PSALM XXIII. [ [verse 1] The salm of Dauid, in the first of the wike.]
Off the Lord is the erthe, and the plente of it; the roundnesse of londis, and alle that duellen in it. [verse 2] For he vpon the ses foundede it; and vp on the flodis befor greithide it. [verse 3] Who shal steȝen vp in to the hyl of the Lord; or who shal stonde in his holy place? [verse 4] The innocent in hondis, and in clene herte, that toc not to [Om. A.] in veyn his soule; ne swor in treccherie to hys neȝhebore. [verse 5] This shal take blessing of the Lord; and mercy of God his helthe ȝiuere. [verse 6] This is the ieneracioun of men sechende God; of men sechende the face of God of Jacob. [verse 7] Doth awei ȝoure ȝatus, ȝee princis; and beth rerid out, ȝee euer lastende ȝatis, and ther shal gon in the king of glorie. [verse 8] Who is this king of glorie? a Lord strong and myȝti, a Lord myȝti in bataile. [verse 9] Doth awei ȝoure ȝatis, ȝee princis; and beth rered vp, ȝee euer lastende ȝatis, and ther shal gon in the king of glorie. [verse 10] Who is this [this the A.] king of glorie? the Lord of vertues, he is king of glorie.
