The Holy Bible, containing the Old and New Testaments, with the Apocryphal books,

CAP. III.

[verse 1] Wo! thou cytee, terrere, or stirere, to wrathe, and bouȝt aȝein culuer. [verse 2] It herde not the voice, and resceyuede not disciplyne, or chastising; it tristinede not in the Lord, it neiȝide not to hir God. [verse 3] The princis therof in mydil therof as lyouns roringe; iugis therof wolues, in the euyn|tyde leften not in to morewe. [verse 4] The pro|phetis therof wode, vnfeithful men; the prestis therof defouliden holy thing, vn|iustly diden aȝeinus the lawe. [verse 5] The Lord iust in mydil therof, he shal not do wickidnesse; erly, erly he shal ȝeue his dom in liȝt, and it shal not be hid; for|sothe the wickid man wist not confu|sioun. [verse 6] Y loste folkis, and the corners of hem ben distruyed; Y made the wayes of hem desert, whijl ther is not that shal passe. The cytees of hem ben desolate, not dwellynge a man, nether eny dweller. [verse 7] Y sayde, Nethelese thou shalt dreede me, thou shalt resceyue disciplyne; and the

dwellynge therof shal not perishe, for alle thingus in whiche Y visitide it; ne|thelese ful erly thei rysynge han cor|rumpid alle her thouȝtis. [verse 8] Wherfore abyde thou me, saith the Lord, in the day of my rysyng aȝein in to comynge. For my dome is, that Y gadre folkis, and gadre rewmes; and Y shal shede out vpon hem myn indignacioun, and al the wrath of my wodenesse; forsothe in fijr of my feruour al erthe shal be deuoured. [verse 9] For thanne Y shal ȝelde to my peplis a chosen tunge, that alle in cleepen in name of the Lord, and serue to hym in oo shuldre. [verse 10] Ouer the flodis of Ethiopie, fro thennis my bisecheris, the sonys of my scaterid men, shuln brynge a ȝift to me. [verse 11] In that day thou shalt not be con|foundide vpon alle thi fyndyngis, in whiche thou trespassidist in me; for thanne Y shal take awey fro the mydil of thee the grete spekers of thi pride, and thou shalt namore putte to, for to be enhaunsid in myn holy hill. [verse 12] And Y shal leue in mydil of thee a pore peple, and nedy; and thei shuln hope in name of the Lord. [verse 13] The relikis of Yrael shuln not do wickidnesse, nether shuln speke leesyng, and a gyleful tunge shal not be funden in hem; for thei shuln be fed, and shuln reste, and there shal not be that shal fere. [verse 14] These thingus saith the Lord [Lord God A.] , Douȝter of Syon, herie thou, synge thou, Yrael; glade thou, and ful|out ioye in al thi herte, thou douȝter of Jerusalem. [verse 15] The Lord hath taken awey thi dom, he hath turned awey thin en|myes; kyng of Yrael lord [lord, lord K.] in the mydil of thee, thou shalt namore dreede yuel. [verse 16] In that day it shal be said, Jerusalem, nyl thou dreede; Syon, be not thin hondis vnknyt. [verse 17] The Lord thi God stronge in mydil of thee, he shal saaue [saaue thee G sec. m.] ; he shal enioye [ioye G sec. m.] vpon thee in gladnesse, he shal be stille in thi louyng, he shal ful enioye [out ioye AH.]

vpon thee in herying. [verse 18] Y shal gadre the foolis that wenten awey fro thi lawe, for thei weren of thee, that thou haue na|more shenshipe vpon hem. [verse 19] Loo! Y shal slea alle men that tourmentiden thee in that tyme, and Y shal saaue the halt|ynge, and Y shal gedre hir that was cast out; and Y shal putte hem in to herying, and in to name in eche lond of confu|sioun of hem, in that tyme in whiche Y [verse 20] shal leede ȝou to, and in the tyme in whiche Y shal gadre ȝou. Forsothe Y shal ȝeue ȝou in to name, and in to hery|ing to alle peplis of erthe, whanne Y shal conuerte ȝour caitifte byfore ȝour eeȝen, saith the Lord.