PSALM LXXXVII. [ [verse 1] The song of the salm, to the sonys of Chore, in to the ende, for Melech, to answern, the vnderstonding of Eman Israelyte, or Esrayte.]
[verse 2] Lord God of myn helthe; in the dai I criede and in the nyȝte befor thee. [verse 3] Entre in thi siȝte myn orisoun; bowe in thin ere to my preȝeere. [verse 4] For fulfild is with euelis my soule; and my lif to helle neȝhede. [verse 5] I am eymed with men goende doun in to the lake; I am maad as a man [verse 6] withoute helpe, among deade men free. As woundid men slepende in sepulcris, of whom thou art no mor myndeful; and thei of thin hond ben put aȝeen. [verse 7] They putten me in the nethere lake; in derke thingus, and in shadewe [the shadewe AEH.] of deth. [verse 8] Vp on me is confermyd thi wodnesse; and alle thi flodis thou broȝtist in vp on me. [verse 9] Fer thou madest my knowen fro me; thei putten [puttiden AH.] me abhominacioun to them. [verse 10] I am traȝid [trayed A. crathed E.] , and I wente not out; myn eȝen febleden for myseise. I criede to thee, Lord; al dai I spradde out to thee myn hondis. [verse 11] Whether to deade men thou [he E pr. m.] shal do merueilis; or lechis shul reren, and knoulechen to thee? [verse 12] Whether sum man shal telle in sepulcris thi mercy; and thi treuthe in to perdicioun? [verse 13] Whe|ther shul be knowen in dercnessis thi merueilis; and thi riȝtwisnesse in the lond of forȝeting? [verse 14] And I to thee, Lord, criede; and erli myn orisoun befor shal come thee. [verse 15] Wherto, Lord, pootist thou abac myn orisoun; thou turnest awei thi face fro me? [verse 16] A pore man I am, and in trauailis fro my ȝouthe; enhauncid, meekid forsothe I am, and al disturbid. [verse 17] In me passiden thurȝ thi wrathis; and thi feeris al disturbiden me. [verse 18] They enuy|rounden me as water al day; they enuy|rounden me togidere. [verse 19] Thou longedest awei fro me frend and neȝhebore; and my knowen fro wrechidnesse.
