the clothes / and the remenant al
That to the sacrifice / longen shal
The hornes fulle of Meeth / as was the gyse [folio 29a]
Ther lakked noght to doon hir sacrifise
Line 2280
¶ Smokynge the temple / ful of clothes faire
This Emelye / with herte debonaire
Hir body wessh / with water of a welle
But hou she dide hir ryte / I dar nat telle
Line 2284
But it be / any thing in general
Page 66
And yet it were a game / to heeren al
To hym þat meneth wel / it were no charge
But it is good / a man been at his large
Line 2288
¶ Hir brighte heer was kempd vntressed al
A coroune / of a grene ook / cerial
Vp on hir heed was set ful fair and meete
Two fyres / on the auter / gan she beete
Line 2292
And dide hir thynges / as men may biholde
In Stace of Thebes / and thise bookes olde
Whan kyndled was the fyr / with pitous cheere
Vn to Dyane / she spak as ye may heere
Line 2296
Ochaste goddesse / of the wodes grene [¶ The preyere of Emelye / to]
To whom bothe heuene and erthe and see is sene
Queene of the regne of Pluto derk / and lowe [dyane goddesse of Maydens.]
Goddesse of maydens / that myn herte hast knowe
Line 2300
fful many a yeer / and woost what I desire
As keepe me / fro thy vengeance and thyn Ire
That Attheon / aboughte cruelly
Chaste goddesse / wel wostow þat I
Line 2304
Desire / to ben a mayden al my lyf
Ne neuere wol I be no loue ne wyf
I am thow woost yet of thy compaignye
A mayde / and loue huntynge and venerye
Line 2308
And for to walken / in the wodes wilde
And noght to ben a wyf / and be with childe
Noght wol I knowe / the compaignye of man
Now helpe me lady / sith ye may and kan
Line 2312
ffor tho thre formes / þat thou hast in thee
And Palamon / that hath swich loue to me
And eek Arcite / that loueth me so soore
This grace I preye thee with oute moore
Line 2316
And sende loue and pees / bitwixe hem two
And fro me / turne awey hir hertes so
That al hire hoote loue / and hir desir
And al hir bisy torment and hir fir
Line 2320
Be queynt or turned / in another place
Page 67
And if so be / thou wolt do me no grace
And if my destynee / be shapen so
That I shal nedes haue oon of hem two
Line 2324
As sende me hym / þat moost desireth me
Bihoold goddesse / of clene chastitee
The bittre teeris / that on my chekes falle [folio 29b]
Syn thou art mayde / and kepere of vs alle
Line 2328
My maydenhede thou kepe and wel conserue
And whil I lyue / a mayde I wol thee serue
¶ The fires brenne / vp on the Auter cleere
Whil Emelye / was thus in hir preyere
Line 2332
But sodeynly / she saugh a sighte queynte
ffor right anon / oon of the fyres queynte
And quyked agayn / and after that anon
That oother fyr was queynt and al agon
Line 2336
And as it queynte / it made a whistlynge
As doon thise wete brondes in hir brennynge
And at the brondes ende / out ran anon
As it were / blody dropes many oon
Line 2340
ffor which / so soore agast was Emelye
That she was wel ny mad and gan to crye
ffor she ne wiste / what it signyfied
But oonly for the feere / thus hath she cried
Line 2344
And weepe / that it was pitee for to heere
And ther with al / Dyane gan appeere
With bowe in honde / right as an hunteresse
And seyde doghter / stynt thyn heuynesse
Line 2348
Among the goddes hye / it is affermed [¶ The answere of Dyane]
And by eterne word / writen and confermed [¶ to Emelye.]
Thou shalt ben wedded vn to oon of tho
That han for thee / so muchel care and wo
Line 2352
But vn to which of hem / I may nat telle
ffarwel / for I ne may no lenger dwelle
The fires / whiche that on myn Auter brenne
Shulle thee declare / er that thou go henne
Line 2356
Thyn auenture of loue / as in this cas
Page 68
And with that word / the Arwes in the Caas
Of the goddesse / clateren faste and rynge
And forth she wente / and made a vanysshynge
Line 2360
ffor which / this Emelye / astoned was
And seyde / what amounteth this Allas
I putte me / in thy proteccion
Dyane / and in thy disposicion
Line 2364
And hoom she goth anon the nexte weye
This is theffect ther is namoore to seye
The nexte houre of Mars folwynge this
Arcite / vn to the temple walked is
Line 2368
Of fierse Mars / to doon his sacrifise
With alle the rytes / of his payen wyse
With pitous herte / and heigh deuocion
Right thus to Mars / he seyde his orison
Line 2372
Ostronge god / that in the regnes colde [¶ The orison of Arcite]
Of Trace / honoured art and lord yholde [¶ to Mars god of Armes]
¶ And hast in euery regne / and euery lond [folio 30a]
Of armes / al the brydel in thyn hond
Line 2376
And hem fortunest as thee lyst deuyse
Accepte of me / my pitous sacrifise
If so be that my youthe may deserue
And þat my myght be worthy for to serue
Line 2380
Thy godhede / þat I may been oon of thyne
Thanne preye I thee / to rewe vp on my pyne
ffor thilke peyne / and thilke hoote fir
In which / thou whilom brendest for desir
Line 2384
Whan þat thow vsedest the beautee
Of faire yonge / fresshe Venus free
And haddest hire / in armes at thy wille
Al though thee ones / on a tyme mysfille
Line 2388
Whan Vulcanus / hadde caught thee in his las
And foond thee liggynge / by his wyf allas
ffor thilke sorwe / that was in thyn herte
Haue routhe as wel / vp on my peynes smerte
Line 2392
I am yong and vnkonnynge as thow woost
Page 69
And as I trowe / with loue offended moost
That euere was / any lyues creature
ffor she / þat dooth me / al this wo endure
Line 2396
Ne reccheth neuere / wher I synke or fleete
And wel I woot er she me mercy heete
I moot with strengthe / wynne hire in the place
And wel I woot withouten helpe or grace
Line 2400
Of thee / ne may my strengthe noght auaille
Thanne helpe me lord / tomorwe in my bataille
For thilke fyr / that whilom brente thee
As wel / as thilke fyr / now brenneth me
Line 2404
And do / that I tomorwe haue victorie
Myn be the trauaille / and thyn be the glorie
Thy souereyn temple / wol I moost honouren
Of any place / and alwey moost labouren
Line 2408
In thy plesance / and in thy craftes stronge
And in thy temple / I wol my baner honge
And alle the Armes of my compaignye
And euere mo / vn to that day I dye
Line 2412
Eterne fir / I wol biforn thee fynde
And eek to this auow / I wol me bynde
My beerd / myn heer / that hongeth long adoun
That neuere yet / ne felte offensioun
Line 2416
Of rasour / nor of shere / I wol thee yeue
And ben thy trewe seruant whil I lyue
Now lord haue routhe vp on my sorwes soore
Yif me the victorie / I aske thee namoore
Line 2420
The preyere stynt of Arcita the stronge
The rynges / on the temple dore that honge
And eek the dores / clatereden ful faste [folio 30b]
Of which Arcita / som what hym agaste
Line 2424
The fyres brenden / vp on the Auter brighte
That it gan / al the temple for to lighte
And sweete smel / the ground anon vp yaf
And Arcita / anon his hand vp haf
Line 2428
And moore encens / in to the fyr he caste
Page 70
With othere rytes mo / and atte last
The Statue of Mars / bigan his hauberk rynge
And with that soun / he herde a murmurynge
Line 2432
fful lowe and dym / and seyde thus / Victorie
ffor which / he yaf to Mars / honour and glorie
And thus with ioye / and hope wel to fare
Arcite anon / vn to his In is fare
Line 2436
As fayn as fowel / is of the brighte sonne
¶ And right anon / swich strif / ther is bigonne
For thilke grauntyng in the heuene aboue
Bitwixe Venus / the goddesse of love
Line 2440
And Mars / the stierne god Armypotente
That Iuppiter / was bisy it to stente
Til that the pale / Saturnus the colde
That knew so manye / of auentures olde
Line 2444
ffoond / in his olde experience and art
That he ful soone / hath plesed euery part
As sooth is seyd / elde hath greet auantage
In elde / is bothe wysdom and vsage
Line 2448
Men may the olde at renne / and noght at rede
Saturne anon / to stynten strif and drede
Al be it that it is / agayn his kynde
Of al this strif / he gan remedie fynde
Line 2452
¶ My deere doghter Venus / quod Saturne
My cours / that hath so wyde for to turne
Hath moore power / than woot any man
Myn is the drenchyng in the see so wan
Line 2456
Myn is the prison / in the derke cote
Myn is the stranglyng and hangyng by the throte
The murmure and the cherles rebellyng
The groynynge / and the pryuee empoysonyng
Line 2460
I do vengeance / and pleyn correccion
Whil[es] I dwelle / in signe of the leon
Myn is the ruyne / of the hye halles
The fallynge / of the toures / and of the walles
Line 2464
Vp on the Mynour / or the Carpenter
Page 71
I slow Sampson / shakynge the piler
And myne be / the maladyes colde
The derke tresons / and the castes olde
Line 2468
My lookyng is the fader of pestilence
Now weepe namoore / I shal doon diligence
That Palamon / that is thyn owene knyght [folio 31a]
Shal haue his lady / as thou hast him hight
Line 2472
Though Mars shal helpe his knyght yet nathelees
Bitwixe yow / ther moot be som tyme pees
Al be ye noght of o compleccion
That causeth al day swich diusion
Line 2476
I am thyn Aiel / redy at thy wille
Weepe now namoore / I wol thy lust fulfille
¶ Now wol I stynten / of the goddes above
Of Mars / and of Venus goddesse of love
Line 2480
And telle yow / as pleynly as I kan
The grete effect for which that I bygan
¶ Explicit tercia pars
¶ Sequitur pars quarta
GReet was the feeste / in Atthenes that day
And eek / the lusty seson of that May
Line 2484
Made euery wight / to been in such plesaunce
That al that Monday / Iusten they and daunce
And spenten it in Venus heigh seruyse
But by the cause / that they sholde ryse
Line 2488
Eerly / for to seen the grete fight
Vn to hir reste / wenten they at nyght
And on the morwe / whan þat day gan sprynge
Of hors and harneys / noyse and claterynge
Line 2492
Ther was in the hostelryes al aboute
And to the paleys / rood ther many a route
Of lordes / vp on steedes and palfreys
Ther maystow seen diuisynge of harneys
Line 2496
So vnkouth and so riche / and wroght so weel
Of goldsmythrye / of browdynge / and of steel
Page 72
The sheeldes brighte / testeres / and trappures
Gold hewen helmes / hauberkes / Cote Armures
Line 2500
Lordes in paramentz / on hir courseres
Knyghtes of retenue / and eek Squieres
Nailynge the speres / and helmes bokelynge
Giggynge of sheeldes / with layneres lacynge
Line 2504
There as nede is / they weren no thyng ydel
The fomy steedes / on the golden brydel
Gnawynge / and faste the Armurers also
With fyle and hamer prikynge to and fro
Line 2508
Yemen on foyte / and communes many oon
With shorte staues / thikke as they may goon
Pypes / trompes / Nakerers / Clariounes
That in the bataille / blowen blody sounes
Line 2512
The paleys / ful of peples vp and doun [folio 31b]
Heere thre / ther ten / holdynge hir question
Dyuynynge / of thise Thebane knyghtes two
Somme seyden thus / somme seyde it shal be so
Line 2516
Somme helden with hym / with the blake berd
Somme with the balled / somme with the thikke herd
Somme seyde / he looked grymme / and he wolde fighte
He hath a sparth / of twenty pound of wighte
Line 2520
Thus was the halle / ful of diuynynge
Longe after / that the sonne gan to sprynge
The grete Theseus / that of his sleepe awaked
With Mynstralcie / and noyse þat was maked
Line 2524
Heeld yet the chambre / of his Paleys riche
Til that the Thebane knyghtes / bothe yliche
Honured / were / in to the paleys fet
Duc Theseus / was at a wyndow set
Line 2528
Arrayed / right as he were a god in Trone
The peple / preesseth thiderward ful soone
Hym for to seen / and doon heigh reuerence
And eek to herkne / his heste and his sentence
Line 2532
¶ An heraud on a Scaffold made an Oo
Til al the noyse of peple was ydo
Page 73
And whan he saugh / the noyse of peple al stille
Tho shewed he / the myghty dukes wille
Line 2536
¶ The lord / hath of his heih discrecion
Considered / that it were destruccion
To gentil blood / to fighten in the gyse
Of mortal bataille / now in this emprise
Line 2540
Wherfore / to shapen / þat they shal nat dye
He wolde / his firste purpos modifye
¶ No man ther fore vp peyne of los of lyf
No maner shot polax ne short[e] knyf
Line 2544
In to the lystes sende / ne thider brynge
Ne short swerd for to stoke / with poynt bitynge
No man ne drawe / ne bere by his syde
Ne no man shal / vn to his felawe ryde
Line 2548
But o cours / with a sharpe ygrounde spere
ffoyne if hym list on foote / hym self to were
And he / that is at meschief shal be take
