The Holy Bible, containing the Old and New Testaments, with the Apocryphal books,

CAP. VII.

[verse 1] And the word of the Lord was maad [verse 2] to me, `and he seide [seiynge I.] , And thou, sone of man, the Lord God of the lond of Israel seith these thingis, The ende cometh, the ende cometh, on foure coostis of the lond. [verse 3] Now an ende is on thee, and Y shal sende in my strong veniaunce on thee, and Y schal deme thee bi thi weies, and Y schal sette alle thin abhomynaciouns aȝens thee. [verse 4] And myn iȝe shal not spare on thee, and Y schal not do mercy. But Y shal sette thi weies on thee, and thin abhomynaciouns schulen be in the myddis of thee; and ȝe

schulen wite, that Y am the Lord. [verse 5] The Lord God seith these thingis, O [Lo! INS.] turment, [verse 6] lo! turment cometh; the ende cometh, the ende cometh; it schal wake fulli aȝens thee; lo! it cometh. [verse 7] Sorewe cometh on thee, that dwellist in the lond; the tyme cometh, the dai of sleyng is niȝ, and not of glorie of hillis. [verse 8] Now anoon [of neiȝ CEFHIKMQRSU.] Y schal schede out myn ire on thee, and Y schal fille my strong veniaunce in thee; and Y schal deme thee bi thi weies, and Y schal putte to thee alle thi grete trespassis. [verse 9] And myn iȝe schal not spare, nether Y schal do merci; but Y schal putte on thee thi weies, and thin abhomynaciouns schulen be in the myddis of thee; and ȝe schulen wite, that Y am the Lord smytynge. [verse 10] Lo! the dai, lo! it cometh; sorewe is gon out. A ȝerde flouride, pride buriownede, wickid|nesse [verse 11] roos in the ȝerde of vnpitee; not of hem, and not of the puple, nether of the sown of hem, and no reste shal be in hem. [verse 12] The tyme cometh, the dai neiȝede; he that bieth, be not glad, and he that sillith, mourne not; for whi ire is on al the puple therof. [verse 13] For he that sillith, schal not turne aȝen to that that he seelde, and ȝit the lijf of hem is in lyueris; for whi the reuela|cioun [visioun, ether reuelacioun CFGHKMQSUX. visioun EINPR.] to al the multitude therof shal not go aȝen, and a man schal not be coum|fortid in the wickidnesse of his lijf. [verse 14] Synge ȝe with a trumpe, alle men be maad redi, and noon is that schal go to batel; for whi my wraththe is on al the puple therof. [verse 15] Swerd is with out forth, pestilence and hungur with ynne; he that is in the feeld, schal die bi swerd; and thei that ben in the citee, schulen be deuourid bi pestilence and hungur. [verse 16] And thei schulen be sauyd that fleen of hem; and thei schulen be as culueris of grete valeis in hillis, alle quakynge, ech man in his wickidnesse. [verse 17] Alle hondis schulen be aclumsid, and alle knees schulen flowe with watris. [verse 18] And thei schulen girde hem with heiris, and inward drede schal hile hem; and schen|schipe schal be in ech face, and ballid|nesse

schal be in alle the heedis of hem. [verse 19] The siluer of hem schal be cast out, and the gold of hem schal be in to a dunghil; the siluer of hem and the gold of hem schal not mowe delyuere hem in the dai of the strong veniaunce of the Lord. Thei schulen not fille her soule, and the wombis of hem schulen not be fillid; for it is maad the sclaundre of hir wickidnesse. [verse 20] And thei setteden the ournement of her brochis in to pride; and thei maden of it the ymagis of her abhomynaciouns and simylacris. For this thing Y ȝaf it to hem, in to vn|clennesse. [verse 21] And Y schal ȝyue it in to the hondis of aliens, to rauysche, and to the vnpitouse men of erthe, in to prey, and thei schulen defoule it. [verse 22] And Y schal turne awei my face fro hem, and thei schulen defoule my priuyte; and harlotis [harlotis, ether messangeris CEFGHMNPQRSUXY. harlotis, ether messagers K.] schulen entre in to it, and schulen defoule it. [verse 23] Make thou a closyng to gidere; for the lond is ful of doom of bloodis, and the citee is ful of wickidnesse. [verse 24] And Y schal brynge the worste of hethene men, and thei schulen haue in possessioun the housis of hem; and Y schal make the pride of miȝti men to ceesse, and enemyes schulen haue in possessioun the seyntuaries of hem. [verse 25] In anguysch comynge aboue thei schulen seke pees, and it schal not be. [verse 26] Disturblyng schal come on disturblyng, and heryng on heryng; and thei schulen seke of the pro|fete a reuelacioun, and lawe shal perische fro the preest, and counsel fro eldre [the eldre I.] men. [verse 27] The kyng schal mourne, and the prince schal be clothid in weilyng, and the hondis of the puple of the lond schulen be dis|turblid; bi the weie of hem Y schal do to hem, and bi the domes of hem Y schal deme hem; and thei schulen wite, that Y am the Lord.