The Holy Bible, containing the Old and New Testaments, with the Apocryphal books,

CAP. XIII.

[verse 1] And the word of the Lord is maad to [verse 2] me, seiynge, Sone of man, prophecy thou to the prophetis of Israel that prophe|cien; and thou shalt sey to men pro|pheciynge of her herte, Here ȝe the word of the Lord. [verse 3] Thes thingis seith the Lord God, Woo to vnwise [the vnwyse GH.] prophetis, that suen [verse 4] her spirit, and seen no thing; as foxes in deseertis, Israel, thi prophetis weren. [verse 5] Ȝe stieden not vp forn aȝens, nether ȝe aȝen puttiden a wal for the hous of Israel,

that ȝe stoden in bataile in dai of the Lord. [verse 6] Thei seen veyn thingis, and de|uynen leesynge, seiynge, The Lord seith, whanne he sente not hem; and thei last|iden for to confeerme the word [Lord A.] . [verse 7] Whe|ther ȝe sawen not a veyn visioun, and ȝe spaken a fals dyuynynge, and seiden, The Lord seith, whanne Y spak not? [verse 8] Therfor thes thingis seith the Lord God, For ȝe spaken veyn thingis, and ȝe sawen lesynge [lesyngys H.] , therfor loo! Y to ȝou, seith the Lord God. [verse 9] And myn hoond shal be vp|on the prophetis that seen veyn thingis, and deuynen leesynge; thei shulen not be in the counseyl of my puple, and thei shulen not be writyn in the writynge of the hous of Israel, nether thei shulen entre in to the loond of Israel; and ȝe shulen wite, for I the Lord God. [verse 10] For that thei disseyueden my puple, seiynge, Pees, pees, and pees is not; and he bild|ide a wal, forsothe thei dawbeden, or pargetiden, it with fen with outen chaffis. [verse 11] Sey thou to hem that dawben, or leyn morter, with outen temperynge, that it is to fallynge doun; forsothe a reyn flow|ynge shal be, and Y shal ȝyue ful grete stoonus fallynge doun fro aboue, and a wynde of tempest distruyinge. [verse 12] Forsothe loo! the wal felle doun. Whether [Where GH.] it shal not be seid to ȝou, Wher is the [this H.] dawb|ynge, that ȝe dawbiden? [verse 13] Therfor thes thingis seith the Lord God, And Y shal make a spirit of tempestis for to breke out in myn indignacioun, and a reyn flowynge shal be in my woodnes [woodnessis GH.] , and grete stoonus in my wraththe in to wast|ynge. [verse 14] And Y shal distruye the wal, whom ȝe daubiden with outen temperynge, and I shal make it euen to the erthe; and the foundement of it shal be shewid, and it shal falle doun, and it shal be wastid in the mydil of it; and ȝe shulen wite, for Y am the Lord. [verse 15] And Y shal fulfille myn indignacioun in the wal, and in hem that dauben it with outen temperynge; and

Y shal seye to ȝou, The wal is not, and the prophetis of Israel that dauben it, [verse 16] ben not, whiche prophecien to Jerusalem, and seen to it a visioun of pees, and pees is not, the Lord God seith. [verse 17] And thou, sone of man, put thi face aȝens the douȝ|tris of thi puple, whiche prophecien of her herte; and prophecie thou of hem, [verse 18] and sey, Thes thingis seith the Lord God, Woo to hem that sewen to gidre cusshens vndir eche cubit of hoond [the hond H.] , and maken pilewis vnder the heed of eche age, for to take, or disseyue, soulis [soule A.] ; and whanne thei token the soulis of my pu|ple, thei quyckeneden the soulis of hem. [verse 19] And thei defouliden me to my puple, for an handful of barli, and [or A.] a gobet of breed, that thei slewen soulis whiche dien not, and quikeneden soulis whiche lyuen not, liynge to my puple, byleeuynge to lees|yngis. [verse 20] For this thing the Lord God seith, Loo! Y to ȝoure cusshens, bi whom ȝe taken soulis fleynge; and Y shal al to|breke hem of ȝour armes, and Y shal dis|mytte, or delyuere, the soulis for to flee, whom ȝe taken. [verse 21] And Y shal breke ȝour pilewis, and Y shal delyuere my puple fro ȝour hoond; nether thei shulen be ouer in ȝour hoondis, for to be robbid; and ȝe shulen wite, for Y the Lord. [verse 22] For that that ȝe maden [seiden A.] leeiȝyngli the herte of the iust man for to mourne, whom Y made not sorewful; and ȝe coumfortiden the hoondis of the vnpitous man, that he shulde not turne aȝen fro [for A.] hys yuel weie, and shulde lyue. [verse 23] Therfor ȝe shulen not see veyn thingis, and ȝe shulen namore deuyne dyuynacions; and I shal delyuere my puple fro ȝoure hoond, and ȝe shulen wite, for Y the Lord.