The Holy Bible, containing the Old and New Testaments, with the Apocryphal books,

[This prologue is from p.] As the apostil that cowde alle langagis, wroot the pistil to Romans in Latyn, so he wroot this pistil in Greek. Therfor as in the formere pistil he comendith grace, so in this pistil he discreueth sacramentis, in whiche grace is ȝouen. Therfore in the firste pistil he techeth Co|rinthis of the sacramentis of holy chirche, and in the secunde pistil, of the mynystris of sacra|mentis. A postille here.—Poul wroot this pistil to Corinthis, that ben of Acaie. Corinthis weren conuerted of the apostil him silf, whiche bi Goddis comaundement was resident at hem a ȝere and vj. monethis, and tauȝte Goddis word among hem; but aftirward thei weren peruertid in manie maners bi false apostlis, so that thei departiden the vnyte of holi chirche, that is, cristen feith, and so pees of the chirche; and thei deniede the vertues and the valu of sacra|mentis, bi the meritis of mynystris. For thei gesside, that the sacramentis weren of sum valu, if thei weren tretid of goode men, and off more or of lasse valu, if thei weren ȝeuen of more goode men. Aftir, he repreueth hem of the lecchour, whom thei suffriden among hem, that heeld the wijf of his fadir. Aftir, he repreueth hem for fraude among hem silf. And aftir, he techith hem of matrymonye, and of takynge of the sacrament of the auter, where thei erride ful miche, and of manye othere thingis; and aboute the eende of the pistil he settith a moral, excitynge, that is, to fle synnus, and loue and holde vertues.