The Holy Bible, containing the Old and New Testaments, with the Apocryphal books,

CAP. XXIX.

[verse 1] In the tenthe ȝeer, in the tweluethe monethe, in the firste dai of the monethe, the word of the Lord was maad to me, [verse 2] and he seide, Thou, sone of man, sette thi face aȝens Farao, king of Egipt; and thou schalt profesie of hym, and of al Egipt. [verse 3] Speke thou, and thou schalt seie, The Lord God seith these thingis, Lo! Y to thee, thou Farao, kyng of Egipt, thou grete dragoun, that liggist in the myddis of thi floodis, and seist, The flood is myn, and Y made mysilf. [verse 4] And Y schal sette a bridil in thi chekis, and Y schal glue the fischis of thi floodis to thi scalis; and Y schal drawe thee out of the myddis of thi floodis, and alle thi fischis schulen cleue to thi scalis. [verse 5] And Y schal caste thee forth in to desert, and alle the fischis of thi flood; on the face of erthe thou schalt falle doun, thou schalt not be gaderid, nethir schalt be gaderid togidere; to the beestis of erthe, and to the volatilis of the eir Y ȝaf thee to be deuourid. [verse 6] And alle the dwelleris of Egipt schulen knowe, that Y am the Lord. For that that thou were a staf of rehed to the hous of Israel, [verse 7] whanne thei token thee with hond, and thou were brokun, and to-rentist ech

schuldre of hem, and whanne thei rest|iden on thee, thou were maad lesse, and thou hast discoumfortid [loosid, ether discoumfortid CEFGHIKMNPQRSUX.] alle the reynes [verse 8] of hem; therfor the Lord God seith these thingis, Lo! Y schal bringe a swerd on thee, and Y schal sle of thee man and [verse 9] beeste; and the lond of Egipt schal be in to desert, and in to wildirnesse, and thei schulen wite, that Y am the Lord. For that that thou seidist, The flood is [verse 10] myn, and Y made it, therfor lo! Y to thee, and to thi floodis. And Y [Om. S.] schal ȝyue `in to [to thee S.] wildirnesses [wildirnesse A.] the lond of Egipt distried bi swerd, fro the tour of Sienes til to the termes of Ethiopie. [verse 11] The foot of man schal not passe bi it, nether the foot of beeste schal go in it, and it schal not be enha|bitid in fourti ȝeer. [verse 12] And Y schal ȝyue the lond of Egipt forsakun, in the myddis of londis forsakun, and the citees therof in the myddis of a citee distried, and tho schulen be desolat bi fourti ȝeer. And Y schal scatere Egipcians in to naciouns, and Y schal wyndewe hem in to londis. [verse 13] For the Lord God seith these thingis, After the ende of fourti ȝeer Y schal ga|dere togidere Egipt fro puplis, among [verse 14] whiche thei weren scaterid; and Y schal bringe aȝen the caitifte of Egipte. And Y schal sette hem in the lond of Phatures, in the lond of her birthe; and thei schulen [verse 15] be there in to a meke rewme, and among othere rewmes it schal be most low, and it schal no more be reisid ouer naciouns. And Y schal make hem lesse, that thei [verse 16] regne not on hethene men; and thei schu|len no more be to the hous of Israel in trist, techinge wickidnesse, that thei fle, and sue hem; and thei schulen knowe, that Y am the Lord God. [verse 17] And it was don in the seuene and twentithe ȝeer, in the firste monethe, in the firste dai of the monethe, the word of the Lord was maad [verse 18] to me, and he seide, Thou, sone of man, Nabugodonosor, kyng of Babiloyne, made

his oost to serue bi greet seruyce aȝens Tire; ech heed was maad ballid, and ech schuldir was maad bare of heer, and meede was not ȝoldun of Tire to hym, nether to his oost, for the seruyce bi which he seruede to me aȝens it. [verse 19] Therfor the Lord God seith these thingis, Lo! Y schal ȝyue Nabugodonosor, kyng of Babiloyne, in the lond of Egipt, and he schal take the mul|titude therof; and he schal take in preye the clothis therof, and he schal rauysche the spuylis therof, and meede schal be to [verse 20] his oost, and to the werk for which he seruyde to me aȝens it; and Y ȝaf the lond of Egipt to hym, for that that he trauelide to me, seith the Lord God. [verse 21] In that dai an horn of the hous of Israel schal come forth, and Y schal ȝyue to thee an open mouth in the myddis of hem; and thei schulen wite, that Y am the Lord.