CAP. XII.
[verse 1] Forsothe in that tyme Myȝhel shal rijse, the grete prince, that stondith for sonys of thi peple. And tyme shal cum, what maner was not, fro that sithen folkis bygunen for to be, vn to that tyme. And in that tyme thi peple shal be saued, eche that shuln be founden wrijten in the boke of lijf. [verse 2] And manye of these that slepten in dust of erthe, shuln wake out, other in to euerlastinge lyf, and othere in to shenship, that thei se euermore. [verse 3] Forsothe thei that shuln be tauȝt men, or wijse, shuln shyne as shynyng of the firmament, and thei that lernen, or enfourmen, manye to riȝtwijs|nesse, as sterris in to euerlastyngnessis. [verse 4] Forsothe thou, Danyel, close the wordis, and seale the boke, vn to the tyme or|deynyd;