The Holy Bible, containing the Old and New Testaments, with the Apocryphal books,

PSALM XXVIII. [ [verse 1] The salm of Dauid, in the endynge of the tabernacle.]

Bringeth to the Lord, ȝee sones of God [men A.] ; bringeth to the Lord sones of wetheres. [verse 2] Bringeth to the Lord glorie and wrshipe; bringeth to the Lord glorie to his name; honoureth the Lord in his holi halle. [verse 3] The vois of the Lord vp on watris, God of mageste in thun|drede; the Lord vp on many watris. [verse 4] The vois of the Lord in vertue; the vois of the Lord in gret doing. [verse 5] The vois of the Lord togidere brekende cedris [cedre trees AH.] ; and the Lord shal to-breke the cedris of Liban. [verse 6] And he shal to-poone them as the calf of Liban; and the loouede as the sone of the

vnycornes. [verse 7] The vois of the Lord betwe [betwene AH. betwen E.] [verse 8] brekende the flaume of fyr, the vois of the Lord hurtlende togidere desert; and the Lord shal to-stere the desert of Cades. [verse 9] The vois of the Lord befor greithende herttys, and he shal opene the derk thingus; and in his temple alle shul sey glorie. [verse 10] The Lord maketh the flod to duellen in; and the Lord shal sitte king with oute ende. [verse 11] The Lord shal ȝiuen vertue to his puple; the Lord shal blisse to his puple in pes.