CAP. IV.
[verse 1] The vois of Crist to the Chirche. Hou fair art thou, my leef, hou fair art thou; thin eȝen of culueres, withoute it that withynne forth is hid; thin heres as the flockes of get, that steȝeden vp fro the hil [hillis A.] of Galaad. [verse 2] Thi teth as the flockys of clippid sheep, that steȝeden vp fro the wasshing place; alle with double lombis in the wombe, and bareyn ther is not among hem. [verse 3] As a fyr red silkene filet thi lippes, and thi faire speche sweete; as the breking of a poumgarnet, so thi chekes, withoute it, that withinne forth sit [sittith A.] hid. [verse 4] As the tour of Dauid thi necke, that is bild out with pynacles; a thou|send sheldis hangen of it, al the armoure of stronge men. [verse 5] Thi two tetes as two ȝunge capretes, twynlingus [iemeus E pr. m.] of the capret, [verse 6] that ben fed in lilies, to the time that the dai brethe out, and the shadewes ben inbowed. I shal go to the mount of mirre, and to the hil of cens. [verse 7] Al fair thou art, my leef, and wem is not in thee. [verse 8] Cum thou fro Liban, my spouse; cum [cum thou A.] from Liban, cum; thou shalt be crouned fro the hed of Amana, fro the frount of Samur and of Ermon, fro the couches of leouns, and the hil of pardis. [verse 9] Thou hast woundid myn herte, my sis|ter; my spouse, thou hast woundid my herte, in oon of thin eȝen, and in oon her of thi necke. [verse 10] Hou faire ben thi tetes, my sister, my spouse; fairere ben