And noght slayn / but be broght vn to the stake
Line 2552
That shal ben ordeyned / on either syde
But thider he shal by force / and there abyde
¶ And if so be / the [[chi-ef-]] chieftayn be take
On outher syde / or elles sleen his make
Line 2556
No lenger/ shal the turneiynge laste
God spede you / gooth forth / and ley on faste
With long swerd / and with Maces / fighteth youre fille
Gooth now youre wey / this is the lordes will
Line 2560
The voys of peple / touched the heuene [folio 32a]
So loude cride they / with murie steuene
God saue swich a lord / that is so good
He wilneth no destruccion of blood
Line 2564
Vp goon the trompes / and the melodye
And to the lystes / rit the compaignye
By ordinance / thurgh out the Citee large
Hanged with clooth of gold and nat with sarge
Line 2568
¶ fful lik a lord / this noble duc gan ryde
Thise two Thebans / vp on either side
Page 74
And after rood / the queene and Emelye
And after that another compaignye
Line 2572
Of oon and oother / after hir degre
And thus they passen / thurgh out the Citee
And to the lystes / come they by tyme
It nas not of the day / yet fully pryme
Line 2576
Whan set was Theseus / ful riche and hye
Ypolita the queene and Emelye
And othere ladys / in degrees aboute
Vn to the seettes preesseth al the route
Line 2580
And westward / thurgh the gates vnder Marte [.i. sub Marte]
Arcite / and eek the hondred of his parte
With baner reed / is entred right anon
¶ And in that selue moment Palamon
Line 2584
Is vnder Venus / Estward in the place
With Baner whyt / and hardy chiere and face
In al the world / to seken vp and doun
So euene / with outen variacioun
Line 2588
Ther nere / swiche compaignyes tweye
ffor ther was noon so wys þat koude seye
That any hadde / of oother auauntage
Of worthynesse / ne of estaat ne age
Line 2592
So euene were [they] chosen / for to gesse
And in two renges / faire they hem dresse
¶ Whan þat hir names / rad were euerichon
That in hir nombre / gyle were ther noon
Line 2596
Tho were the gates shet and cried was loude
Do now youre deuoir / yonge knyghtes proude
¶ The heraudes / lefte hir prikyng vp and doun
Now ryngen trompes loude and clarioun
Line 2600
Ther is namoore to seyn / but west and Est
In goon the speres / ful sadly in arrest
In gooth the sharpe spore / in to the syde
Ther seen men / who kan Iuste and who kan ryde
Line 2604
Ther shyueren shaftes / vp on sheeldes thikke
He feeleth / thurgh the herte spoon the prikke
Page 75
Vp spryngen speres / twenty foot on highte
Out gooth the swerdes / as the siluer brighte
Line 2608
The helmes they tohewen / and toshrede [folio 32b]
Out brest the blood / with stierne stremes rede
With myghty maces / the bones they tobreste
He thurgh the thikkeste / of the throng gan threste
Line 2612
Ther semblen steedes stronge / and doun gooth al
He rolleth vnder foot as dooth a bal
He foyneth on his feet with his tronchon
And he hym hurtleth / with his hors adoun
Line 2616
He thurgh the body is hurt and sithen ytake
Maugree his heed / and broght vn to the stake
As forward was right ther he moste abyde
Another lad is / on that oother syde
Line 2620
¶ And som tyme / dooth hem Theseus to reste
Hem to fresshen / and drynken if hem leste
fful ofte a day / han thise Thebanes two
Togydre ymet and wroght his felawe wo
Line 2624
Vnhorsed hath / ech oother of hem tweye
Ther nas no Tygre in the vale of Galgopheye
Whan þat hir whelpe is stole / whan it is lite
So crueel on the hunte / as is Arcite
Line 2628
ffor Ielous herte / vpon this Palamon
Ne in Belmarye / ther nys so fel leon
That hunted is / or for his hunger wood
Ne of his praye / desireth so the blood
Line 2632
As Palamon / to sleen his foo Arcite
The Ielous strokes / on hir helmes byte
Out renneth blood / on bothe hir sydes rede
¶ Som tyme an ende / ther is of euery dede
Line 2636
ffor er the sonne / vn to the reste wente
The stronge kyng Emetreus / gan hente
This Palamon / as he faught with Arcite
And made his swerd / depe in his flessh to byte
Line 2640
And by the force of twenty / is he take
Vnyolden / and ydrawe vnto the stake
Page 76
And in the rescus / of this Palamon
The stronge kyng lygurge / is born adoun
Line 2644
And kyng Emetreus / for al his strengthe
Is born out of his sadel / a swerdes lengthe
So hitte him Palamon er he were take
But al for noght / he was broght to the stake
Line 2648
His hardy herte / myghte hym helpe naught
He moste abyde / whan that he was caught
By force / and eek by composicion
¶ Who sorweth now / but woful Palamon
Line 2652
That moot namoore / goon agayn to fighte
And whan þat Theseus / hadde seyn this sighte
Vn to the folk / þat foghten thus echon
He cryde / hoo namoore / for it is doon
Line 2656
¶ I wol be trewe Iuge / and no partie [folio 33a]
Arcite of Thebes / shal haue Emelie
That by his fortune / hath hire faire ywonne
Anon / ther is a noyse of peple bigonne
Line 2660
ffor Ioye of this / so loude and heighe with alle
It semed / that the lystes sholde falle
What kan now faire venus doon aboue
What seith she now / what dooth this queene of loue
But wepeth so / for wantynge of hir wille
Til that hir teeres / in the lystes fille
She seyde / I am ashamed doutelees
¶ Saturnus seyde / doghter hoold thy pees
Line 2668
Mars hath his wille / his knyght hath al his boone
And by myn heed / thow shalt been esed soone
The trompes / with the loude Mynstralcie
The heraudes / that ful loude yolle and crie
Line 2672
Been in hire wele / for Ioye of Daun Arcite
But herkneth me / and stynteth now a lite
Which a myracle / ther bifel anon
¶ This fierse Arcite / hath of his helm ydon
Line 2676
And on a Courser / for to shewe his face
He priketh endelong the large place
Page 77
Lokynge vpward vp on Emelye
And she agayn / hym caste a freendlich eye
Line 2680
. . . . .
. . . . . [no gap in the MS.]
And was al his [in] chiere / as in his herte
¶ Out of the ground / a furie Infernal sterte
Line 2684
ffrom Pluto sent at requeste of Saturne
ffor which his hors / for fere gan to turne
And leepe aside / and foundred as he leepe
And er that Arcite / may taken keepe
Line 2688
He pighte hym / on the pomel of his heed [¶ Nota periculum.]
That in the place he lay / as he were deed
His brest tobrosten / with his sadel bowe
As blak he lay / as any cole or crowe
Line 2692
So was the blood / yronnen in his face
Anon he was / yborn out of the place
With herte soor / to Theseus paleys
Tho was he koruen / out of his harneys
Line 2696
And in a bed ybrought / ful faire and blyve
ffor he was yet in memorie / and alyue
And alwey / criynge after Emelye
¶ Duc Theseus / with al his compaignye
Line 2700
Is comen hoom / to Atthenes his Citee
With alle blisse / and greet solempnitee
Al be it that this Auenture was falle
He nolde noght disconforten hem alle
Line 2704
Men seyde eek that Arcite shal nat dye
He shal been heeled / of his maladye
¶ And of another/ thyng / they weren as fayn [folio 33b]
That of hem alle / was ther noon yslayn
Line 2708
Al were they soore yhurt and namely oon
That with a spere / was thirled his brest boon
To othere woundes / and to broken armes
Somme hadden salues / and somme hadden charmes
Line 2712
ffermacies of herbes / and eek saue
They dronken / for they wolde hir lymes haue
Page 78
ffor which this noble duc as he wel kan
Conforteth / and honoureth euery man
Line 2716
And made reuel / al the longe nyght
Vn to the straunge lordes / as was right
Ne ther was holden / no disconfitynge
But as a Iustes / or a tourneiynge
Line 2720
ffor soothly / ther was no disconfiture
ffor fallyng / nys nat but an Auenture
Ne to be lad by force / vn to the stake
Vnyolden / and with twenty knyghtes take
Line 2724
O persone allone with outen mo
And haryed forth / by Arm[e] / foot and too
And eke his steede / dryuen forth with staues
With footmen / bothe yemen and eek knaues
Line 2728
It nas aretted hym no vileynye
Ther may no man / clepen it cowardye
¶ ffor which anon / duc Theseus leet crye
To stynten / alle rancour and enuye
Line 2732
The gree / as wel of o syde as of oother
And eyther syde ylik as ootheres brother
And yaf hem yiftes / after hir degree
And fully / heeld a feeste / dayes three
Line 2736
And conuoyed / the kynges worthily
Out of his toun / a Iournee largely
And hoom wente euery man the righte way
Ther was namoore / but fare wel / haue good day
Line 2740
Of this bataille / I wol namoore endite
But speke of Palamon and of Arcyte
Swelleth the brest of arcite / and the soore
Encreesseth at his herte / moore and moore
Line 2744
The clothered blood / for any lechecraft
Corrupteth / and is in his bouk ylaft
That neither veyne blood / ne ventusynge
Ne drynke of herbes / may ben his helpynge
Line 2748
The vertu expulsif / or Animal
ffro thilke vertu / cleped natural
Page 79
Ne may the venym / voyden ne expelle
The pipes of his longes / gonne to swelle
Line 2752
And euery lacerte / in his brest adoun
Is shent with venym and corrupcion
Hym gayneth neither for to gete his lif [folio 34a]
Vomyt vpward / ne dounward laxatif
Line 2756
Al is tobrosten / thilke Regioun
Nature hath now / no dominacioun
And certeinly / ther Nature wol nat wirche
ffare wel Phisik go ber the man to chirche
Line 2760
This al and som / that Arcita moot dye
ffor which / he sendeth / after Emelye
And Palamon / that was his cosyn deere
Thanne seyde he thus / as ye shal after heere
Line 2764
¶ Naught may / the woful spirit in myn herte
Declare o point of alle my sorwes smerte
To yow my lady / that I loue moost
But I biquethe / the seruyce of my goost
Line 2768
To yow / abouen euery creature
Syn þat my lyf / [it] may no lenger dure
Allas the wo / allas the peynes stronge
That I for yow haue suffred / and so longe
Line 2772
Allas the deeth / allas myn Emelye
Allas / departynge of our compaignye
Allas myn hertes queene / allas my wyf
Myn hertes lady / endere of my lyf/
Line 2776
What is this world / what asketh men to haue
Now with his loue / now in his colde graue
Allone / with outen any compaignye
ffare wel / my swete foo / myn Emelye
Line 2780
And softe taak me / in youre Armes tweye
ffor loue of god / and herkneth what I seye
I haue heer / with my cosyn Palamon
Had strif and rancour/ many a day agon
Line 2784
ffor loue of yow / and for my Ialousye
And Iuppiter / so wys my soule gye
Page 80
To speken / of a seruant proprely
With alle circumstances trewely
Line 2788
That is to seyn / trouthe / honour knyghthede
Wysdom / humblesse / estaat and heigh kynrede
ffredom / and al that longeth to that Art
So Iuppiter / haue of my soule part
Line 2792
As in this world / right now ne knowe I non
So worthy to ben loued as Palamon
That serueth yow / and wol doon al his lyf
And if that euere / ye shul ben a wyf
Line 2796
fforyet nat Palamon / the gentil man
And with that word / his speche faille gan
And from his herte / vp to his brest was come
The coold of deeth / that hadde hym ouercome
Line 2800
And yet moore ouer / for in hise Armes two
The vital strengthe is lost / and al ago
Oonly / the intellect with outen moore [folio 34b]
That dwelled in his herte / syk and soore
Line 2804
Gan faillen / when the herte felte deeth
Dusked hise eyen two / and failled breeth
But on his lady yet caste he his eye
His laste word / was mercy Emelye
Line 2808
His spirit chaunged hous / and wente ther
As I cam neuere / I kan nat tellen wher
Therfore I stynte / I nam no diuinistre
Of soules / fynde I nat in this Registre
Line 2812
Ne me ne list thilke opinions to telle
Of hem / though þat they writen wher they dwelle
Arcite is coold / ther Mars his soule gye
Now wol I speken forth of Emelye
Line 2816
Shrighte Emelye / and howleth Palamon
And Theseus / his suster took anon
Swownynge / and baar hire fro the corps away
What helpeth it to tarien forth the day
Line 2820
To tellen how she weepe / bothe eue and morwe
ffor in swich cas / wommen haue swich sorwe
Page 81
Whan þat hir housbond / is from hem ago
That for the moore part they sorwen so
Line 2824
Or ellis / fallen in swich maladye
That at the laste / certeinly they dye
¶ Infinite / been the sorwes and the teeres
Of olde folk / and eek of tendre yeeres
Line 2828
In al the toun / for deeth of this Theban
ffor hym ther wepeth / bothe child and man
So greet a wepyng was ther noon certayn
Whan Ector was ybroght / al fressh yslayn
Line 2832
