The Holy Bible, containing the Old and New Testaments, with the Apocryphal books,

CAP. XV.

[verse 1] And Samuel seide to Saul, The Lord sente me, that I anoynte thee into kyng vpon his puple Yrael; nowe thanne here the voys of the Lord. [verse 2] Thes thingis seith the Lord of oostis, I haue remembrid alle thingis that Amalech dide to Yrael; what maner wyse he withstood to hym in the weye, whanne he shulde stye vp fro Egipt. [verse 3] Nowe thanne go, and smyte Amalech, and destruy alle the thingis of hym; ne spare thou to hym, ne coueyt thou eny thing of his [this B.] thingis; but sle fro man vnto womman, and litil child, and soukynge, oxe, and sheep, and camel, and asse. [verse 4] And so Saul comaundide to the puple, and noumbrede hem as loombs two hundrid thousandis of foot men, and ten thow|sandis of the men of Juda. [verse 5] And whanne Saul was comen vnto the cyte of Ama|lech, he leyde out aspies in the streem. [verse 6] And Saul seide to Cynee, Goth hens, goth a wey, and departith fro Amalech, lest perauenture I enwrappe thee with hem; forsothe thou didist mercy with alle the sones of Yrael, whanne thei sti|eden vp fro Egipt. And Cynee wente a wey fro the mydil of Amalech. [verse 7] And Saul smoot Amalech fro Euila, to the tyme that he cam to Sur, that is fro the regioun of Egipt. [verse 8] And he took Agage, the kyng of Amalech, on lyue; forsothe al the comoun he slewȝ in the mouth of swerd. [verse 9] And Saul sparide, and the puple, to Agag, and to the best flockis of sheep, and of drouys, and to clothis, and to wetheris, and to alle thingis that weren fayre; ne thei wolden scatere hem; for|sothe what thing was foul and reprouable that thei destruyden. [verse 10] Forsothe the word of the Lord is doon to Samuel, seiynge,

[verse 11] It othinkith me, that I haue ordeyned Saul a kyng; for he hath forsokyn me, and my wordis he hath not fulfillid in dede. And Samuel is sory, and cryede to the Lord al nyȝt. [verse 12] And whanne fro niȝt Samuel was rysen that he go to Saul eerli, it is toold to Samuel, for Saul was comen into Carmeel, and hadde arerid to hym an out shynynge tokne of victory in maner of a bow, and turned was passid, and goon doun into Galgala. Thanne Samuel cam to Saul, and Saul offred brent sacrifice to the Lord of the cheef of the preiys, that he brouȝte fro Ama|lech. [verse 13] And while Samuel was comen to Saul, Saul seide to hym, Thou blessid of [bi E pr. m.] the Lord, Y haue [ha C.] fulfillid the word of the Lord. [verse 14] And Samuel seide, And what is this voys of flockis that rengith in myn eeris, and of droues that I here? [verse 15] And Saul seith, Fro Amalech men han brouȝt thes thingis, forsothe the puple sparede to the betre sheep and drouys, for thei shulden be offrid to the Lord thi God; the tother forsothe we slewen. [verse 16] And Samuel seide to Saul, Suffre me, and I shal shewe to thee what thingis the Lord hath spoken to me to nyȝt. And he seid to hym, Spek. [verse 17] And Samuel seith, Whether not, whanne thou were a litil child in thin owne [ownth E.] eyen, and thou art maad heed in the lynage of Yrael, and the Lord anoyntide thee into kyng vpon [verse 18] Yrael; and the Lord sente thee into the weye, and seith, Go, and sle the synful men of Amalech, and thou shalt fiȝt aȝens hem vnto the slauȝter of hem. [verse 19] Whi thanne hast thow not herd the voys of the Lord, but turnedist to the preye, and didist yuel in the eyen of the Lord? [verse 20] And Saul seith to Samuel, If I haue herd the voys of the Lord, and haue

goon in the weye bi the which the Lord sente me, and haue brouȝt Agag, the kyng of Amalech, and Amalech Y slewe. [verse 21] Forsothe the puple took of the praye, sheep and oxen, the cheef of hem that ben slayn, that thei offren to the Lord her God in Galgalis. [verse 22] And Samuel seith, Whether wole the Lord brent sacrifices or slayn offryngis, and not more that it be obeishid to the voice of the Lord? Forsothe betre is obeishaunce than slayn sacrificis, and to take heed more than to [verse 23] offre the fatnes of wetheris; for as synne of denyynge bi deuelis is to repugne, and as hidows trespas of mawmetrye to wiln not assent. Forthi thanne that thow hast throwen aweye the word of the Lord, the Lord hath throwen awey thee, that thow be not kyng. [verse 24] And Saul seide to Samuel, Y haue synned, for [and B.] I haue broken the word of the Lord, and thi wordis, dredynge the puple and obeish|ynge [verse 25] to the voyce of hem; but nowe, Y biseche, bere my synne, and turne aȝen with me, that I honoure the Lord. [verse 26] And Samuel seith to Saul, Y shal not turne aȝen with thee, for thow hast throwen a wey the word of the Lord, and the Lord hath throwen a wey thee, that thow be not kyng vpon Irael. [verse 27] And Samuel turnede forto goo awey; forsothe he cauȝte the cop of the mantil of hym, the which also is rent. [verse 28] And Samuel seide to hym, The Lord hath kyt the kyngdam of Yrael fro thee to day, and hath takyn [verse 29] it to thi neiȝbore beter than thow; for|sothe to the ouercomer in Yrael he shal not spare, and thurȝ a thenkynge he shal not be bowid; forsothe ne a man he is that he do othenkynge. [verse 30] And he seith, Y haue synned; bot nowe honour me [Om. A.] before the eldren of my puple, and be|fore

Yrael; turne aȝen with me, that I honour the Lord thi God. [verse 31] Thanne Sa|muel, turned aȝen, folwide Saul, and Saul honourede the Lord. [verse 32] And Samuel seide, Bringith to me Agag, the king of Ama|lech. And offrid is to him Agag alther|fattest tremblynge. And Agag seide, So whether `not seuereth [ne seuere E pr. m.] bitter deth? [verse 33] And Samuel seith, As thi swerd hath maad wymmen withouten free children, so thi moder shal be with out free children among wymmen. And Samuel hewide [hewȝ E.] hym into gobbetis before the Lord in Galgalis. [verse 34] Forsothe Samuel ȝede into Ra|matha; forsothe Saul stiede vp into his hows in Gabaa. [verse 35] And Saul sawȝ no more Samuel vnto the day of his deth; neuer|thelater Samuel weilide Saul, for it othouȝt [othorȝt A.] the Lord, that he hadde or|deynyd Saul kyng vpon Irael.