The Holy Bible, containing the Old and New Testaments, with the Apocryphal books,

CAP. XXXVIII.

[verse 1] And the word of the Lord was maad [verse 2] to me, and he seide, Thou, sone of man, Sette thi face aȝens Gog, and aȝens the lond of Magog, the prince of the heed of Mosoch and of Tubal; and profesie thou of hym. [verse 3] And thou schalt seie to hym, The Lord God seith these thingis, A! Gog, lo! Y to thee, prince of the heed of [verse 4] Mosoch and of Tubal; and Y schal lede thee aboute, and Y schal sette a bridil in thi chekis, and Y schal leede out thee, and al thin oost, horsis, and horsmen, alle clothid with haburiouns, a greet multitude of men, takynge spere, and scheeld, and swerd. [verse 5] Perseis, Ethiopiens, and Libiens with hem, alle ben araied with scheeldis and helmes. [verse 6] Gomer, and alle the cum|penyes of hym, the hous of Togorma, the sidis of the north, and al the strengthe therof, and many puplis ben with thee. [verse 7] Make redi, and araye thee, and al thi multitude which is gaderid to thee, and be thou in to comaundement to hem. [verse 8] Aftir many daies thou schalt be visitid, in the laste of ȝeeris thou schalt come to the lond, that turnede aȝen fro swerd, and was gaderid of many puplis, to the hillis of Israel that weren desert ful ofte; this was led out of puplis, and alle men dwellide tristili ther ynne. [verse 9] Forsothe thou schalt stie [stie vp I.] , and schalt come as a tempest, and as a cloude, for to hile the lond, thou,

and alle thi cumpanyes, and many puplis with thee. [verse 10] The Lord God seith these thingis, In that dai wordis schulen stie on thin herte, and thou schalt thenke the [verse 11] worste thouȝt; and schalt seie, Y schal stie [stie vp I.] to the lond with out wal, and [Om. I.] Y schal come to hem that resten and dwellen sikirli; alle these dwellen with out wal, [verse 12] barris and ȝatis ben not to hem; that thou rauysche spuylis, and asaile prei; that thou brynge in thin hond on hem that weren forsakun, and afterward re|storid, and on the puple which is gaderid of hethene men, that bigan to welde, and to be enhabitere of the nawle of erthe. [verse 13] Saba, and Dedan, and the marchauntis of Tharsis, and alle the liouns therof schulen seie to thee, Whether thou comest to take spuylis? Lo! to rauysche prey thou hast gaderid thi multitude, that thou take awei gold and siluer, and do awei purtenaunce of houshold and catel, and that thou rauysche preyes with out noumbre. [verse 14] Ther|for profesie thou, sone of man; and thou schalt seie to Gog, The Lord God seith these thingis, Whether not in that dai, whanne my puple Israel schal dwelle [verse 15] tristili, thou schalt wite; and schalt come fro thi place, fro the sidis of the north, thou, and many puplis with thee, alle stieris of horsis, a greet cumpany, and [verse 16] an huge oost; and thou as a cloude schalt stie on my puple Israel, that thou hile the erthe? Thou schalt be in [on N.] the laste daies, and Y schal brynge thee on my lond, that my folkis wite, whanne Y schal be ha|lewid in thee, thou Gog, bifor the iȝen of them. [verse 17] The Lord God seith these thingis, Therfor thou art he of whom Y spak in elde daies, in the hond of my seruauntis, profetis of Israel, that profesieden in the daies of tho tymes, that Y schulde bringe thee on hem. [verse 18] And it schal be, in that dai, in the dai of the comyng of Gog on the lond of Israel, seith the Lord God, myn indignacioun schal stie in my strong

[verse 19] veniaunce, and in my feruour; Y spak in the fier of my wraththe. [verse 20] For in that dai schal be grete mouyng on the lond of Israel; and fischis of the see, and beestis of erthe, and briddis of the eir, and ech crepynge beeste which is mouyd on erthe, and alle men that ben on the face of erthe, schulen be mouyd fro my face; and hillis schulen be vndurturned, and heggis schu|len falle doun, and ech wal schal falle doun in to erthe [the erthe IS.] .