To Troye / allas the pitee þat was ther
Cracchynge of chekes / rentynge eek of heer
Why woldestow be deed / thise wommen crye
And haddest gold ynough / and Emelye
Line 2836
¶ No man / myghte gladen Theseus
Sauynge / his olde fader Egeus
That knew / this worldes transmutacion
As he hadde / seyn it / vp and doun
Line 2840
Ioye after wo / and wo after gladnesse
And shewed / hem ensamples and liknesse
Right as ther / dyed neuere man quod he [¶ Argumentum]
That he ne lyuede in erthe / in som degree
Line 2844
Right so / ther lyuede neuer man he seyde
In al this world / þat som tyme he ne deyde
This world / nys but a thurghfare ful of wo
And we been pilgrymes / passynge to and fro
Line 2848
Deeth is an ende / of euery worldes soore
And ouer al this / yet seyde he muchel moore
To this effect ful wisely / to enhorte [folio 35a]
The peple / that they sholde hem reconforte
Line 2852
Duc Theseus / with al his bisy cure
Cast now / wher that the sepulture
Of goode Arcite / may best ymaked be
And eek moost honurable in his degree
Line 2856
And at the laste / he took conclusion
That ther as first Arcite and Palamon
Page 82
Hadden for loue / the bataille hem bitwene
That in that selue groue / swoote and grene
Line 2860
Ther as he hadde / hise amorouse desires
His compleynte / and for loue hise hoote fires
He wolde make a fyr / in which the office
ffuneral / he myghte al accomplice
Line 2864
And leet comande anon / to hakke and hewe
The okes olde / and leye hem on a rewe
In colpons / wel arrayed for to brenne
Hise Officers / with swifte feet they renne
Line 2868
And ryden anon / at his comandement
And after / this / Theseus hath ysent
After a beere / and it al ouer spradde
With clooth of gold / the richeste / þat he hadde
Line 2872
And of the same suyte / he cladde Arcite
Vp on his hondes / hadde he gloues white
Eek on his heed / a coroune of laurer grene
And in his hond / a swerd ful bright and kene
Line 2876
He leyde hym bare the visage / on the beere
Ther-with he weepe / that pitee was to heere
And for the peple / sholde seen hym alle
Whan it was day / he broghte hym to the halle
Line 2880
That roreth / of the criyng and the soun
¶ Tho cam this woful Theban Palamon
With flotery berd / and rugged asshy heeres
In clothes blake / ydropped al with teeres
Line 2884
And passynge othere / of wepynge Emelye
The rewefulleste / of al the compaignye
[And] In as muche / as the seruyce sholde be
The moore noble / and riche in his degree
Line 2888
Duc Theseus / leet forth thre steedes brynge
That trapped were in steel al gliterynge
And couered with the armes of daun Arcite
Vp on thise steedes / grete and white
Line 2892
Ther sitten folk of whiche oon baar his sheeld
Another his spere / in his hondes heeld
Page 83
The thridde baar with hym / his bowe Turkeys
Of brend gold / was the caas / and eek the harneys
Line 2896
And riden forth a paas / with sorweful cheere
Toward the groue / as ye shul after heere
The nobleste of the grekes / that ther were [folio 35b]
Vp on hir shuldres / caryeden the beere
Line 2900
With slak paas / and eyen rede and wete
Thurgh out the Citee / by the maister strete
That sprad was al with blak / and wonder hye
Right of the same / is the strete ywrye
Line 2904
Vp on the right hond / wente olde Egeus
And on that oother syde / duc Theseus
With vessel in hir hand / of gold ful fyn
Al ful of hony / Milk and blood and wyn
Line 2908
Eek Palamon / with ful greet compaignye
And after that / cam woful Emelye
With fyr in honde / as was that tyme the gyse
To do the office / of funeral seruyse
Line 2912
Heigh labour/ and ful greet apparaillynge
Was at the seruice / and the fyr makynge
That with his grene tope / the heuen [raughte]
And twenty fadme of brede / the armes straughte
Line 2916
This is to seyn / the bowes weren so brode
Of stree first ther was leyd ful many a lode
But how the fyr / was maked vp on highte
And eek the names / that the trees highte
Line 2920
As ook / firre / birch / Aspe / Alder / holm / popeler
Wylugh / Elm / plane / Assh / box / chasteyn / lynde / laurer
Mapul / thorn / bech / hasel / Ew / whippeltre
How they weren fild / shal nat be toold for me
Line 2924
Ne hou the goddes ronnen vp and doun
Disherited / of hire habitacioun
In whiche they woneden / in reste and pees
Nymphus / ffawnes / and Amadrides
Line 2928
Ne hou the beestes / and the briddes alle
ffledden for fere / whan the wode was falle
Page 84
Ne how the ground / agast was of the light
That was nat wont to seen the sonne bright
Line 2932
Ne how the fyr / was couched first with stree
And thanne with drye stokkes / clouen a thre
And thanne with grene wode and spicerye
And thanne with clooth of gold / and with perrye
Line 2936
And gerlandes / hangynge / with ful many a flour
The Mirre / thencens / with al so greet odour
Ne how Arcite / lay among al this
Ne what richesse / aboute his body is
Line 2940
Ne how that Emelye / as was the gyse
Putte in the fyr / of funeral seruyse
Ne how she swowned / whan men made fyr
Ne what she spak ne what was hir desire
Line 2944
Ne what Ieweles / men in the fyre caste
Whan þat the fyr was greet and brente faste
¶ Ne how somme caste hir sheeld / and somme hir spere [folio 36a]
And of hire vestimentz / whiche þat they were
Line 2948
And coppes full of wyn / and Milk and blood
In to the fyr / that brente / as it were wood
Ne how the grekes / with an huge route
Tries riden / al the place aboute
Line 2952
Vp on the left hand / with a loud shoutynge
And thries / with hir speres claterynge
And thries / how the ladyes gonne crye
And how / þat lad was homward Emelye
Line 2956
Ne how Arcite / is brent to asshen colde
Ne / how that lych wake / was yholde
Al thilke nyght / ne how the grekes pleye
The wake pleyes / ne kepe I nat to seye
Line 2960
Who wrastleth best naked / with oille enoynt
Ne who that baar hym best in no disioynt
¶ I wol nat tellen eek how that they goon
Hoom til Atthenes / whan the pley is doon
Line 2964
But shortly to the point thanne wol I wende
And maken / of my longe tale an ende
Page 85
By processe / and by lengthe of certeyn yeres
Al styntyd is / the moornynge and the teres
Line 2968
Of grekes / by oon general assent
Thanne semed me / ther was a parlement
At Atthenes / vpon certein poyntz and caas
Among the whiche poyntz / yspoken was
Line 2972
To haue with certein contrees alliance
And have fully of Thebans obeissance
ffor which / this noble Theseus anon
Leet senden / after gentil Palamon
Line 2976
Vnwist of hym / what was the cause and why
But in hise blake clothes / sorwefully
He cam / at his comandement in hye
Tho sente / Theseus for Emelye
Line 2980
Whan they were set and hust was al the place
And Thesens / abiden hadde a space
Er any word / cam fram his wise brest
Hise eyen sette he / ther as was his lest
Line 2984
And with a sad visage / he siked stille
And after that right thus he seyde his wille
The firste moeuere of the cause aboue
Whan he first made / the faire cheyne of loue
Line 2988
Greet was theffect and heigh was his entente
Wel wiste he why / and what ther of he mente
ffor with that faire cheyne of loue he bond
The fyr / the eyr / the water and the lond
Line 2992
In certeyn boundes / that they may nat flee
That same prince / and that same moeuere quod he
Hath stablissed / in this wrecched world adoun [folio 36b]
Certeyne dayes / and duracioun
Line 2996
To al / that is engendrid in this place
Ouer the which[e] day / they may nat pace
Al mowe they yet tho dayes wel abregge
Ther nedeth noght noon Auctoritee allegge
Line 3000
ffor it is preeued / by experience
But that me list declaren my sentence
Page 86
Thanne may men / by this ordre wel discerne
That thilke moeuere / stable is and eterne
Line 3004
Wel may men knowe / but it be a fool
That euery part dirryueth from his hool
ffor nature / hath taken his bigynnyng
Of no partie / or of cantel of a thyng
Line 3008
But of a thyng that parfit is and stable
Descendynge so / til it be corrumpable
And therfore / of his wise purueiaunce
He hath / so wel biset his ordinaunce
Line 3012
That speces of thynges / and progressions
Shullen enduren / by successions
And nat eterne / with outen any lye
This maystow vnderstonde / and seen it eye
Line 3016
Loo the ook / þat hath so long a norisshynge [¶ Exemplum]
ffrom tyme / þat it first bigynneth sprynge
And hath so long a lif / as we may see
Yet at the laste / wasted is the tree
Line 3020
¶ Considereth eek how that the harde stoon [¶ Exemplum]
Vnder oure feet on which we trede and goon
Yit wasteth it as it lyth by the weye
The brode Ryuer / somtyme wexeth dreye
Line 3024
The grete toures / se we wane and wende
Thanne may ye se / þat al this thyng hath ende
¶ Of man and womman / seen we wel also
That nedeth / in oon of thise termes two
Line 3028
This is to seyn / in youthe / or elles age
He moot be deed / the kyng as shal a page
Som in his bed / som in the depe see
Som in the large feeld / as men may se
Line 3032
Ther helpeth noght al goth that ilke weye
Thanne may I seyn [[se-yn]] / al this thyng moot deye
¶ What maketh this / but Iuppiter the kyng
That is prince / and cause of alle thyng
Line 3036
Conuertynge al / vn to his propre welle
ffrom which it is dirryued / sooth to telle
Page 87
And here agayns / no creature on lyue
Of no degree / auailleth for to stryue
Line 3040
¶ Thanne is it wysdom / as it thynketh me
To maken vertu of necessitee
¶ And take it weel / that we may nat eschue [folio 37a]
And namely / that to vs alle is due
Line 3044
And who so gruccheth ought he dooth folye
And rebel is / to hym that al may gye
And certeinly / a man hath moost honour
To dyen / in his excellence and flour
Line 3048
Whan he is siker / of his goode name
Thanne hath he doon / his freend ne hym no shame
And gladder / oghte his freend been of his deeth
Whan with honour / vp yolden is his breeth
Line 3052
Than whan his name / apalled is for age
ffor al forgeten / is his vassellage
Thanne is it best as for a worthy fame
To dyen / whan þat he is best of name
Line 3056
¶ The contrarie of al this / is wilsulnesse
Why grucchen we / why haue we heuynesse
That goode Arcite / of Chiualrie flour
Departed is / with duetee and honour
Line 3060
Out of this foule prison of this lyf
Why grucchen heere / his cosyn and his wyf
Of his wel fare / that loued hem so weel
Kan he hem thank? nay god woot neuer a deel
Line 3064
That bothe his soule / and eek hem self offende
And yet they mowe / hir lustes nat amende
What may I concluden / of this longe serye
But after wo / I rede vs to be merye
Line 3068
And thanken Iuppiter / of al his grace
And er that we / departen from this place
I rede [that] we make / of sorwes two
O parfit ioye / lastynge eueremo
Line 3072
And looketh now / wher moost sorwe is her Inne
Ther wol we first amenden and bigynne
Page 88
Suster quod he / this is my fulle assent
With all thavys / heere of my parlement
Line 3076
That gentil Palamon / thyn owene knyght
That serueth yow / with wille / herte / and myght
And euere hath doon / syn þat ye first hym knewe
That ye shul of your grace / vp on hym rewe
Line 3080
And taken hym / for housbonde and for lord
Leue [[or Lene]] me youre hond / for this is oure accord
Lat se now / of youre wommanly pitee
He is a kynges brother sone pardee
Line 3084
And though he were / a poure bacheler
Syn he hath serued yow / so many a yeer
And had for yow / so greet Aduersitee
It moste been considered / leeueth me
Line 3088
ffor gentil mercy / oghte to passen right
¶ Thanne seyde he thus / to Palamon ful right
I trowe / ther nedeth litel sermonyng [folio 37b]
To make yow / assente to this thyng
Line 3092
Com neer / and taak youre lady by the hond
Bitwixen hem / was maad anon the bond
That highte matrimoigne / or mariage
By al the conseil / and the Baronage
Line 3096
¶ And thus / with alle blisse and melodye
Hath Palamon / ywedded Emelye
And god / þat al this wyde world hath wroght
Sende hym his loue / that it deere aboght
Line 3100
ffor now is Palamon / in alle wele
Lyuynge in blisse / in richesse and in heele
And Emelye / hym loueth so tendrely
And he hire / serueth so gentilly
Line 3104
That neuere / was ther no word hem bitwene
Of Ialousie / or any oother tene
Thus endeth Palamon and Emelye
And God saue / al this faire compaignye Amen
Line 3108
¶ Heere is ended the knyghtes tale.
