The Holy Bible, containing the Old and New Testaments, with the Apocryphal books,

CAP. XVII.

[verse 1] Thanne goon forth al the multitude of the sones of Yrael fro the desert of Syn, bi her mansiouns, after the word of the Lord, `setten tentis [meuyden her tentis E pr. m.] into Raphidym, where was not [no BDEFH.] water to the puple for to drynke. [verse 2] The which ianglynge aȝens Moyses, seith, Ȝif to vs water, that we drynken. To whom answerde Moyses, What iangle ȝe aȝens me, whi tempte ȝe the Lord? [verse 3] The puple thanne thristide there, for meschef of water, and it grucchide aȝen Moyses, seiynge, Whi hast thow maad vs [Om. B.] to goo out of Egipte, that thow myȝte slee vs, and oure fre chil|dren, and beestes, thurȝ thrist? [verse 4] Moyses forsothe criede to the Lord, seiynge, What shal Y do to this puple? ȝit a litil while, and it [he E pr. m.] shal stonen me. [verse 5] The Lord seide [saith E.] to Moyses, Goo before the puple, and tak with thee of the aldren of Yrael, and the ȝerde, with the which thow smoot the floode tak in thin hoond, and goo; [verse 6] loo! Y shal stoond before thee there, vpon the stoon of Oreb, and thow shalt smyte the stoon, and there shal goon out of it water, that the puple drynk. Moyses dide so beforn the eldren men [Om. BDEF pr. m. H.] of Yrael; [verse 7] and he clepide the name of that place Temptynge, for the ianglyng of the sones of Yrael, and for thei temptiden the Lord, seiynge, Whether is God in vs, or noon? [verse 8] Forsothe Amalech cam, and fauȝte aȝen Yrael in Raphidym. [verse 9] And Moyses seide to Josue, Chees men, and thow goon out,

fiȝt aȝens Amalech, to morwen; and Y shal stoond in the frount of the hil, hau|ynge the ȝerde of God in myn hoond. [verse 10] Josue dide as Moyses had spokun, and he fauȝte aȝens Amalech. Moyses for|sothe, and Aaron, and Hur steiden vp vpon [verse 11] the cop of the hil; and whanne Moyses rereden vp the hoondes, Yrael ouercom; ellis forsothe if he a litil abatide, Ama|lech ouercam. [verse 12] Forsothe the hoondes of Moyses weren heuy; thanne thei, takynge a stoon, puttiden vnder hym, in the which he sete. Aaron forsothe and Hur sus|teyneden the hoondes of hym, on either syde; and it was doon, that the hoondes of hym werieden not, vnto the goyng down of the sunne. [verse 13] And Josue made Amalech to flee, and the puple of hym, in the mouth of the swerd. [verse 14] And the Lord seide to Moyses, Wryte this in the book for mynde, and tak in the eeris of Josue; forsothe Y shal do a wey the mynde of Amalech vnder heuene. [verse 15] And Moyses bilde an auter, and clepide the name of it The Lord myn enhaunsyng, [verse 16] seiynge, For the hoond of the Lord oonli, and the batayle of God it was aȝens Ama|lech, fro generacioun into generacioun.