CAP. V.
[verse 1] Jerusalem, vnclothe thee of the stoole of thi mourenyng, and trauelyng; and clothe thou thee in the fairnesse, and onour of it, which is of God to thee in euerlastynge glorie. [verse 2] God of ryȝtfulnesse schal cumpasse thee with a double cloth, and schal sette on thin heed a mytre of euerlastynge onour. [verse 3] For God schal schewe his briȝtnesse in thee, which is vndur heuene. [verse 4] For thi name schal be namyd of God to thee with outen ende, The pees of riȝtfulnesse, and the onour of pitee. [verse 5] Jerusalem, rise vp, and stonde in an hiȝ place, and biholde aboute to the eest; and se thi sones gaderid togidere fro the sunne risynge til to the west in the word of the hooli, that maken ioie in the mynde of God. [verse 6] For thei ȝeden out fro thee, and weren led of enemyes on feet; but the Lord schal brynge to thee hem borun in to honour, as the sones of rewme. [verse 7] For God hath ordeyned to make low ech hiȝ hil, and euerlastynge rochis of stoon, and gret valeis, to fille the uneuenesse of erthe; that Israel go diligentli in to the onour of God. [verse 8] Forsothe wodis [the wodis N pr. m. S.] and ech tree of swetnesse schadewiden Israel, bi the co|maundement of God. [verse 9] For God schal brynge Israel with mirthe in [into U.] the liȝt of his maieste, with merci and riȝtfulnesse, which is of hym.