Page 89
¶ Heere folwen the wordes / bitwene the hoost and the Millere.
Whan that the knyght had thus his tale ytoold
In al the route / ne was ther yong ne oold
That he ne seyde / it was a noble storie
And worthy / for to drawen to memorie
Line 3112
And namely the gentils euerichon
Oure hoost lough / and swoor so moot I gon
This gooth aright / vnbokeled is the Male
Lat se now / who shal telle another tale
Line 3116
ffor trewely / the game is wel bigonne
Now telleth on sire Monk / if that ye konne
Sumwhat to quite with the knyghtes tale
The Millere / that for-dronken was al pale
Line 3120
So that vnnethe / vp on his hors he sat
He nolde aualen / neither hood ne hat
Ne abyde no man / for his curteisie
But in Pilates voys / he gan to crie
Line 3124
And swoor by Armes / and by blood / and bones
I kan a noble tale for the nones
With which / I wol now quite / the knyghtes tale
Oure hoost saugh / that he was dronke of ale
Line 3128
And seyde / abyd Robyn my leeue brother
Som bettre man / shal telle vs first another
Abyde / and lat vs werken thriftily [folio 38a]
¶ By goddes soule quod he / that wol nat I
Line 3132
ffor I wol speke / or elles go my wey
Oure hoost answerde / tel on a deuele wey
Thou art a fool / thy wit is ouercome
¶ Now herkneth quod the Millere alle and some
Line 3136
But first I make a protestacioun
That I am dronke / I knowe it by my soun
And therfore / if that I mysspeke or seye
Wyte it the Ale of Southwerk I [you] preye
Line 3140
Page 90
Line 3140
ffor I wol telle / a legende and a lyf
Bothe of a Carpenter / and of his wyf
How that a clerk / hath set the wrightes cappe
¶ The Reue answerde / and seyde stynt thy clappe
Line 3144
Lat be / thy lewed dronken harlotrye
It is a synne / and eek a greet folye
To apeyren any man / or hym defame
And eek to bryngen wyues in swich fame
Line 3148
Thou mayst ynogh / of othere thynges seyn
¶ This dronke Millere / spak ful soone ageyn
And seyde / leue brother Osewold
Who hath no wyf / he is no Cokewold
Line 3152
But I sey nat therfore / that thou art oon
Ther been ful goode wyues many oon
And euere / a thousand goode / ayeyns oon badde
That knowestow wel thy self / but if thou madde
Line 3156
Why artow angry / with my tale now
I haue a wyf pardee / as wel as thow
Yet nolde I / for the oxen in my plogh
Take vp on me / moore than ynogh
Line 3160
As demen of my self / that I were oon
I wol bileue wel / that I am noon
An housbonde / shal nat been Inquisityf
Of goddes pryuetee / nor of his wyf
Line 3164
So he may fynde goddes foyson there
Of the remenant nedeth nat enquere
¶ What sholde I moore seyn / but this Millere
He nolde his wordes / for no man forbere
Line 3168
But tolde his cherles tale in his manere
Mathynketh / that I shal reherce it heere
And ther-fore euery gentil wight I preye
ffor goddes loue / demeth nat that I seye
Line 3172
Of yuel entente / but that I moot reherce
Hir tales alle / be they bettre or werse
Or elles / falsen som of my mateere
And therfore / who so list it nat yheere
Line 3176
Page 91
Line 3176
Turne ouer the leef / and chese another tale
ffor he shal fynde ynowe / grete and smale
Of storial thyng that toucheth gentillesse [folio 38b]
And eek moralitee / and hoolynesse
Line 3180
Blameth nat me / if that ye chese amys
The Millere / is a cherl / ye knowe wel this
So was the Reue / and othere manye mo
And harlotrie // they tolden bothe two
Line 3184
Auyseth yow / putteth me out of blame
And eek men shal nat maken ernest of game [[Slight break in the MS.]]
Page 92
¶ Heere bigynneth the Millere his tale.
WHilom / ther was dwellynge at Oxenford
A riche gnof / that gestes heeld to bord
Line 3188
And of his craft he was a Carpenter
With hym / ther was dwellynge a poure scoler
Hadde lerned Art but al his fantasye [[painting of the Miller]]
Was turned / for to lerne Astrologye
Line 3192
And koude / a certeyn of conclusions
To demen / by Interrogacions
If þat men asked hym / in certein houres
Whan þat men sholde haue droghte or elles shoures
Line 3196
Or if men asked hym / what sholde bifalle
Of euery thyng / I may nat rekene hem alle
¶ This clerk was cleped / hende Nicholas
Of deerne loue he koude and of solas
Line 3200
And ther-to / he was sleigh / and ful priuee
And lyk a mayden / meke for to see
A chambre hadde he in that hostelrye
Allone / with-outen any compaignye
Line 3204
fful fetisly ydight with herbes swoote
And he hym self / as sweete as is the roote
Of lycorys / or any Cetewale
His Almageste / and bookes grete and smale
Line 3208
His Astrelabie / longynge for his Art/
His Augrym stones / layen faire a part/
On shelues / couched at his beddes heed
His presse ycovered / with a faldyng reed
Line 3212
And all aboue / ther lay a gay Sautrie
On which / he made a nyghtes melodie
So swetely / that al the chambre rong
And Angelus ad virginem / he song
Line 3216
And after that he song the kynges noote
fful often / blessed was his myrie throte
Page 93
And thus / this sweete clerk his tyme spente
After his freendes fyndyng and his rente
Line 3220
¶ This Carpenter / hadde wedded newe a wyf
Which that he louede / moore than his lyf /
Of xviij. yeer / she was of Age [folio 39a]
Ialous he was / and heeld hire narwe in cage
Line 3224
ffor she was yong and wylde / and he was old
And demed hym self been lik / a Cokewold
He knew nat Catoun / for his wit was rude
That bad / man sholde wedde his simylitude
Line 3228
Men sholde wedden after hire estaat
ffor youthe and elde / is often at debaat
But sith that he / was fallen in the snare
He moste endure / as oother folk his care
Line 3232
¶ ffair was this yonge wyf / and ther with al
As any wezele / hir body / gent and smal
A ceynt she werede / ybarred al of silk
A barmclooth [eek] / as whit as morne Milk
Line 3236
Vp on hir lendes / ful of many a goore
Whit was hir smok / and broyden al bifoore
And eek bihynde / on hir coler aboute
Of colblak silk / with-Inne and eek with-oute
Line 3240
The tapes / of hir white voluper
Were of the same suyte of hir coler
Hir filet brood of silk and set ful hye
And sikerly / she hadde a likerous eye
Line 3244
fful smale ypulled / were hire browes two
And tho were bent / and blake as any sloo
She was / ful moore blisful on to see
Than is / the newe / pereionette tree
Line 3248
And softer / than the wolle is of a wether
And by hir girdel / heeng a purs of lether
Tasseled with grene / and perled with latoun
In al this world / to seken vp and doun
Line 3252
There nas no man so wys / þat koude thenche
So gay a popelote / or swich a wenche
Page 94
fful brighter / was the shynyng of hir hewe
Than in the tour / the noble yforged newe
Line 3256
¶ But of hir song / it was / as loude and yerne
As any swalwe / sittynge on a berne
Ther to / she koude skippe / and make game
As any kyde / or calf / folwynge his dame
Line 3260
Hir mouth was sweete / as bragot or the Meeth
Or hoord of Apples / leyd in hey or heeth
Wynsynge she was / as is a ioly colt
Long as a Mast and vprighte as a bolt
Line 3264
A brooch sche baar / vp on hir loue coler
As brood / as is the boos of a bokeler
Hir shoes were laced / on hir legges hye
She was a prymerole / a piggesnye
Line 3268
ffor any lord / to leggen in his bedde
Or yet for any good yeman to wedde
NOw sire / and eft sire / so bifel the cas [folio 39b]
That on a day / this hende Nicholas
Line 3272
ffil with this yonge wyf / to rage and pleye
Whil that hir housbonde was at Oseneye
As clerkes / ben ful subtile / and ful queynte
And priuely / he caughte hire by the queynte
Line 3276
And seyde ywis / but if ich haue my wille
ffor deerne loue of thee / lemman I spille
And heeld hire harde / by the haunche bones
And seyde / lemman loue me al atones
Line 3280
Or I wol dyen / also god me saue
And she sproong / as a colt doth in the traue
And with hir heed / sche wryed faste awey
And seyde / I wol nat kisse thee / by my fey
Line 3284
Why lat be quod ich / lat be Nicholas
Or I wol crie / out / harrow / and allas
Do wey youre handes / for your curteisye
¶ This Nicholas / gan mercy for to crye
Line 3288
And spak so faire / and profred hire so faste
That she hir loue / hym graunted atte laste
Page 95
And swoor hir ooth / by seint Thomas of Kent
That she wol been / at his comandement
Line 3292
Whan þat she may / hir leyser wel espie
Myn housbonde / is so ful of Ialousie
That but ye wayte wel / and been priuee
I woot right wel / I nam but deed quod she
Line 3296
Ye moste been ful deerne / as in this cas
¶ Nay ther of / care thee noght quod Nicholas
A clerk hadde litherly / biset his whyle
But if he koude / a Carpenter bigyle
Line 3300
And thus they been / accorded and ysworn
To wayte a tyme / as I haue told biforn
¶ Whan Nicholas / had doon thus euerideel
And thakked hire / aboute the lendes weel
Line 3304
He kist hire sweete / and taketh his sawtrie
And pleyeth faste / and maketh melodie
Thanne fil it thus / þat to the paryssh chirche
Cristes / owene werkes / for to wirche
Line 3308
This goode wyf / went on an haliday
Hir forheed shoon / as bright as any day
So was it wasshen / whan she leet hir werk
¶ Now was ther of that chirche a parissh clerk
Line 3312
The which / that was ycleped Absolon
Crul was his heer / and as the gold it shoon
And strouted as a ffanne / large and brode
fful streight and euene / lay his ioly shode
Line 3316
His rode was reed / hise eyen greye as goos
With Powles wyndow / coruen on his shoos
In hoses rede / he wente fetisly [folio 40a]
Yclad he was / ful smal and proprely
Line 3320
Al in a kirtel / of a lyght waget
fful faire and thikke / been the poyntes set
And ther vp on / he hadde a gay surplys
As whit as is / the blosme vp on the rys
Line 3324
A myrie child he was / so god me saue
Wel koude he laten blood / and clippe and shaue
Page 96
And maken a chartre of lond / or Acquitaunce
In twenty manere / koude he trippe and daunce
Line 3328
After the scole / of Oxenford[e] tho
And with his legges / casten to and fro
And pleyen songes / on a small Rubible
Ther to / he song som tyme / a loud quynyble
Line 3332
And as wel / koude he pleye / on his giterne
In al the toun / nas Brewhous ne Tauerne
That he ne visited / with his solas
Ther any gaylard Tappestere was
Line 3336
But sooth to seyn / he was somdel squaymous
Of fartyng / and of speche daungerous
¶ This Absolon / þat iolif was and gay
Gooth with a Sencer / on the haliday
Line 3340
Sensynge the wyues / of the parisshe faste
And many a louely look / on hem he caste
And namely / on this Carpenteris wyf
To loke on hire / hym thoughte a myrie lyf
Line 3344
She was so propre / and sweete and likerous
I dar wel seyn / if she hadde been a Mous
And he a Cat / he wold hire hente anon
¶ This parissh clerk / this ioly Absolon
Line 3348
Hath in his herte / swich a loue longynge
That of no wyf / took he noon offrynge
ffor curteisie / he seyde he wolde noon
The Moone / whan it was nyght / ful brighte shoon
Line 3352
And Absolon / his gyterne hath ytake
ffor paramours / be thoghte for to wake
And forth he gooth / iolif and amorous
Til he cam / to the Carpenteres hous
Line 3356
A litel / after Cokkes hadde ycrowe
And dressed hym vp / by a shotwyndowe
That was / vp on the Carpenteris wal
He syngeth in his voys / gentil and smal
Line 3360
Now deere lady / if thy wille be
I pray yow / that ye wole thynke on me
Page 97
fful wel acordaunt to his gyternynge
This Carpenter awook / and herde synge
Line 3364
And spak vn to his wyf / and seyde anon
What Alison / herestow nat Absolon
That chaunteth thus / vnder oure boures wal [folio 40b]
And she answerde hir housbonde / ther with al
Line 3368
Yis God woot Iohn / I heere it euery del
¶ This passeth forth / what wol ye bet than weel
ffro day to day / to day / this ioly Absolon
So woweth hire / that hym is wo bigon
Line 3372
He waketh / al the nyght / and al the day
He kembeth hise lokkes brode / and made hym gay
He woweth hire / by meenes / and brocage
And swoor / he wolde been hir owene page
Line 3376
He syngeth brokkynge / as a nyghtyngale
He sente hire pyment Meeth and spiced Ale
And wafres / pipyng / hoot / out of the gleede
And for she was of toune / he profreth meede
Line 3380
ffor som folk wol ben wonnen for richesse
And somme for strokes / and somme for gentillesse [¶ vnde Ouidius/ Ictibus Agrestis.]
