[Prologue on the book of Deuteronomy.]
IN this book of Deutronomye ben contened the wordis whiche Moises spak to al Israel, in the wildernesse ouer Jordan, and declaride to hem the lawe; and schewide to hem, what goodis scholden bifalle to hem, if thei kepten the lawe, and also what yuels scholden bifalle to hem, if thei forsoken the lawe, and wurschipiden alien goddis, and the blessingis with whiche thei scholden be blessid, that kepten the lawe, and also alle the cursis bi whiche thei scholden be cursid, that breken the lawe. He delyuerede also Josue, the sone of Non, to hem, to be her leder, as he hadde be, and to departe to hem the lond of Canaan, and to counseile the Lord for hem, by Eleasar, prest. And Moises blesside the peple, and wente in to the hil of Nebo, in to the cop of Phasga, and the Lord schewide to him the lond, which he hadde bihote to Abraham, Ysaac, and Jacob, her fadris; but Moises passide not Jordan, for he hadde wraththid the Lord in desert, and Moises diede there in the hil, and the Lord biriede him, and no man knewȝ his sepulcre [This Prologue is from M.] .