The Holy Bible, containing the Old and New Testaments, with the Apocryphal books,

CAP. XX.

[verse 1] In tho dayes sijknede Ezechias vnto the deeth; and there cam to hym Ysayas, the sone of Amos, prophete, and seyde [seith A.] to hym, Thes thingis seith the Lord God, Comaunde to thin hous, forsothe thou schalt dyen, and not lyuen. [verse 2] The whiche turned his face to the wall, and honourede [verse 3] the Lord, seyinge, I beseche, Lord, haue mynde, how I haue goon before thee in treuthe, and in perfyte herte, and that is plesaunt before thee haue [I haue AC pr. m.] done. And so Ezechias wepte with grete weepynge. [verse 4] And ere Ysay were gon out the half partye of the porche, the word of the [verse 5] Lord is done to hym, seyinge, Turne aȝeyn, and sey to Ezechie, the duke of my puple, Thes thingis seith the Lord of Dauid, thi fadre, I haue herd thi preyer, and seen thi tere, and, loo! I have helid thee. The thrid day thou schalt steyȝen up to the temple of the Lord, [verse 6] and I schal adden to thy days fyueteen ȝeer; bot and fro the hond of the kyng of Assiries I schal delyueren thee, and this cytee, and I schal defenden this cyte for me, and for Dauid, my seruaunt. [verse 7] And Ysay seyde, Bryngith to me a masse of fijgis. The whiche whan thei hadden brouȝt to, and putte vpon his botche, he is heelid. [verse 8] Ezechie forsothe seide to Ysay, What schal ben the tokne, for the Lord schal helyn me, and for the thrid day

I am to steyȝen up the temple of the Lord? [verse 9] To whom seith Ysay, This schal ben the tokne fro the Lord, that the Lord be to do the word that he spac; wylt thou, that vmbre steyȝe up tenn lynys, or that it be turned aȝeyn as fele grees? [verse 10] And Ezechie seith, It is liȝt vmbre to cresen tenn lynis, ne this I wylle that be done, bot that it be turned aȝeyn bac|ward tenn degrees. [verse 11] And so Ysay, the prophete, inwardly clepyde the Lord, and brouȝt aȝeyn the vmbre by the lynys, with the whiche nowe it hadde goon doun in the orloge of Achaz, bacward tenn degrees. [verse 12] In that tyme sente Berodachaladam, the sone of Baladam, kyng of Babyloyne, lettris and ȝiftis to Ezechie; forsothe he hadde herd, that Ezechie was sijk, and hadde couerde. [verse 13] And Ezechias gladide in the commynge of hem, and schewide to hem the hous of swote spycis [oynementis E pr. m.] , and gold, and siluer, and dyuerse pymentis, and oynementis, and the hous of his vessels, and alle thingis that he myȝt han in his tresouries; ther was not a word, that Ezechie schewide not to hem in his hous, and in alle his power. [verse 14] Forsothe Ysay, the prophete, came to kynge [the kynge B.] Ezechie, and seide to hym, What seyden thes men, or whenns camen thei to thee? To whome seith Ezechie, Fro a ferre lond thei camen to me, fro Babyloyne. [verse 15] And he answerde, What seeȝen thei in thin hous? Ezechie seith, Alle thingis, what euer ben in myn hous, thei seeȝen; no thing is that I haue not schewide to hem in my tresuries. [verse 16] And so Ysay seyde to Ezechie, Heere thou the word of the Lord. [verse 17] Lo! days commen, and alle thingis that ben in thi hous schuln be taken aweye, and the whiche thi fadirs hydden vnto this day, in to Babyloyne; ther schal not leuen eny thinge, seith the Lord. [verse 18] Bot and of thi sonys, that schul goon out of thee, the

whiche thou schalt geten schul ben taken aweye, and thei schul ben geldyngis in the paleys of the kyng of Babyloyne. [verse 19] Ezechie seide to Ysay, Good is the word of the Lord, that he spac; be oonly pees and treuthe in my days. [verse 20] The remnaunt forsothe of the wordis of Ezechie, and alle his streyngthe, and howe he maad the fische poond, and the watre cundite, and brouȝten in watirs in to the cytee, whether not thes ben writen in the boke of the wordys of the days of kyngis of Juda?