¶ Somtyme / to shewe his lightnesse and maistrye
He pleyeth Herodes vp on a Scaffold hye
Line 3384
But what auailleth hym / as in this cas
She loueth so / this hende Nicholas
That Absolon / may blowe the bukkes horn
He ne hadde / for his labour but a scorn
Line 3388
And thus / she maketh Absolon hire Ape
And al his ernest turneth til a Iape
fful sooth is this prouerbe / it is no lye
Men seyn right thus / alwey the nye slye
Line 3392
Maketh / the ferre leeue to be looth
ffor though that Absolon / be wood or wrooth
By cause / that he fer was from hire sighte
This nye Nicholas / stood in his lighte
Line 3396
NOw bere thee wel / thou hende Nicholas
ffor Absolon / may waille and synge allas
Page 98
And so bifel it on a Saterday
This Carpenter / was goon til Osenay
Line 3400
And hende Nicholas and Alisoun
Acorded been / to this conclusioun
That Nicholas / shal shapen hym a wyle
This sely Ialous housbonde to bigyle
Line 3404
And if so be / the game wente aright
She sholde slepen / in his arm al nyght
ffor this was / his desir / and hire also
And right anon / with-outen wordes mo
Line 3408
This Nicholas / no lenger wolde tarie
But dooth ful softe / vn to his chambre carie
Bothe mete and drynke / for a day or tweye
And to hire housbonde / bad hire for to seye
Line 3412
If that he axed / after Nicholas
She sholde seye / she nyste where he was
Of al that day / she saugh hym nat with eye [folio 41a]
She trowed / that he was in maladye
Line 3416
ffor / for no cry / hir mayde koude hym calle
He nolde answere / for thyng that myghte falle
¶ This passeth forth / al thilke Saterday
That Nicholas / stille in his chambre lay
Line 3420
And eet and sleepe / or dide what hym leste
Til Sonday / that the sonne gooth to reste
¶ This sely Carpenter / hath greet merueyle
Of Nicholas / or what thyng myghte hym eyle
Line 3424
And seyde / I am adrad by Seint Thomas
It stondeth nat aright with Nicholas
God shilde / that he deyde sodeynly
This world / is now ful tikel sikerly
Line 3428
I saugh to day / a cors yborn to chirche
That now / on monday last / I saugh hym wirche
¶ Go vp quod he / vn to his knaue anoon
Clepe at his dore / or knokke with a stoon
Line 3432
Looke how it is / and tel me boldely
¶ This knaue / gooth him vp ful sturdily
Page 99
And at the chambre dore / whil that he stood
He cride and knokked / as that he were wood
Line 3436
What how / what do ye maister Nicholay
How may ye slepen / al the longe day
¶ But al for noght he herde nat a word
An hole he foond / ful lowe vp on a bord
Line 3440
Ther as the Cat was wont In for to crepe
And at that hole / he looked In ful depe
And at the laste / he hadde of hym a sighte
This Nicholas / sat capyng euere vp-righte
Line 3444
As he had kiked / on the newe moone
Adoun he gooth / and tolde his maister soone
In what array / he saugh that ilke man
¶ This Carpenter / to blessen hym bigan
Line 3448
And seyde / help vs seinte ffrydeswyde
A man woot litel / what hym shal bityde
This man is falle / with his Astromye
In som woodnesse / or in som Agonye
Line 3452
I thoghte ay wel / how that it sholde be
Men sholde nat knowe / of goddes pryuetee
Ye / blessed be alwey a lewed man
That noght but oonly his bileue kan
Line 3456
So ferde another clerk with Astromye
He walked in the feeldes / for to prye
Vp on the sterres / what ther sholde bifalle
Til he was / in a Marleput yfalle
Line 3460
He saugh nat that / but yet by seint [Thomas [[later hand]] ]
Me reweth soore / of hende Nicholas
He shal be rated / of his studiyng [folio 41b]
If that I may / by Ihesus heuene kyng
Line 3464
¶ Get me a staf / that I may vnderspore
Whil þat thou Robyn / heuest of the dore
He shal / out of his studiyng as I gesse
And to the chambre dore / he gan hym dresse
Line 3468
His knaue / was a strong carl / for the noones
And by the haspe / he haaf it of atones
Page 100
In to the floor / the dore fil anon
This Nicholas / sat ay as stille as stoon
Line 3472
And euere caped vpward in to the Eir
This Carpenter / wende he were in despeir
And hente hym / by the sholdres myghtily
And shook hym harde / and cride spitously
Line 3476
What Nicholay / what how / what looke adoun
Awake / and thenk on Cristes passioun
I crouche thee / from Elues / and fro wightes
Ther-with the nyghtspel / seyde he anonrightes
Line 3480
On foure halues / of the hous aboute
And on the thresshfold / of the dore with-oute
Ihesu Crist and seint Benedight
Blesse this hous / from euery wikked wight
Line 3484
ffor nyghtes uerye / the white pater noster
Where wentestow / seint Petres soster
¶ And atte laste / this hende Nicholas
Gan for to sike soore / and seyde allas
Line 3488
Shal al this world / be lost eftsoones now?
¶ This Carpenter / answerde / what seystow?
What thynk on god / as we doon / men þat swynke
¶ This Nicholas answerde / fecche me drynke
Line 3492
And after / wol I speke in pryuetee
Of certeyn thyng that toucheth me and thee
I wol telle it noon oother man certeyn
¶ This Carpenter / goth doun / and comth ageyn
Line 3496
And broghte / of myghty Ale a large quart
And whan þat ech of hem / had dronke his part
This Nicholas / his dore faste shette
And doun the Carpenter / by hym he sette
Line 3500
¶ He seyde Iohn myn hoost lief and deere
Thou shalt vp on thy trouthe swere me heere
That to no wight thou shalt this conseil wreye
ffor it is / cristes conseil that I seye
Line 3504
And if thou telle man / thou art forlore
ffor this vengaunce / thou shalt han therfore
Page 101
That if thou wreye me / thou shalt be wood
Nay Crist forbede it for his hooly blood
Line 3508
Quod tho this sely man / I nam no labbe
Ne though I seye / I am nat lief to gabbe
Sey what thou wolt / I shal it neuere telle [folio 42a]
To child ne wyf / by hym that harwed helle
Line 3512
NOw Iohn quod Nicholas / I wol nat lye
I have yfounde / in myn Astrologye
As I haue looked / in the moone bright
That now a monday next at quarter nyght
Line 3516
Shal falle a reyn / and that so wilde and wood
That half so greet was neuere Noees flood
This world he seyde / in lasse than an hour
Shal al be dreynt / so hidous is the shour
Line 3520
Thus schal mankynde drenche / and lese hir lyf
¶ This Carpenter answerde / allas my wyf
And shal she drenche / allas myn Alisoun
ffor sorwe of this / he fil almoost adoun
Line 3524
And seyde / is ther no remedie in this cas
¶ Why yis for gode / quod hende Nicholas
If thou wolt werken / aftir loore and reed
Thou mayst nat werken / after thyn owene heed
Line 3528
ffor thus seith Salomon / that was ful trewe
Werk al by conseil / and thou shalt nat rewe
And if thou werken wolt by good conseil
I vndertake / with-outen Mast and seyl
Line 3532
Yet shal I sauen / hire / and thee / and me
Hastow nat herd / hou saued was Noe?
Whan þat oure lord / hadde warned hym biforn
That al the world / with water sholde be lorn
Line 3536
¶ Yis quod this Carpenter / ful yoore ago
¶ Hastou nat herd / quod Nicholas also
The sorwe of Noe / with his felaweshipe
Er þat he myghte / brynge his wyf to shipe
Line 3540
Hym hadde be leuere / I dar wel vndertake
At thilke tyme / than alle hise wetheres blake
Page 102
That she hadde had a shipe / hir self allone
And ther-fore / woostou what is best to doone
Line 3544
This asketh haste / and of an hastif thyng
Men may nat preche / or maken tariyng
¶ Anon go gete vs faste in to this In
A knedyng trogh / or ellis a kymelyn
Line 3548
ffor ech of vs / but loke þat they be large
In whiche / we mowe swymme as in a barge
And han ther-Inne / vitaille suffisant
But for a day / fy on the remenant
Line 3552
The water shal aslake / and goon away
Aboute pryme / vp on the nexte day
But Robyn / may nat wite of this / thy knaue
Ne eek thy mayde Gille I may nat saue
Line 3556
Axe nat why /. for though thou aske me
I wol nat tellen goddes pryuetee
Suffiseth thee / but if thy wittes madde [folio 42b]
To han as greet a grace / as Noe hadde
Line 3560
Thy wyf shal I wel sauen / out of doute
Go now thy wey / and speed thee heer aboute
¶ But whan thou hast for hire and thee and me
Ygeten vs / thise knedyng tubbes thre
Line 3564
Thanne shaltow hange hem / in the roof ful hye
That no man / of oure purueiaunce spye
And whan thou thus hast doon / as I haue seyd
And hast oure vitaille / faire in hem yleyd
Line 3568
And eek an Ax / to smyte the corde atwo
Whan þat the water comth / that we may go
And broke an hole / an heigh vp on the gable
Vnto the gardynward / ouer the stable
Line 3572
That we may frely / passen forth oure way
Whan þat the grete shour / is goon away
Thanne shal I swymme / as myrie I vndertake
As dooth the white doke / after hire drake
Line 3576
Thanne wol I clepe / how Alison / how Iohn
Be myrie / for the flood wol passe anon
Page 103
And thou wolt seyn / hayl maister Nicholay
Good morwe / I se thee wel / for it is day
Line 3580
And thanne / shul we be / lordes al oure lyf/
Of al the world / as Noe and his wyf/
¶ But of o thyng I warne thee ful right
Be wel auysed / on that ilke nyght
Line 3584
That we ben entred / in to shippes bord
That noon of vs / ne speke nat a word
Ne clepe / ne crie / but been in his preyere
ffor it is / goddes owene heeste deere
Line 3588
¶ Thy wyf and thou / moote hange fer atwynne
ffor that bitwixe yow / shal be no synne
Na moore in lookyng / than ther shal in deede
This ordinance is seyd / so god thee speede
Line 3592
Tomorwe at nyght whan folk ben alle aslepe
In to our knedyng tubbes / wol we crepe
And sitten there / abidyng goddes grace
Go now thy wey / I haue no lenger space
Line 3596
To make of this / no lenger sermonyng
Men seyn thus / sende the wise / and sey no thyng
Thou art so wys it needeth thee nat to preche
Go saue oure lyf / and that I the biseche
Line 3600
¶ This sely Carpenter / goth forth his wey
fful ofte / he seith allas and weylawey
And to his wyf / he tolde his pryueetee
And she was war / and knew it bet than he
Line 3604
What al this queynte cast was for to seye
But nathelees / she ferde as she wolde deye
And seyde allas / go forth thy wey anon [folio 43a]
Help vs to scape / or we been lost echon
Line 3608
I am thy trewe / verray wedded wyf
Go deere spouse / and help to saue oure lyf
LO / which a greet thyng / is Affeccion [¶ Auctor]
Men may dyen / of ymaginacion
Line 3612
So depe / may impression be take
This sely Carpenter / bigynneth quake
Page 104
Hym thynketh verraily / that he may see
Noees flood / come walwynge as the see
Line 3616
To drenchen Alisoun / his hony deere
He wepeth / weyleth / maketh sory cheere
