The Holy Bible, containing the Old and New Testaments, with the Apocryphal books,

CAP. XI.

[verse 1] And ther shal gon out a ȝerde fro the roote of Jesse, and a flour of his roote shal steȝen vp. [verse 2] And ther shal resten vp on hym the Spirit of the Lord, spirit of wisdam and of vnderstondyng, spirit of counseil and of strengthe, spirit of kun|nyng [verse 3] and of pite; and shal fulfille hym [hem E pr. m.] the spirit of drede of the Lord. Not aftir the seyng of eȝen he shal deme, ne after the heering of eres he shal vnder|nyme; [verse 4] but he shal deme in riȝtwisnesse pore men, and vndernymen in equyte, for the debonere of the [Om. AE sec. m. GHK.] erthe. And he shal smyte the erthe with the ȝerde of his mouth, and with the spirit of his mouth [lippis AEGHK.] he shal sle the vnpitous. [verse 5] And ther shal be riȝtwisnesse the litil girdil of his lendes, and feith the girdil of his reenes. [verse 6] Ther [And ther AE pr. m. GHK.] shal dwelle the wlf with the lome, and the parde with the kide shal leyn; the calf, and the leoun, and the shep to|gidere shul dwelle, and a lytil child shal dryue them. [verse 7] The calf and the bere shul be fed togidere; ther shul resten the whelpus of hem, and a leoun as an oxe shal ete chaf. [verse 8] And the faunt, `or a soukande childe [Om. CE pr. m.] , shal deliten of the tete vp on the hole of the eddere, and in the

caue of the kokatrice that shal be taken awei fro sok, `or wenyd [Om. C et E pr. m. or wenyng C sec. m.] , he shal putte his hond. [verse 9] Thei shuln not noȝen, and thei shuln not sleyn in al myn hoeli mounteyn; for fulfild is the erthe of the [Om. E sec. m. K.] kunnyng of the Lord, as the watir of the se couerende. [verse 10] In that dai the roote of Jesse, that stant [stondith AK.] in to tocne of puples; hym Jentiles shuln louli preȝen, and shal be the sepulcre of hym glorious. [verse 11] And it shal be in that dai, the Lord the secunde tyme shal ley to his hond to welde the residue of his puple that shal be lafte, of the Assiries, and of Egipt, and of Fecros, and of Etheope, and of Elan, and of Sennar, and of Emath, and of the [Om. GHK.] islis of the se. [verse 12] And he shal reren a tocne in to naciouns, and gedere togidere the ferr floun of Irael; and the to-scatered [scatered C sec. m.] of Juda he shal gedere fro the foure coestes of the [Om. AGH.] erthe. [verse 13] And ther shal be taken awey the enuye of Effraym, and the enemys of [Om. AC.] Juda shul pershe; Ef|fraym shal not enuyen Judam, and Juda shal not fiȝte aȝen Effraym. [verse 14] And thei shul flee in to the shuldres of Filisteys [Philisteym AEGHK.] , bi the se togidere thei shul robbe the sonus of the est; Ydume and Moab the heste of the hond of hem, and the sonus of Amon obeisaunt shul be. [verse 15] And the Lord shal make desolat the tunge of the se of Egipt, and he shal rere his hond vpon the flod in the strengthe of his spirit; and he shal smyte hym in seuene ryueres, so that thei passe thurȝ hym shod men [Om. C et E pr. m.] . [verse 16] And ther shal be a weye to my residue puple that shal be lafte, of the Assiries, as was to Irael, in the dai that he steȝede vp from the lond of Egipt.