The Holy Bible, containing the Old and New Testaments, with the Apocryphal books,

CAP. XIX.

[verse 1] And thou, sone of man, take weiling [verse 2] on [of I.] the princes of Israel; and thou schalt seie, Whi thi modir, a lionesse, lai among liouns? In the myddis of litle liouns sche [verse 3] nurschide hir whelpis, and ledde out oon of hir litle liouns; he was maad a lioun, and he lernyde to take prei, and to ete men. [verse 4] And hethene men herden of hym, and token hym not withouten her woundis; and thei brouȝten hym in chaynes in to [Om. N.] the lond of Egipt. [verse 5] Which modir whanne sche hadde seyn, that sche was sijk, and the abiding of hym perischide, took oon of her litle liouns, and made hym a lioun.

[verse 6] Which ȝede among liouns, and was maad [verse 7] a lioun; and lernede to take prey, and to deuoure men. He lernyde to make widewis, and to brynge the citees of men in to de|sert; and the lond and the fulnesse therof was maad desolat, of the vois of his roryng. [verse 8] And hethene men camen togidere aȝens hym on ech side fro prouynces, and spred|den on hym her net; he was takun in the woundis of tho [thilke I.] hethene men. [verse 9] And thei senten hym in to a [the N.] caue in chaines, and brouȝten hym to the kyng of Babiloyne; and thei senten hym in to prisoun, that his vois were no more herd on the hillis of Israel. [verse 10] Thi modir as a vyner in thi blood was plauntid on watre; the fruitis therof and the boowis therof encreessiden of many watris. [verse 11] And sadde ȝerdis weren maad to it in to septris of lordis, and the stature therof was enhaunsid among boowis; and it siȝ his hiȝnesse in the mul|titude of hise siouns. [verse 12] And it was drawun out in wraththe, and was cast forth in to erthe; and a brennynge wynd dryede the fruyt therof, and the ȝerdis of strengthe therof welewiden, and weren maad drie, and fier [the fier FQU.] eet it. [verse 13] And now it is plauntid ouer in desert, in a lond with out weie, and thristi. [verse 14] And fier ȝede out of the [a CFGHIKMNPQRSUX.] ȝerde of the braunchis therof, that eet the fruyt therof. And a stronge ȝerde, the cep|tre of lordis, was not in it. It is weilyng, and it schal be in to weilyng.