He siketh / with ful many a sory swogh
He gooth / and geteth hym a knedyng trogh
Line 3620
And after that / a tubbe and a kymelyn
And pryuely / he sente hem to his In
And heng hem / in the roof in pryuetee
His owene hand made laddres thre
Line 3624
To clymben / by the ronges and the stalkes
In to the tubbes / hangynge in the balkes
And hem vitailleth / bothe trogh and tubbe
With breed and chese / and good Ale in a Iubbe
Line 3628
Suffisynge right ynogh / as for a day
But er that he / hadde maad al this array
He sente his knaue / and eek his wenche also
Vp on his nede / to london for to go
Line 3632
And on the Monday / whan it drow to nyght
He shette his dore / with-oute candel lyght
And dresseth alle thyng as it shal be
And shortly / vp they clomben alle thre
Line 3636
They sitten stille / wel a furlong way
¶ Now Pater noster / clom seyde Nicholay
And clom quod Iohn / and clom seyde Alisoun
This Carpenter / seyde his deuocioun
Line 3640
And stille he sit / and biddeth his preyere
Awaitynge on the reyn / if he it heere
¶ The dede sleepe / for wery bisynesse
ffil on this Carpenter / right as I gesse
Line 3644
Aboute corfew tyme / or litel moore
ffor trauaille of his goost he groneth soore
And eft he routeth / for his heed myslay
Doun of the laddre / stalketh Nicholay
Line 3648
And Alisoun / ful softe adoun she spedde
With-outen wordes mo / they goon to bedde
Page 105
Ther as the Carpenter / is wont to lye
Ther was the reuel / and the melodye
Line 3652
And thus [lith] Alison / and Nicholas
In bisynesse / of myrthe and of solas
Til that the belle of laudes gan to rynge [folio 43b]
And freres in the Chauncel gonne synge
Line 3656
This parissh clerk / this Amorous Absolon
That is for loue alwey so wo bigon
Vp on the Monday / was at Oseneye
With a compaignye / hym to disporte and pleye
Line 3660
And axed vp on cas a Cloistrer
fful priuely / after Iohn the Carpenter
And he drough hym a part out of the chirche
And seyde I noot I saugh hym heere nat wirche
Line 3664
Syn Saterday / I trow that he be went
ffor tymber / ther our Abbot hath hym sent
ffor he is wont for tymber for to go
And dwellen at the grange / a day or two
Line 3668
Or elles / he is at his hous certeyn
Where that he be / I kan nat soothly seyn
¶ This Absolon / ful ioly was and light
And thoghte / now is tyme wake al nyght
Line 3672
ffor sikirly I saugh him nat stirynge
Aboute his dore / syn day bigan to sprynge
¶ So moot I thryue / I shal at cokkes crowe
fful pryuely / knokke at his wyndowe
Line 3676
That stant ful lowe / vp on his boures wal
To Alison / now wol I tellen al
My loue longynge / for yet I shal nat mysse
That at the leste wey / I shal hire kisse
Line 3680
Som maner confort shal I haue parfay
My mouth hath icched al this longe day
That is a signe of kissyng atte leste
Al nyght me mette eek / I was at a feeste
Line 3684
Therfore I wol goon slepe / an houre or tweye
And al the nyght thanne wol I wake and pleye
Page 106
Whan that the firste cok hath crowe anon
Vp rist this ioly louere Absolon
Line 3688
And hym arraieth / gay at poynt deuys
But first he cheweth greyn of lycorys
To smellen sweete / er he hadde kembd his heer
Vnder his tonge / a trewe loue he beer
Line 3692
ffor ther-by / wende he to ben gracious
He rometh / to the Carpenteres hous
And stille he stant vnder the shot wyndowe
Vn to his brist it raughte / it was so lowe
Line 3696
And softe he knokketh / with a semy soun
What do ye hony comb / sweete Alisoun
My faire bryd / my sweete cynamome
Awaketh lemman myn / and speketh to me
Line 3700
Wel litel thynken ye / vp on my wo
That for youre loue / I swete ther I go
No wonder is / thogh that I swelte and swete [folio 44a]
I moorne / as dooth a lamb after the tete
Line 3704
Ywis lemman / I haue swich loue longynge
That lik a turtel trewe / is my moornynge
I may nat ete / na moore than a mayde
¶ Go fro the wyndow / Iakke fool she sayde
Line 3708
As help me god / it wol nat be com pa me
I loue another / and elles I were to blame
Wel bet than thee / by Ihesu Absolon
Go forth thy wey / or I wol caste a ston
Line 3712
And lat me slepe / a twenty deuel wey
¶ Allas quod Absolon / and weylawey
That trewe loue / was euere so yuel biset
Thanne kys me / syn it may be no bet
Line 3716
ffor Ihesus loue / and for the loue of me
¶ Wiltow thanne / go thy wey quod she?
¶ Ye certes lemman / quod this Absolon
¶ Thanne make thee redy quod she I come anon
Line 3720
And vn to Nicholas / she seyde stille
Now hust and thou shalt laughen al thy fille
¶ This Absolon / doun sette hym on his knees
Page 107
And seyde / I am lord at alle degrees
Line 3724
ffor after this / I hope ther cometh moore
Lemman thy grace / and sweete bryd thyn oore
¶ The wyndow / she vndoth / and that in haste
Haue do quod she / com of and speed the faste
Line 3728
Lest that oure Neighebores / thee espie
¶ This Absolon / gan wype his mouth ful drie
Dirk was the nyght as pich / or as the cole
And at the wyndow / out she pitte hir hole
Line 3732
And Absolon / hym fil no bet ne wers
But with his mouth / he kiste hir naked ers
fful sauourly / er he was war of this
¶ Abak he stirte / and thoughte it was amys
Line 3736
ffor wel he wiste / a womman hath no berd
He felte a thyng al rough / and long yherd
And seyde / fy allas what haue I do
¶ Tehee quod she / and clapte the wyndow to
Line 3740
And Absolon / gooth forth a sory pas
¶ A berd a berd / quod hende Nicholas
By goddes corpus / this goth faire and weel
¶ This sely Absolon / herde euery deel
Line 3744
And on his lippe / he gan for Anger byte
And to hym self / he seyde l shal thee quyte
¶ Who rubbeth now / who froteth now his lippes
With dust with sond / with straw / with clooth / with chippes
But Absolon / that seith ful ofte allas
Line 3749
My soule / bitake I vn to Sathanas
But me were leuere / than al this toun quod he [folio 44b]
Of this despit awroken for to be
Line 3752
Allas quod he / allas I ne hadde ybleynt
His hoote loue / was coold and al yqueynt
ffor fro that tyme / that he hadde kiste hir ers
Of paramours / he sette nat a kers
Line 3756
ffor he was / heeled of his maladie
fful ofte / paramours he gan deffie
And weepe / as dooth a child that is ybete
A softe paas / he wente ouer the strete
Line 3760
Page 108
Line 3760
Vn til a smyth / men cleped daun Gerueys
That in his forge / smythed plough harneys
He sharpeth shaar / and kultour bisily
This Absolon / knokketh al esily
Line 3764
And seyde / vndo Gerueys / and that anon
¶ What who artow? I am heere Absolon
What Absolon / for Cristes swete tree
Why rise ye so rathe / ey benedicitee
Line 3768
What eyleth yow / som gay gerl god it woot
Hath broght yow thus / vp on the viritoot
By seinte note / ye woot wel what I mene
¶ This Absolon / ne roghte nat a bene
Line 3772
Of al his pley / no word agayn he yaf
He hadde / moore tow / on his distaf
Than Gerueys knew / and seyde freend so deere
That hoote kultour / in the chymenee heere
Line 3776
As lene it me / I haue ther-with to doone
And I wol / brynge it thee / agayn ful soone
¶ Gerueys answerde / certes were it gold
Or in a poke / nobles alle vntold
Line 3780
Thou sholdest have / as I am trewe smyth
Ey cristes foo / what wol ye do ther-with?
¶ Ther of quod Absolon / be as be may
I shal wel telle it thee / to morwe day
Line 3784
And caughte the kultour / by the colde stele
fful softe / out at the dore he gan to stele
And wente / vn to the Carpenteris wal
He cogheth first / and knokketh ther with al
Line 3788
Vp on the wyndowe / right as he dide er
¶ This Alison answerde / Who is ther?
That knokketh so / I warante it a theef
¶ Why nay quod he / god woot my sweete leef
Line 3792
I am thyn Absolon / my deerelyng
Of gold quod he / I haue thee broght a ryng
My mooder yaf it me / so god me saue
fful fyn it is / and ther-to wel ygraue
Line 3796
Page 109
Line 3796
This wol I yeue thee / if thou me kisse
¶ This Nicholas / was risen for to pisse
And thoughte / he wolde amenden al the Iape [folio 45a]
He sholde kisse his [ers] er that he scape
Line 3800
And vp the wyndowe / dide he hastily
And out his ers / he putteth pryuely
Ouer the buttok / to the haunche bon
And ther with / spak this clerk this Absolon
Line 3804
Spek sweete bryd / I noot nat where thou art
¶ This Nicholas / anon leet fle a fart/
As greet as it had been a thonder dent
That with the strook he was almoost yblent
Line 3808
And he was redy / with his Iren hoot
And Nicholas / amydde ers he smoot
¶ Of gooth the skyn / an hande brede aboute
The hoote kultour / brende so his toute
Line 3812
And for the smert he wende for to dye
As he were wood / for wo he gan to crye
Help / water / water / help for goddes herte
¶ This Carpenter / out of his slomber sterte
Line 3816
And herde oon crien water / as he were wood
And thoughte / Allas / now comth Nowelis flood
He sit hym vp / with-outen wordes mo
And with his Ax / he smoot the corde atwo
Line 3820
And doun gooth al / he foond neither to selle
Ne breed ne Ale / til he cam to the Celle
Vp on the floor / and ther aswowne he lay
¶ Vp stirte hire / Alison and Nicholay
Line 3824
And criden / out and harrow in the strete
The neighebores / bothe smale and grete
In ronnen / for to gauren on this man
That yet aswowne he lay / bothe pale and wan
Line 3828
ffor with the fal / he brosten hadde his Arm
But stonde he moste / vn to his owene harm
ffor whan he spak / he was anon bore doun
With hende Nicholas / and Alisoun
Line 3832
Page 110
Line 3832
They tolden euery man / that he was wood
He was agast so / of Nowelis flood
Thurgh fantasie / that of his vanytee
He hadde yboght hym / knedyng tubbes thre
Line 3836
And hadde hem hanged / in the roue aboue
And þat he preyde hem / for goddes loue
To sitten in the roof / par compaignye
¶ The folk gan laughen / at his fantasye
Line 3840
In to the roof / they kiken and they cape
And turned al his harm / vn to a Iape
ffor / what so / þat this Carpenter answerde
It was for noght no man his reson herde
Line 3844
With othes grete / he was so sworn adoun
That he was holde wood in al the toun
ffor euery clerk / anonright / heeld with oother [folio 45b]
They seyde / the man was wood / my leeue broother
Line 3848
And euery wight / gan laughen of this stryf/
Thus / swyued was / this Carpenteris wyf/
ffor al his kepyng and his Ialousye
And Absolon / hath kist hir nether eye
Line 3852
And Nicholas / is scalded in the towte
This tale is doon / and god saue al the rowte
¶ Heere endeth the Millere his tale [[Slight break in the MS.]]
