PSALM CXLIX. [ [verse 1] Alleluia.]
Singeth to the Lord a newe song; hys preising in the chirche of halewis. [verse 2] Glade Irael in hym that made hym; and the doȝtris of Sion ful out ioȝe thei in ther kyng. [verse 3] Preise thei the name of hym in quer; in timbre and sautre do they salm to hym. [verse 4] For wel plesid is to the Lord in his puple; and he enhauncide the de|bonere in to helthe. [verse 5] Halewys shul ful out ioȝen in glorie; thei shul gladen in ther bed placis. [verse 6] The ful out ioȝingus of God in the throte of hem; and the swerdis on eithir side sharp in the hondis of hem. [verse 7] To be do veniaunce in naciouns; and blamyngis in puplis. [verse 8] To ben bounde the kingis of hem in fettris; and the noble men of hem in irene manyclis. [verse 9] That thei do in hem dom writen; glorie this is to alle the seintis of hym [hem A.] .