The Holy Bible, containing the Old and New Testaments, with the Apocryphal books,

PSALM LXII. [ [verse 1] The salm of Dauyd, whan he was in the [Om. A.] desert of Ydume.]

[verse 2] God, my God, to thee fro liȝt I wake. My soule thristide in thee; hou manyfold to thee my flesh. [verse 3] In a desert erthe and withoute weie, and with oute water, so in holi I aperede to thee; that I shulde see thi vertu, and thi glorie. [verse 4] For betere is thi mercy vpon lyues; my lippis shul preise thee. [verse 5] So I shal blesse thee in my lif; and in thi name I shal reren vp myn hondus. [verse 6] As bi talȝ and fatnesse be fulfild my soule; and with lippis of ful out

ioȝing my mouth shal preise. [verse 7] So I was myndeful of thee vp on my bedding, in the morutidis I shal sweteli thenken in thee; for thou were [was AH.] myn helpere. [verse 8] And in the coueryng of thi wengus I shal ful [verse 9] out ioȝe, my soule cleuede to after thee; me thi riȝthond vndirtoc. [verse 10] Thei forsothe in to veyn soȝten my soule, they shul go in to the nethermor partis of the erthe; [verse 11] thei shul be taken in to the hond of swerd, the partis of foxis thei shul be. [verse 12] The king forsothe shal gladen in God, and ther shul be preisid alle that swern in hym; for stoppid is the mouth of men spekende wicke thingus.