Page 111
¶ The prologe / of the Reues tale
WHAN folk hadde laughen / at this nyce cas
Of Absolon / and hende Nicholas
Line 3856
Diuerse folk / diuersely they seyde
But for the moore part they loughe and pleyde
Ne at this tale / I saugh no man hym greue
But it were oonly / Osewold the Reue
Line 3860
By-cause / he was / of Carpenteris craft
A litel Ire / in his herte ylaft
He gan to grucche / and blamed it a lite
¶ So theek / quod he / ful wel koude I yow quite
Line 3864
With bleryng of a proud Milleres eye
If that me liste / speke of ribaudye
But ik am oold / me list no pley for Age
Gras tyme is doon / my fodder is now forage
Line 3868
This white tope / writeth myne olde yeris
Myn herte is mowled also as myne heris
But if I fare / as dooth an Openers
¶ That ilke fruyt / is euer leng the wers
Line 3872
Til it be roten / in Mullok or in stree
We olde men / I drede so fare we
Til we be roten / kan we nat be rype
We hoppen ay / whil that the world wol pype
Line 3876
ffor in oure wyl / ther stiketh euere a nayl
To haue an hoor heed / and a grene tayl
As hath a leek / for thogh oure myght be goon
Oure wyl / desireth folie euere in oon
Line 3880
ffor whan we may nat doon / than wol we speke
Yet in oure Asshen olde / is fyr yreke
¶ ffoure gleedes han we / whiche I shal deuyse
Avauntyng liyng Anger / Coueitise
Line 3884
Thise foure sparkles / longen vn to eelde
Oure olde lemes / mowe wel been vnweelde
Page 112
But wyl ne shal nat faillen / that is sooth [folio 46a]
And yet ik haue alwey a Coltes tooth
Line 3888
As many a yeer / as it is passed henne
Syn that my tappe of lif / bigan to renne
ffor sikerly / whan I was bore / anon
Deeth drough the tappe of lyf / and leet it gon
Line 3892
And euer sithe / hath so the tappe yronne
Til that almoost al empty is the tonne
The streem of lyf / now droppeth on the chymbe
The sely tonge / may wel rynge and chymbe
Line 3896
Of wrecchednesse / that passed is ful yoore
With olde folk saue dotage is namoore
Whan that oure hoost / hadde herd this sermonyng
He gan to speke / as lordly as a kyng
Line 3900
He seide / what amounteth al this wit
What shul we speke alday of hooly writ
The deuel / made a Reue for to preche
And of a Soutere / Shipman or a leche
Line 3904
Sey forth thy tale / and tarie nat the tyme
Lo Depeford / and it is half wey pryme
Lo Grenewych / ther many a shrewe is Inne
It were al tyme / thy tale to bigynne
Line 3908
NOw sires / quod this Osewold the Reue
I pray yow alle / that ye nat yow greue
Thogh I answere / and somdeel sette his howue
ffor leueful is / with force force of showue [¶ vim vi repellere]
¶ This dronke Millere hath ytoold vs heer
Line 3913
How that bigyled was a Carpenteer
Perauenture in scorn / for I am oon
And by youre leue / I shal him quite anoon
Line 3916
Right in his cherles termes wol I speke
I pray to god / his nekke mote breke
He kan wel / in myn eye seen a stalke
But in his owene / he kan nat seen a balke
Line 3920
Page 113
¶ Heere bigynneth the Reues tale
AT Trumpyngton / nat fer fro Cantebrigge
Ther gooth a brook / and ouer that a brigge
Vp on the which[e] brook / ther stant a Melle
And this is verray sooth / þat I yow telle [[painting of the Reve]]
A Millere / was ther dwellynge many a day
Line 3925
As eny pecok he was proud and gay
Pipen he koude and fisshe / and nettes beete
And turne coppes / and wel wrastle and sheete
Line 3928
And by his belt he baar a long panade
And of a swerd / ful trenchant was the blade
A ioly poppere / baar he in his pouche [folio 46b]
Ther was no man / for peril / dorste hym touche
Line 3932
A Sheffeld thwitel / baar he in his hose
Round was his face / and camuse was his nose
As piled as an Ape / was his skulle
He was a Market betere atte fulle
Line 3936
Ther dorste no wight / hand vp on hym legge
That he ne swoor / he sholde anon abegge
A theef he was / of corn and eek of Mele
And that a sly / and vsaunt for to stele
Line 3940
His name was hoote / deynous Symkyn
A wyf he hadde / ycomen of noble kyn
The person of the toun / hir fader was
With hire he yaf / ful many a panne of bras
Line 3944
ffor that Symkyn / sholde in his blood allye
She was yfostred in a Nonnerye
ffor Symkyn / wolde no wyf / as he sayde
But if she were / wel ynorissed and a mayde
Line 3948
To sauen his estaat of yomanrye
And she was proud / and peert as is a pye
A ful fair sighte / was it vp on hem two
On haly dayes / biforn hire wolde he go
Line 3952
Page 114
Line 3952
With his typet / [y]bounde about his heed
And she cam after / in a gyte of reed
And Symkyn / hadde hosen of the same
Ther dorste no wight / clepen hire but dame
Line 3956
Was noon so hardy / that wente by the weye
That with hire / dorste rage / or ones pleye
But if / he wolde be slayn of Symkyn
With panade / or with knyf / or boidekyn
Line 3960
ffor Ialous folk / ben perilous eueremo
Algate / they wolde hire wyues wenden so
And eek / for she was somdel smoterlich
She was as digne / as water in a dich
Line 3964
As ful of hoker / and of bismare
Hir thoughte / þat a lady sholde hire spare
What for hire kynrede / and hir nortelrie
That she hadde lerned in the Nonnerie
Line 3968
¶ A doghter hadde they bitwixe hem two
Of twenty yeer / with-outen any mo
Sauynge a child / þat was of half yeer age
In Cradel it lay / and was a propre page
Line 3972
This wenche thikke / and wel ygrowen was
With kamuse nose / and eyen greye as glas
Buttokes brode / and brestes rounde and hye
But right fair was hire heer / I wol nat lye
Line 3976
¶ This person of the toun / for she was feir
In purpos was / to maken hire his heir
Bothe of his catel / and his Mesuage [folio 47a]
And straunge / he made it of hir mariage
Line 3980
His purpos was / for to bistowe hire hye
In to som worthy blood of Auncetrye
ffor hooly chirches good / moot been despended
On hooly chirches blood / that is descended
Line 3984
Therfore / he wolde his hooly blood honoure
Though / that he hooly chirche sholde devoure
Gret sokene / hath this Millere / out of doute
With whete and Malt of al the land aboute
Line 3988
Page 115
Line 3988
And nameliche / ther was a greet Collegge
Men clepen the Soler halle at Cantebregge
Ther was hir whete / and eek hir malt ygrounde
And on a day / it happed in a stounde
Line 3992
Sik lay the Maunciple / on a maladye
Men wenden wisly / that he sholde dye
ffor which / this Millere / stal bothe mele and corn
An hundred tyme / moore than biforn
Line 3996
ffor ther biforn / he stal but curteisly
But now / he was a theef outrageously
ffor which / the wardeyn chidde and made fare
But ther of / sette the Millere nat a tare
Line 4000
He craketh boost / and swoor it was nat so
¶ Thanne were ther / yonge poure clerkes two
That dwelten in this halle / of which I seye
Testif they were / and lusty for to pleye
Line 4004
And oonly / for hire myrthe and reuerye
Vp on the wardeyn / bisily they crye
To yeue hem leue / but a litel stounde
To goon to Mille / and seen hir corn ygrounde
Line 4008
And hardily / they dorste leye hir nekke
The Millere shold nat stele hem / half a pekke
Of corn by sleighte / ne by force hem reue
And at the laste / the wardeyn yaf hem leue
Line 4012
Iohn highte that oon / and Aleyn heet that oother
Of o toun were they born / that highte Strother
ffer in the North / I kan nat telle where
¶ This Aleyn / maketh redy al his gere
Line 4016
And on an hors / the sak he caste anon
fforth goth Aleyn the clerk / and also Iohn
With good swerd / and bokeler by hir side
Iohn knew the wey / hem neded no gyde
Line 4020
And at the Mille / the sak adoun he layth
Aleyn spak first / al hayl Symond yfayth
Hou fares thy faire doghter / and thy wyf
¶ Aleyn welcome quod Symkyn / by my lyf
Line 4024
Page 116
Line 4024
And Iohn also / how now / what do ye heer
¶ Symond quod Iohn / by god nede has na peer
Hym boes serue hym selne / that has na swayn [folio 47b]
Or elles / he is a fool / as clerkes sayn
Line 4028
Oure Manciple / I hope / he wil be deed
Swa werkes ay / the wanges in his heed
And forthy / is I come / and eek Alayn
To grynde oure corn / and carie it ham agayn
Line 4032
I pray yow / spede vs heythen that ye may
¶ It shal be doon / quod Symkyn by my fay
What wol ye doon / whil that it is in hande
¶ By God / right by the hopur wil I stande
Line 4036
Quod Iohn / and se / how that the corn gas In
Yet saugh I neuere / by my fader kyn
How that the hopur / wagges til and fra
¶ Aleyn answerde / Iohn wiltow swa
Line 4040
Thanne wil I be bynethe / by my croun
And se / how þat the Mele falles doun
In to the trough / that sal be my disport
ffor Iohn yfaith / I may been of youre sort
Line 4044
I is / as ille a Millere / as are ye
¶ This Millere / smyled of hir nycetee
And thoghte / al this nys doon / but for a wyle
They wene / þat no man may hem bigile
Line 4048
But by my thrift / yet shal I blere hir eye
ffor al the sleighte / in hir Philosophye
The moore queynte crekes / that they make
The moore wol I stele / whan I take
Line 4052
In stide of flour / yet wol I yeue hem bren
The gretteste clerkes / been noght wisest men
As whilom to the wolf / thus spak the Mare
Of al hir Art [ne] counte I noght a tare
Line 4056
¶ Out at the dore / he gooth ful pryuely
Whan þat he saugh / his tyme softely
He looketh vp and doun / til he hath founde
The clerkes hors / ther as it stood ybounde
Line 4060
Page 117
Line 4060
Bihynde the Mille / vnder a lefsel
And to the hors / he goth hym faire and wel
He strepeth of the brydel / right anon
And whan the hors was laus / he gynneth gon
Line 4064
Toward the fen / ther wilde Mares renne
fforth with wehee / thurgh thikke and thurgh thenne
¶ This Millere gooth agayn / no word he seyde
But dooth his note / and with the clerkes pleyde
Line 4068
Til that hir corn / was faire and weel ygrounde
And whan the Mele / is sakked and ybounde
This Iohn goth out and fynt his hors away
And gan to crie / harrow and weylaway
Line 4072
Oure hors is lorn / Alayn for goddes banes
Stepe on thy feet com out man al atanes
Allas / our wardeyn / has his palfrey lorn [folio 48a]
This Aleyn al forgat / bothe Mele and corn
Line 4076
Al was out of his mynde / his housbondrie
What whilk way is he geen / he gan to crie
¶ The wyf cam lepynge Inward with a ren
She seyde allas / youre hors goth to the fen
Line 4080
With wilde mares / as faste as he may go
Vnthank come on his hand / that boond hym so
And he þat bettre / sholde han knyt the reyne
¶ Allas quod Aleyn / for cristes peyne
Line 4084
Lay doun thy swerd / and I wil myn alswa
I is ful wight god waat as is a raa
By god[des] herte / he sal nat scape vs bathe
Why nadstow pit the Capul in the lathe
Line 4088
Ilhayl / by god Aleyn / thou is a fonne
¶ This sely clerkes / han ful faste yronne
To-ward the fen / bothe Aleyn and eek Iohn
¶ And whan the Millere / saugh þat they were gon
Line 4092
He half a busshel / of hir flour hath take
And bad his wyf / go knede it in [a] cake
He seyde / I trowe the clerkes were aferd
Yet kan a Millere / make a clerkes berd
Line 4096
Page 118
Line 4096
ffor al his Art now lat hem goon hir weye
Lo wher they goon / ye lat the children pleye
They gete hym nat so lightly / by my croun
¶ Thise sely clerkes / rennen vp and doun
Line 4100
With keepe / keepe / stand / stand / Iossa warderere
Ga whistle thou / and I shal kepe hym heere
But shortly / til that it was verray nyght
They koude nat / though they do al hir myght
Line 4104
Hir capul cacche / he ran alwey so faste
Til in a dych / they caughte hym atte laste
Wery and weet as beest is in the reyn
Comth sely Iohn / and with him comth Aleyn
Line 4108
Allas quod Iohn / the day that I was born
Now are we dryue / til hethyng and til scorn
Oure corn is stoln / me wil vs fooles calle
Bathe the wardeyn / and oure felawes alle
Line 4112
And namely / the Millere weylaway
¶ Thus pleyneth Iohn / as he gooth by the way
Toward the Mille / and bayard in his hond
The Millere / sittynge / by the fyr he fond
Line 4116
ffor it was nyght and forther myghte they noght
But for the loue of god / they hym bisoght
Of herberwe and of ese / as for hir peny
¶ The Millere seyde agayn / if ther be eny
Line 4120
Swich as it is / yet shal ye haue youre part/
Myn hous is streit but ye han lerned Art
Ye konne by Argumentz / make a place [folio 48b]
A myle brood / of twenty foot of space
Line 4124
Lat se now / if this place may suffise
Or make it rowm with speche / as in youre gise
Now Symond / seyde Iohn / by seint Cutberd
Ay is thou myrie / and this is faire answerd
Line 4128
I haue herd seyd / man sal taa / of twa thynges
Slyk as he fyndes / or taa slyk as he brynges
But specially / I pray thee hoost deere
Get vs som mete and drynke / and make vs cheere
Line 4132
Page 119
Line 4132
And we wil payen / trewely atte fulle
With empty hand / men may none haukes tulle
Loo heere our siluer / redy for to spende
¶ This Millere / in to toun his doghter sende
Line 4136
ffor Ale and breed / and rosted hem a goos
And boond hire hors / it sholde nat goon loos
And in his owene chambre / hem made a bed
With sheetes and with chalons / faire yspred
Line 4140
Noght from his owene bed / ten foot / or twelue
His doghter hadde a bed / al by hir selue
Right in the same chambre / by and by
It myghte be no bet and cause why?
