The Ellesmere ms of Chaucer's Canterbury tales / edited by Frederick J. Furnivall.

[folio 221b] ¶ Remedium contra peccatum Inuidie

[515] NOW wol I speke of the remedie / agayns the foule synne of Enuye / ¶ ffirst is the louynge of god principal / and louyng / of his neighebor as hym self /. for soothly / that oon ne may nat been / with-oute that oother /. [516] And truste wel / that in the name of thy neighebore /. thou shalt vnderstonde the name of thy brother ffor certes / alle we haue o fader flesshly / and o mooder / that is to seyn / Adam and Eue /. and eek o fader espiritueel / and that is god of heuene [517] ¶ Thy neighebore / artow holden for to loue and wilne hym alle [¶ How a man / shal loue his neighebore] goodnesse /. and therfore seith god / loue thy neighebore as thy selue / that is to seyn / to saluacion / of lyf and of soule [518] ¶ And moore ouer / thou shalt loue hym in word / and in benigne amonestynge / and chastisynge / and conforten hym / in hise anoyes / and preye for hym with al thyn herte / [519] ¶ And in dede / thou shalt loue hym in swich wise /. that thou shalt doon to hym in charitee / as thou woldest that it were doon to thyn owene persone /. [520] And therfore / thou ne shalt doon hym no damage in wikked word / ne harm in his body / ne in his catel / ne in his soule / by entissyng of wikked ensample [521] ¶ Thou shalt nat desiren his wyf ne none of hise thynges Vnderstoond eek / that in the name of neighebor / is com|prehended [¶ How in the name of neighe|bor / is compre|hended a mannes enemy] his enemy [522] ¶ certes man shal louen his enemy / by the comandement of god /. and soothly / thy freend / shaltow loue in god [523] ¶ I seye / thyn enemy / shaltow loue for goddes sake / by his comande|ment

[6-text p 631] ¶ ffor if it were reson þat a man sholde haten his enemy /. for sothe / god nolde nat receyuen vs to his loue / that been hise enemys [524] ¶ Agayns .iij. manere of [¶ How a man shal do .iij. thynges / agayns .iij. manere of thynges that his enemy dooth to hym] thynges that his enemy dooth to hym /. he shal doon .iij. thynges as thus [525] ¶ Agayns hate and rancour of herte / he shal loue hym in herte ¶ Agayns chidyng and wikkede wordes / he shal preye for his enemy ¶ And agayn wikked dede of his enemy /. he shal doon hym. bountee [526] ¶ ffor crist seith / loueth youre enemys / and preyeth for hem that speke yow harm /. and eek for hem / that yow chacen and pursewen and dooth bountee / to hem that yow haten ¶ Loo / thus comaundeth vs oure lord Ihesu crist. to do / to oure enemys /. [527] ffor soothly nature dryueth vs / to louen oure freendes /. and parfey / oure enemys / han moore nede to loue than oure freendes /. and they that moore nede haue / certes / to hem shal men doon good|nesse / [528] and certes in thilke dede / haue we remem|brance / of the loue of Ihesu crist that deyde for hise enemys /. [529] and in as muche as thilke loue / is the moore greuous to perfourne / in so muche / is the moore gretter the merite / and ther-fore the louynge of oure enemy / hath confounded / the venym of the deuel /. [530] ffor right as the deuel / is disconfited by humylitee /. right so / is he wounded to the deeth / by loue of oure enemy [531] ¶ Certes. / thanne is loue the medicine / that casteth out the venym of Enuye / fro mannes herte [532] ¶ The speces of this paas / shullen be moore largely in hir Chapitres folwynge declared . . .