The Holy Bible, containing the Old and New Testaments, with the Apocryphal books,

CAP. V.

[verse 1] And thou, sone of man, take to thee a sharp swerd, or rasour, shauynge heeris; and thou shalt `take it to, and thou shalt [Om. A.] lede it bi thin heed, and bi thi beerd. `And thou shalt take to thee a balaunce of weiȝt [Om. G pr. m. H.] , and thou shalt de|parte hem. [verse 2] And thou shalt brenne the thridde part in fier in the mydil of the citee, besidis the fulfilling of dais of seg|ynge. And thou takynge to the thridde part [partye H.] , shalt to gidir kitte bi swerd in cumpas of it. Sotheli thou shalt scatere in to wynd the tother thridde part; and Y shal make nakid, or vnshethe, the swerd after hem. [verse 3] And thou shalt take therof a litil noumbre, and thou shalt bynde hem in the heiȝt of thin ouer|most clooth. [verse 4] And eftsoone thou shalt take of hem, and thou shalt caste hem in to the mydil of fier. And thou shalt brenne hem in fier; and of it fier shal gon out in to al the hous of Israel. [verse 5] Thes thingis seith the Lord God, This is Jeru|salem; in the mydil of heithen men Y haue putte it, and loondis in the cumpas of it. [verse 6] And it dispiside my domys, that it were more vnpitous than heithen men;

and my maundementis more than loondis that ben in compas of it. Forsothe thei han caste a wei my domys, and thei walk|eden not in my preceptis, or heestis. [verse 7] Therfor thes thingis seith the Lord God, For ȝe han ouerpasside, or ouercomyn, heithen men that ben in ȝour cumpas, and ȝe walkeden not in myn heestis, and my domys ȝe han not doo, and ȝe han not wrouȝte aftir the domys of heithen [verse 8] men that ben in ȝour cumpas; therfor seith the Lord thes thingis, Loo! Y to thee, and Y my silf in the mydil of thee shal make domys in the eyen, or siȝt, [verse 9] of heithen men; and I shal doo in the [Om. H.] whiche thingis I dide not, and to whiche I shal namore make lijc thingis, for alle thin abhomynaciouns. [verse 10] Therfor faders shulen eete sones in the mydil of thee, and sones shulen eete her faders; and in thee I shal make domys, and I shal wyn|dewe alle thi relikis in to eche wynd. [verse 11] Therfor I lyue, seith the Lord God, no but for that that thou defoulidist myn hooli thing in alle thin offenciouns, and in alle thin abhomynaciouns; and I shal breke togider, and myn eye [eiȝen GH.] shal not spare, and Y shal not haue mercie. [verse 12] The thridde part of thee shal die bi pesti|lence, and in hungre shal be wastid in the mydil of thee; and the thridde part of thee shal falle doun bi swerd in thi compas; sotheli I shal scatere thi thridde part in to eche wynd, and I shal drawe out a swerd after hem. [verse 13] And I shal ful|fille my woodnes, and Y shal make myn indignacioun for to reste in hem, and Y shal be coumfortid. And thei shulen wite, for I the Lord spake in my feruent wraththe, whanne Y shal fulfille myn indignacioun in hem. [verse 14] And Y shal ȝeue thee in to scornynge and shenship to heithen men that ben in thi compas, in the siȝt of eche man passynge forth. [verse 15] And thou shalt be shenship and blasfemye, ensaumple and greet wondrynge, in hei|then

men that ben in thi compas, whanne Y shal doo in thee domys in woodnes, and in indignacioun, and in blamyngis of wraththe. [verse 16] Y the Lord; whanne Y shal sende the werst arewis of hungre in to hem, whiche shulen be deedly; and whom Y shal sende, that I scatere ȝou. And I shal gedre hungre vp on ȝou, and Y shal defoule in ȝou the staf of breed. [verse 17] And I shal sende in to ȝou hungre, and werste beestis, vn to deeth; and pestilence and blood shulen passe bi thee, and Y shal lede in a swerd vpon thee; I the Lord haue spokyn.