CAP. XXI.
[verse 21] And Ezechie slepte with his fadirs, and Manasses, his sone, regnede for hym. [verse 1] Of twelue ȝeer was Manasses, whanne he beganne to regnen, and fyue and fourty ȝeer he regnede in Jerusalem; the name of his modir, Asiba. [verse 2] And he dide euyl in the siȝt of the Lord, after the mawmettis of Gentils, the whiche the Lord dide aweye fro the face of the sonys of Yrael. [verse 3] And he is turned, and bylde [bieldide A.] up heeȝe thingis, the whiche Ezechie, his fadir, scatirde; and he rerede up the auters of Baal, and maad mawmett woddis, as dyde Achab, kyng of Yrael; and he honourede al the knyȝthod of heuen, and heryede it. [verse 4] And he maad up autirs in the hous of the Lord, of the whiche the Lord seide, In Jeru|salem I schal putten my name. [verse 5] And he maad up autirs of alle the knyȝthode of heuen in [and A.] two poorchis of the temple of [verse 6] the Lord; and he ouerladde his sone thorȝ fijr; and he dyuynede, and he weytide the dyuynynge of chiterynge of briddis; and maad enchaunteris, and clepers of deuyls he multiplied, that he dide euyl beforn the Lord, and terrede hym. [verse 7] And he putte the mawmett of the mawmett wodde, that he hadde maad, in to the temple of the Lord, vpon the whiche the Lord spac to Dauid, and to Salomon, his