[Prologue on the book of Leviticus.]
THIS book of Leuitici makith mencioun, how God tauȝte the sones of Israel, by Moyses, to offre sacrifises to the Lord of oxen, and of scheep, of lambren, and of geet; and for which synne what sacrifise owith to be doon to the Lord; and the manere of brennyng, and of offring; and that the prest preie for the offrer; and if the man is pore, and is not of power to offre beestis for his synne, he shal offre whete flour, or therf loues, or briddis. Also it is contened therinne the ordre of halewing of the bisschop, and of prestis, and of alle holi vessels of the tabernacle; and how the Lord slowȝ Nadab and Abyu, prestis, the sones of Aaron, for necligence doon in the auter. Also the Lord techith the children of Israel discrecioun bitwixe clene beestis and vnclene, and of fisschis, and of foulis, that thei vse the clene to mete, and leue the vnclene; and the verrei knowing of lepre, and he that is preued lepre to be put out of the comynycacioun of men, till he be maad clene, and to do sacrifise for his clensing. Also the Lord techith hem to fle abhomynaciouns, whiche the peple of Canaan vseden, for whiche thei weren cast out of her lond; and to kepe hise comaundementis and lawis; and to vse trewe mesure, and trewe weiȝte, in biyng and silling, for the drede of God. Here endith the prologe, and here bigynneth the book of Leuitici [This Prologue is from M.] .