The Holy Bible, containing the Old and New Testaments, with the Apocryphal books,

CAP. XXXV.

[verse 1] And the word of the Lord was maad to [verse 2] me, and he seide, Thou, sone of man, sette thi face aȝens the hil of Seir; and thou schalt profesie to it, and thou schalt seie [verse 3] to it, The Lord God seith these thingis, Thou hil of Seir, lo! Y to thee; Y schal stretche forth myn hond on thee, and Y schal ȝyue thee desolat and forsakun. [verse 4] Y schal distrie thi citees, and thou schalt be forsakun; and thou schalt wite, that Y am the Lord. [verse 5] For thou were an enemye euer|lastynge, and closidist togidere the sonis of Israel in to the hondis of swerd, in the tyme of her turment, in the tyme of the [verse 6] laste wickidnesse; therfor Y lyue, seith the Lord God, for Y schal ȝyue thee to blood, and blood schal pursue thee; and sithen thou hatidist blood, blood schal pursue thee. [verse 7] And Y schal ȝyue the hil of Seir desolat and forsakun, and Y schal take awei fro it a goere and a comere aȝen; [verse 8] and Y schal fille the hillis therof with the careyns of her slayn men. Men slayn by swerd schulen falle doun in thi litle hillis, and in thi valeys, and in thi [Om. CEFGHIKMNPQRSUX.] strondis. [verse 9] Y schal ȝyue thee in to euer|lastynge wildirnessis, and thi citees schu|len not be enhabitid; and ȝe schulen wite, that Y am the Lord God. [verse 10] For thou seid|ist, Twei folkis and twei londis schulen be myne, and Y schal welde tho bi eri|tage, [verse 11] whanne the Lord was there; ther|for Y lyue, seith the Lord God, for Y schal do bi thi wraththe, and bi thin enuye, which thou didist, hatinge hem, and Y schal be made knowun bi hem, whanne [verse 12] Y schal deme thee; and thou schalt wite, that Y am the Lord. Y herde alle thi

schenschipis, whiche thou spakist of the hillis of Israel, and seidist, The hillis of Israel ben forsakun, and ben ȝouun to vs, for to deuoure. [verse 13] And ȝe han rise on me with ȝoure mouth, and ȝe han deprauyd aȝens me; Y herde ȝoure wordis. [verse 14] The Lord God seith these thingis, While al the lond is glad, Y schal turne thee in to wildernesse. [verse 15] As thou haddist ioie on the eritage of the hous of Israel, for it was distried, so Y schal do to thee; the hil of Seir schal be distried, and al Ydumee; and thei schulen wite, that Y am the Lord.