The Holy Bible, containing the Old and New Testaments, with the Apocryphal books,

PSALM LXX. [ [verse 1] The salm of Dauid is of the sonys of Jonadab, and of the rathere caitiues.]

In thee, Lord, I hopide; I shal not be [verse 2] confoundid in to with oute ende; in thi riȝtwisnesse deliuere me, and tac me awei. Bowe thou in to me thin ere; and saue me. [verse 3] Be thou to me in to God defendere, and in to a strengthid place; that thou make me saaf. For my fastnesse; and my refute thou art. [verse 4] My God, tac me awey fro the hond of the synnere; and fro the hond of the doere aȝen the lawe, and of the wicke. [verse 5] For thou art my pacience, Lord; Lord, myn hope fro my ȝouthe. In thee I am [verse 6] confermed fro the wombe; fro the wombe of my moder thou art my defendere. [verse 7] In thee my synging euermor; as wndring I am maad to manye; and thou a strong helpere. [verse 8] Be fulfild my mouth with preis|ing, that I synge thi glorie; al dai thi gretnesse. [verse 9] Ne throwe thou me aferr in

time of elde; whan shal faile my vertue, ne forsake thou me. [verse 10] For myn enemys seiden to me; and thei that kepten my soule counseil maden in to oon. [verse 11] Seiende, God hath forsaken hym, pursueth, and taketh hym; for ther is not that take awey. [verse 12] God, ne be thou longid awei fro me; my God, in to myn helpe behold. [verse 13] Be thei confoundid, and faile thei, bac|bitende to my soule; be thei couered with confusioun and shame, that sechen euelis to me. [verse 14] I forsothe euermor shal hopen; and casten to vp on alle thi preising. [verse 15] My mouth shal befor telle thi riȝtwisnesse; al dai thin helthe ȝiuere. For I knew not lettrure, I shal gon in [verse 16] to the poweris of the Lord; Lord, I shal han mynde of thi riȝtwisnesse alone. [verse 17] God, thou hast taȝt me fro my ȝouthe, and vn to now; I shal telle forth thi merueilis. [verse 18] And vn to the laste age, and the laste ende of it; God, ne forsake thou me. To the time that I telle out thin arm; to alle ieneracioun that is to come. Thi power, [verse 19] and thi riȝtwisnesse, God, vn to the he|ȝeste grete thingus that thou didist; God, who is lic to thee? [verse 20] Hou grete thou hast shewid to me tribulaciouns, manye and euele, and al turned thou hast quyk|ened me; and fro the depnessis of the erthe eft thou hast aȝeen broȝte me. [verse 21] Thou hast multiplied thi grete doing; and al turned thou hast coumfortid me. [verse 22] For and I shal knouleche to thee in vesselis of salm thi treuthe, God; I shal do salm to thee in an harpe, thou holi of Irael. [verse 23] Ful out shul ioȝe my lippis, whan I shal synge to thee; and my soule, that thou aȝeen boȝtist. [verse 24] But and my tunge al dai shal sweteli thenke thi riȝtwisnesse; whan confoundid and shamefastly aferd shul ben that sechen euelis to me.