The Holy Bible, containing the Old and New Testaments, with the Apocryphal books,

CAP. VIII.

[verse 1] Answerende forsothe Baldach Suythes [verse 2] seide, Hou longe shalt thou speke suche thingus? Ther is a manyfold spirit of the woord of thi mouth. [verse 3] Whether God sup|plauntith dom, and the Almyȝti turneth vpso doun, that is riȝtwis? [verse 4] Also if thi sonys synneden to hym, and lafte them [verse 5] in the hond of ther wickidnesse; thou nerthelatere [neuerthelater AEFH.] , if thou erli to gidere risist to God, and the Almyȝti haddest preȝid, [verse 6] if clene and riȝtwis thou gost, anoon he shal waken out to thee, and maad pesible the dwelling place of thi riȝtwisnesse he [verse 7] shal ȝelde; in so myche that thi rather|more weren litle, and thi laste thingis shuln be multiplied ful myche. [verse 8] Forsothe aske the rathermor ieneracioun, and bi|sili enserche the mynde of the faders.

[verse 9] Forsothe wee ben as ȝistai [ȝisterday AH.] born, and wee han vnkunnyng; for as shadewe oure daȝis ben vp on erthe [the erthe A.] . [verse 10] And thei shul teche thee, and speke to thee, and fro thin herte shul bringe forth spechis. [verse 11] Whether a resshe may liuen withoute humour? or reeddi place growe with oute water? [verse 12] Whanne ȝit [Om. A.] it be in flour, and be it not taken with hond, beforn alle erbis it waxeth drie. [verse 13] So the weies of alle men, that forȝeten God; and the hope of an ipocrite shal pershe. [verse 14] To hym shal not plese his couwardise, and as the web of attercoppis, his trost. [verse 15] He shal lene vp on his hous, and it shal not stonde; he shal vnder setten it, and it shal not rise [arijsen AEFH.] . [verse 16] Moiste semeth the resshe, befor the sunne come; and in his springing the buriownyng of it shal gon out. [verse 17] Vp on an hep of stones his rootis shul be maad thicke, and among the stonys it shal dwelle. [verse 18] And if it pulle it vp fro his place, it shal denyen hym, and seyn, I knew not thee. [verse 19] This forsothe is the gladnesse of his weie, that eft fro the erthe othere be buriouned. [verse 20] God shal not throwen aferr the symple, ne putten hond [verse 21] to shrewis; to the time that thi mouth be fulfild with laȝhing, and thi lippis with ioȝe. [verse 22] Thei that hateden thee shul be clad with confusioun; and the taber|nacle of vnpitouse men shal not stonde stille.