PSALM XV. [Of the title, the inscripcioun to hym Dauid.]
[verse 1] Kep me, Lord, for I hopide in thee; [verse 2] I seide to the Lord, My God art thou; for of my goodis thou nedist not. [verse 3] To the seintis that ben in the lond of hym; he made merueilous alle my willis in hem. [verse 4] Ther ben multiplied the infirmytes of hem; aftirward thei heeȝeden to. I shal not gadere togidere the conuenticulis of hem of blodis; ne I shal be myndeful of the namys of hem bi my lippis. [verse 5] The Lord the part of myn eritage, and of my chalis; thou art, that shalt restore myn eritage to me. [verse 6] Cordis fellen to me in ful cleer thingis; forsothe myn eritage ful cler is to me. [verse 7] I shal blisse the Lord, that ȝaf to me vnderstondinge; ouermor [euer more AH.] `and vnto [in to A.] the nyȝt myche [Om. A.] blameden me my reenys. [verse 8] I purueiede the Lord in my siȝte euermor; for fro the riȝt partis he is to me, lest I be with moued. [verse 9] For that gladede myn herte, and ful out ioȝede my tunge; furthermor and my flesh shal aȝeen resten in hope. [verse 10] For thou shalt not forsake my soule in helle; ne ȝiue thin halewe to seen corupcioun. Knowen to me thou hast maad the weies of lif; thou shalt fulfille me therto in gladnesse with thi chere; delitingus in thi riȝtt hond vnto the ende.