The Holy Bible, containing the Old and New Testaments, with the Apocryphal books,

CAP. III.

[verse 1] Lord, Y herde thi heerynge, and Y [verse 2] dredde; Lord, thi werke, in the mydil of ȝeeris quyckene thou it. In the my|dil of ȝeeris thou shalt make knowen; whan thou shalt be wrothe, thou shalt recorde of mercy. [verse 3] God shal cum fro the south, and the holy fro the mount of Pharan. The glorie of hym keuerde he|uen, and the erthe is ful of his herying. [verse 4] The shynyng shal be as liȝt; hornys in hondis of hym. [verse 5] There the strengthe of hym is hid, byfore his face deth shal go; the deuyl shal go out bifore his feet. [verse 6] He stode, and matte the erthe; he bihelde, and vnboonde folkis, and hillis of the world ben broken to gydre; the litil hillis

of the world ben bowid doun, of the wayes of his euerlastingnesse. [verse 7] For wick|idnesse Y sawȝ the tentis of Ethiopie, the skynnes of lond of Madian shuln be trublid. [verse 8] Lord, wher in flodis thou art wrothe, or in flodis thi woodnesse, or in the se thin indignacioun? Whiche shalt stye vp thin horsis; and thi foure horsid cartis saluacioun. [verse 9] Thou reysynge shalt reyse thi bowe, othis to lynagis whiche thou hast spoken; thou shalt kitte flodis of erthe. [verse 10] Watris sawen thee, and hillis sorewiden, the guter of waters passide; depnesse ȝaf his voice, heeȝnesse reyside his hondis. [verse 11] Sunne and mone stoden in her dwellynge; in the liȝt of thin arewis thei shuln goo, in the shynynge of thi spere smytynge. [verse 12] In beting of teeth thou shalt defoule erthe, and in wodnesse thou shalt astoneye folkis. [verse 13] Thou art gon out in to helthe of thi peple, in to helthe with thi crist; thou hast smyten the heued of the hous of the vnpitouse man, thou hast made nakid the foundement vn to the neckus. [verse 14] Thou cursidist the sceptris, or powers, of hym, the hed of his fiȝters, cummynge as whirlwynde for to scatere me; the ioyinge with outforth of hem, as of hym that deuourith a pore man in hidils. [verse 15] Thou madist a weye in the se to thin horsis, in cleye of manye waters. [verse 16] Y herde, and my wombe is to gydre trublid; of the voice my lippis trem|bleden to gydre. Rott entre in to my boonys, and boyle, or sprynge, vndir me; and Y shal reste aȝein in the day of tri|bulacioun, and Y shal stey vp to oure peple girde to gydre. [verse 17] Forsothe the fijge tree shal not florishe, and buriownyng shal not be in vyne ȝerdis; the werk of the olyue shal leeȝe, and feeldis shuln not brynge to mete; a sheep shal be kitt of fro the folde, and a drooue shal not be in the cratchis. [verse 18] Forsothe Y shal haue ioye in the Lord, and Y shal ioye with outeforth in God my Jhesu. [verse 19] God the

Lord my strengthe, and he shal putte my feet as of hertis; and vpon myn heeȝ thingus, the ouercummer shal leede me forth, singynge in psalmes.