CAP. XXIX.
[verse 1] Thanne alle the companyes of Phi|listeis ben gadred in Aphech, but and Irael sette tentis vpon the welle that was in Jezrael. [verse 2] Forsothe and the maistris of Philisteis wenten in hundredis and thou|sandis; forsothe Dauid and his men weren in the last companye with Achis. [verse 3] And the princis of Philisteis seiden to Achis, What to hem self wolen thes Ebrews? And Achis seith to the princys of Philisteis, Whether knowe ȝe not Da|uid, that was seruaunt to Saul, kyng of Irael? and is anentis me manye days or ȝeeris, and I founde not in hym eny thing, fro the dai that he ouer fleiȝ to me vnto this dai. [verse 4] Forsothe the princis of Philisteis ben wrooth aȝens hym, and seiden to hym, The man turne aȝen, and sitt in his place, in the which I haue sett hym, and dessende he not with vs into batail, lest he be maad to vs aduersarye, whanne we bigynnen to fiȝte; forsothe what maner wise other wise he shal mowe plese his lord, but in oure heedis? [verse 5] Whether is not this Dauid, to whom thei syngen in dauncis, seiynge, Saul hath smyten in his thousandis, and Dauid in his ten thousandis? [verse 6] Thanne Achis clepide Dauid, and seide to hym, The Lord lyueth; for riȝt thou ert, and good in my siȝt, and thi goynge out and thin incomynge with me is in the tentis, and I haue not founden in thee eny thing of yuel, fro the dai that thou cam to me vnto this dai; but to the maistris thou plesist not. [verse 7] Turn thanne aȝen, and go in pees, and offend thou not the eyen of the