Line 4144
Ther was no rommer herberwe in the place
They soupen / and they speke hem to solace
And drynke euere / strong ale atte beste
Aboute mydnyght wente they to reste
Line 4148
¶ Wel hath this Millere vernysshed his heed
fful pale he was for-dronken / and nat reed
He yexeth / and he speketh / thurgh the nose
As he were / on the quakke / or on the pose
Line 4152
To bedde he goth / and with hym goth his wyf
As any Iay / she light was and Iolyf
So was hir ioly whistle wel y-wet
The Cradel / at hir beddes feet is set
Line 4156
To rokken / and to yeue the child to sowke
And whan þat dronken / al was in the crowke
To bedde / went the doghter right anon
To bedde wente Aleyn / and also Iohn
Line 4160
Ther nas na moore / hem neded no dwale
This Millere / hath so wisely bibbed Ale
That as an hors / he snorteth in his sleepe
Ne of his tayl bihynde / he took no keepe
Line 4164
His wyf bar him a burdon a ful strong
Men myghte hir rowtyng heere two furlong
The wenche rowteth eek / par compaignye
¶ Aleyn the clerk / that herd this melodye
Line 4168
Page 120
Line 4168
He poked Iohn / and seyde slepestow
Herdtow euere slyk / a sang er now
Lo whilk a cowplyng is ymel hem alle [folio 49a]
A wilde fyr / vp on thair bodyes falle
Line 4172
Wha herkned euere / slyk a ferly thyng
Ye they sal haue / the flour of il endyng
This lange nyght / ther tydes me na reste
But yet nafors / al sal be for the beste
Line 4176
ffor Iohn seyde he / als euere moot I thryue
If þat I may / yon wenche wil I swyue
Som esement has lawe yshapen vs
ffor Iohn / ther is a lawe / that says thus
Line 4180
That gif a man / in a point be ygreued
That in another / he sal be releued
Oure corn is stoln / shortly is ne nay
And we han had / an il fit al this day
Line 4184
And syn I sal haue neen amendement
Agayn my los / I wil haue esement
By God sale / it sal neen other bee
¶ This Iohn answerde / Alayn auyse thee
Line 4188
The Millere / is a perilous man he seyde
And gif that he / out of his sleepe abreyde
He myghte doon vs / bathe a vileynye
¶ Aleyn answerde / I count hym nat a flye
Line 4192
And vp he rist / and by the wenche he crepte
This wenche lay vprighte / and faste slepte
Til he so ny was / er she myghte espie
That it had been / to late for to crie
Line 4196
And shortly for to seyn / they were aton
Now pley Aleyn / for I wol speke of Iohn
This Iohn lith stille / a furlong wey or two
And to hym self / he maketh routhe and wo
Line 4200
Allas quod he / this is a wikked Iape
Now may I seyn / that I is but an Ape
Yet has my felawe / som what for his harm
He has / the Milleris doghter / in his Arm
Line 4204
Page 121
Line 4204
He auntred hym / and has his nedes sped
And I lye / as a draf sek / in my bed
And when this Iape is tald another day
I sal been halde a daf a cokenay
Line 4208
I wil arise / and auntre it by my fayth
Vnhardy is vnseely / thus men sayth
And vp he roos / and softely he wente
Vn to the cradel / and in his hand it hente
Line 4212
And baar it softe / vn to the beddes feet
¶ Soone after this / the wyf hir rowtyng leet
And gan awake / and wente hire out to pisse
And cam agayn / and gan hir cradel mysse
Line 4216
And groped heer and ther / but she foond noon
Allas quod she / I hadde almoost mysgoon
I hadde almoost goon / to the clerkes bed [folio 49b]
Ey benedicite / thanne hadde I foule y-sped
Line 4220
And forth she gooth / til she the Cradel fond
She gropeth / alwey forther with hir hond
And foond the bed / and thoghte noght but good
By cause / that the Cradel by it stood
Line 4224
And nyste wher she was / for it was derk
But faire and wel / she creepe In to the clerk
And lith ful stille / and wolde han caught a sleepe
With-Inne a while / this Iohn the clerk vp leepe
Line 4228
And on this goode wyf / he leith on soore
So myrie a fit hadde she nat ful yoore
He priketh harde and soore / as he were mad
This ioly lyf / han thise two clerkes lad
Line 4232
Til that the thridde cok / bigan to synge
¶ Aleyn wax wery / in the dawenynge
ffor he had swonken / al the longe nyght
And seyde / fare weel Malyne sweete wight
Line 4236
The day is come / I may no lenger byde
But eueremo / wher so I go / or ryde
I is thyn awen clerk swa haue I seel
¶ Now deere lemman quod she / go fareweel
Line 4240
Page 122
Line 4240
But er thow go / o thyng I wol thee telle
Whan that thou wendest homward by the Melle
Right at the entree / of the dore bihynde
Thou shalt a Cake / of half a busshel fynde
Line 4244
That was ymaked / of thyn owene mele
Which that I heelpe / my fader for to stele
And goode lemman / god thee saue and kepe
And with that word / almoost she gan to wepe
Line 4248
Aleyn vp rist / and thoughte / er þat it dawe
I wol go crepen In / by my felawe
And fond the Cradel / with his hand anon
By God thoughte he / al wrang I haue mysgon
Line 4252
Myn heed is toty / of my swynk to nyght
That maketh me / that I go nat aright
I woot wel by the Cradel / I have mysgo
Heere lith the Millere / and his wyf also
Line 4256
And forth he goth / a twenty deuel way
Vn to the bed / ther as the Millere lay
He wende have cropen / by his felawe Iohn
And by the Millere In he creepe anon
Line 4260
And caughte hym by the nekke / and softe he spak
He seyde / thou Iohn / thou swynesheed awak
ffor cristes saule / and heer a noble game
ffor by that lord / that called is seint Iame
Line 4264
As I haue thries / in this shorte nyght/
Swyued the Milleres doghter bolt vpright
Whil thow hast as a Coward been agast [folio 50a]
¶ Ye false harlot quod the Millere hast?
Line 4268
A false traitour / false clerk / quod he
Thow shalt be deed / by goddes dignitee
Who dorste be so boold / to disparage
My doghter / that is come / of swich lynage
Line 4272
And by the throte bolle / he caughte Alayn
And he hente hym / despitously agayn
And on the nose / he smoot hym with his fest
Doun ran the blody streem / vp on his brest
Line 4276
Page 123
Line 4276
And in the floor / with nose and mouth to-broke
They walwe / as doon two pigges in a poke
And vp they goon / and doun agayn anon
Til that the Millere / sporned at a stoon
Line 4280
And doun he fil / bakward vp on his wyf/
That wiste no thyng / of this nyce stryf/
ffor she was falle aslepe a lite wight
With Iohn the clerk / that waked hadde al nyght
Line 4284
And with the fal / out of hir sleepe she breyde
Help hooly croys of Bromholm / she seyde
In manus tuas / lord to thee I calle
Awak Symond / the feend is on vs falle
Line 4288
Myn herte is broken / help I nam but deed
Ther lyth oon / vp on my wombe / and on myn heed
Helpe Symkyn / for the false clerkes fighte
¶ This Iohn stirte vp / as soone as euer he myghte
Line 4292
And graspeth by the walles to and fro
To fynde a staf / and she stirte vp also
And knewe the Estres / bet than dide this Iohn
And by the wal / a staf she foond anon
Line 4296
And saugh / a litel shymeryng of a light
ffor at an hole / In shoon the moone bright
And by that light she saugh hem bothe two
But sikerly / she nyste / who was who
Line 4300
But as she saugh / a whit thyng in hir eye
And whan she gan / the white thyng espye
She wende the clerk hadde wered a volupeer
And with the staf / she drough ay neer and neer
Line 4304
And wende han hit this Aleyn at the fulle
And smoot the Millere / on the pyled skulle
And doun he gooth / and cride harrow I dye
Thise clerkes beete hym weel / and lete hym lye
Line 4308
And greythen hem / and tooke hir hors anon
And eek hire mele / and on hir wey they gon
And at the Mille / yet they tooke hir cake
Of half a busshel flour / ful wel ybake
Line 4312
Page 124
Line 4312
Thus is the proude Millere wel ybete
And hath ylost / the gryndynge of the whete
And payed for the soper euerideel [folio 50b]
Of Aleyn and of Iohn / þat bette hym weel
Line 4316
His wyf is swyued / and his doghter als
Lo swich it is / a Millere to be fals
And therfore this prouerbe / is seyd ful sooth
Hym thar nat wene wel / that yuele dooth
Line 4320
A gylour / shal hym self bigyled be
And god / þat sitteth heighe in Trinitee
Saue al this compaignye / grete and smale
Thus have I quyt the Millere in my tale
Line 4324
¶ Heere is ended the Reues tale [[Slight break in the MS.]]
Page 125
¶ The prologe of the Cokes Tale
The Cook of London / whil that the Reue spak
ffor ioye him thoughte / he clawed him on the bak
Ha . ha . quod he / for cristes passion
This Millere / hadde a sharpe conclusion
Line 4328
Vpon his argument / of herbergage
Wel seyde Salomon / in his langage
Ne brynge nat every man in-to thyn hous
ffor herberwynge by nyghte is perilous
Line 4332
Wel oghte a man / auysed for to be
Whom that he broghte / in-to his pryuetee
I pray to god / so yeue me sorwe and care
If euere sitthe / I highte Hogge of Ware
Line 4336
Herde I a Millere / bettre yset a werk
He hadde a Iape of malice in the derk
But god forbede / that we stynte heere [hic]
And therfore / if ye vouche-sauf to heere [audire]
Line 4340
A tale of me / that am a poure man
I wol yow telle / as wel as euere I kan
A litel iape / that fil in oure Citee
¶ Oure hoost answerde / and seide I graunte it thee
Line 4344
Now telle on Roger / looke that it be good
ffor many a pastee / hastow laten blood
And many a Iakke of Douere hastow soold
That hath been / twies hoot and twies coold
Line 4348
Of many a pilgrym / hastow cristes curs
ffor of thy percely / yet they fare the wors
That they han eten / with thy stubbel goos
ffor in thy shoppe / is many a flye loos
Line 4352
Now telle on / gentil Roger by thy name
But yet I pray thee / be nat wroth for game
A man may seye ful sooth / in game and pley [folio 51a]
¶ Thou seist ful sooth / quod Roger by my fey
Line 4356
Page 126
Line 4356
But sooth pley quaad pley / as the flemyng seith
And ther-fore / Herry Bailly / by thy feith
Be thou na[t] wrooth / er we departen heer
Though that my tale / be of an Hostileer
Line 4360
But nathelees / I wol nat telle it yit
But er we parte / ywis thou shalt be quit/
And ther with al / he lough and made cheere
And seyde his tale / as ye shul after heere [[Slight break in the MS.]]
Line 4364
Page 127
¶ Heere bigynneth the Cookes tale
APrentys whilom dwelled / in oure Citee
And of a craft of vitailliers was hee
Gaillard he was / as Goldfynch in the shawe
Broun as a berye / a propre short fel[a]we
Line 4368
With lokkes blake / ykempd ful fetisly
Dauncen he koude / so wel and iolily [[painting of the Cook]]
That he was cleped Perkyn Reuelour
He was / as ful of loue and paramour
Line 4372
As is the hyve / ful of hony sweete
Wel was the wenche / with hym myghte meete
At euery bridale / wolde he synge and hoppe
He loved bet the Tauerne than the shoppe
Line 4376
¶ ffor / whan ther / any ridyng was in Chepe
Out of the shoppe / thider wolde he lepe
Til that he hadde / al the sighte yseyn
And daunced wel / he wolde nat come ayeyn
Line 4380
And gadered hym / a meynee of his sort
To hoppe and synge / and maken swich disport
And ther / they setten steuene for to meete
To pleyen / at the dys in swich a streete
Line 4384
ffor in the toun / nas ther no prentys
That fairer koude caste / a paire of dys
Than Perkyn koude / and ther-to he was free
Of his dispense / in place of pryuetee
Line 4388
That fond his maister wel in his chaffare
ffor often tyme / he foond his box ful bare
ffor sikerly / a prentys Reuelour
That haunteth dys / Riot or paramour
Line 4392
His maister / shal it in his shoppe abye
Al haue he / no part of the Mynstralcye
ffor thefte and Riot. they been conuertible
Al konne he pleye on gyterne / or Ribible
Line 4396
Page 128
Line 4396
Reuel and trouthe / as in a lowe degree [folio 51b]
They been ful wrothe al day / as men may see
¶ This ioly prentys / with his maister bood
Til he were ny / out of his prentishood
Line 4400
Al were he snybbed / bothe erly and late
And somtyme / lad with reuel to Newegate
But atte laste / his maister hym bithoghte
Vp on a day / whan he his papir soghte
Line 4404
Of a prouerbe / that seith this same word
Wel bet is roten Appul / out of hoord
Than þat / it rotie al the remenaunt
¶ So fareth it by a riotous seruaunt
Line 4408
It is wel lasse harm / to lete hym pace
Than he shende / alle the seruantz in the place
Therfore / his maister / yaf hym Acquitance
And bad hym go / with sorwe and with meschance
Line 4412
And thus this ioly prentys / hadde his leue
Now lat hym riote al the nyght / or leue
And for ther is no theef / with-oute a lowke
That helpeth hym / to wasten and to sowke
Line 4416
Of that he brybe kan / or borwe may
Anon he sente his bed / and his array
Vn to a compier / of his owene [sort [[later hand]] ]
That louede dys / and Reuel and disport
Line 4420
And hadde a wyf / that heeld for contenance
A shoppe / and swyued for hir sustenance [[22 lines & 1 leaf of the MS blank.]]