CAP. XV.
[verse 1] And the word of the Lord was maad to [verse 2] me, and he seide, Sone of man, what schal be don to the tre of a vyne, of alle the trees of woodis, that ben among the trees of woodis? [verse 3] Whether tymbre [tree, ether [or EPY] tymbre CEFGHIKMNPQRSUXY.] schal be takun therof, that werk be maad? ether shal a stake be maad therof, that ony vessel hange ther onne? [verse 4] Lo! it is ȝouun in to mete; fier wastide euer eithir part therof, and the myddis therof is dryuun in to deed [a deed A sec. m. IKS sec. m.] sparcle; whether it schal be profitable to werk? [verse 5] Ȝhe, whanne it was hool, it was not couenable to werk; hou myche more whanne fier hath deuourid, and hath brent it, no thing of werk schal be maad therof? [verse 6] Therfor the Lord God seith thes thingis, As the tre of a vyne is among the trees of woodis, which Y ȝaf to fier to deuoure, so Y ȝaf the dwelleris [verse 7] of Jerusalem, and Y schal sette my face aȝens hem. Thei schulen go out of the fier, and fier schal waaste hem; and ȝe schulen wite, that Y am the Lord, whanne Y schal [verse 8] sette my face aȝens hem, and schal ȝyue the lond with out weie and desolat, for thei weren trespassours, seith the Lord God [Om. N.] .