The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
[verse 1] Forsothe Safacie, sone of Nathan, and Jedelie, sone of Fassur, and Jothal, sone of Selemye, and Fassour, sone of Melchie, herden the wordis whiche Jeremye spak [verse 2] to al the puple, `and seide [seiynge I.] , The Lord seith these thingis, Who euer dwellith in this
citee, schal die bi swerd, and hungur, and pestilence; but he that flieth to Caldeis, shal lyue, and his soule schal be hool and lyuynge. [verse 3] The Lord seith these thingis, This citee to be bitakun schal be bitakun in to the hond of the oost of the kyng of Babiloyne, and he schal take it. [verse 4] And the princes seiden to the kyng, We preien, that this man be slayn; for of bifore castyng he discoum|fortith the hondis of men werriours, that dwelliden in this citee, and the hondis of al the puple, and [and he I.] spekith to hem bi alle these wordis. For whi this man sekith not pees to this puple, but yuel. [verse 5] And kyng Sedechie seide, Lo! he is in ȝoure hondis, for it is not leueful that the kyng denye ony thing to ȝou. [verse 6] Therfor thei token Je|remye, and castiden hym doun in to the lake of Elchie, sone [the sone I.] of Amalech, which was in the porche of the prisoun; and thei senten doun Jeremye bi cordis in to the lake, wherynne was no watir, but fen; therfor Jeremye ȝede doun in to the filthe. [verse 7] Forsothe Abdemalech Ethiopien, a chast man and oneste, herde, that was in the kyngis hous, that thei hadden sent Jeremye in to the lake; sotheli the king sat in the ȝate of Beniamyn. [verse 8] And Abde|malech ȝede out of the kyngis hous, and [verse 9] spak to the kyng, and seide, My lord the kyng, these men diden yuele alle thingis, what euer thingis thei diden aȝens Jere|mye, the profete, sendynge hym in to the lake, that he die there for hungur; for whi looues ben no more in the citee. [verse 10] Therfor the kyng comaundide to Abde|melech Ethiopien, and seide, Take with thee thretti men fro hennus, and reise thou Jeremye, the profete, fro the lake, bifor that he die. [verse 11] Therfor whanne Abde|melech hadde take men with hym, he entride in to the hous of the kyng, that was vndur the celer; and he took fro thennus elde clothis, and elde ragges, that weren rotun; and he sente tho [hem N.] doun to Jeremye, in to the lake, bi cordis. [verse 12] And
Abdemelech Ethiopien seide to Jeremye, Putte thou elde clothis, and these to-rent and rotun thingis vndur the cubit of thin hondis, and on the cordis. Therfor Jere|mye dide so. [verse 13] And thei drowen out Jere|mye with cordis, and ledden hym out of the lake. Forsothe Jeremye dwellide in the porche of the prisoun. [verse 14] And kyng Sedechie sente, and took hym Jeremye, the profete, at the thridde dore that was in the hous of the Lord. And the kyng seide to Jeremye, Y axe of thee a word; hide thou not ony thing fro me. [verse 15] Forsothe Jeremye seide to Sedechie, If Y telle to thee, whether thou schalt not sle me? And if Y ȝyue councel to thee, thou schalt not here me. [verse 16] Therfor Sedechie the king swoor to Jeremye priueli, and seide, The Lord lyueth, that maad to vs this soule, Y schal not sle thee, and Y schal not bi|take thee in to the hondis of these men, that seken thi lijf. [verse 17] And Jeremye seide to Sedechie, The Lord of oostis, God of Israel, seith these thingis, If thou goest forth, and goest out to the princes of the kyng of Babiloyne, thi soule schal lyue, and this citee schal not be brent with fier, and thou schalt be saaf, thou and thin hous. [verse 18] Forsothe if thou goest not out to the princes of the kyng of Babiloyne, this citee schal be bitakun in to the hondis of Caldeis; and thei schulen brenne it with fier, and thou schalt not ascape fro the hond of hem. [verse 19] And kyng Sedechie seide to Jeremye, Y am angwischid for the Jewis that fledden ouer to Caldeis, lest perauenture Y be bi|takun in to the hondis of hem, and thei scorne me. [verse 20] Forsothe Jeremye answeride, and seide to hym, Thei schulen not bitake thee; Y biseche, here thou the vois of the Lord, which Y schal speke to thee, and it schal be wel to thee, and thi soule schal lyue. [verse 21] That if thou wolt not go out, this is the word [verse 22] which the Lord schewide to me, Lo! alle the wymmen, that weren left in the hous of the kyng of Juda, schulen be led out to the princes of the kyng of Babiloyne; and tho wymmen schulen seie, Thi pesible men
disseyueden thee, and hadden the maistrye aȝens thee; thei drenchiden thee in filthe, and thi feet in slidirnesse, and ȝeden awei fro thee. [verse 23] And alle thi wyues and thi sones schulen be led out to Caldeis, and thou schalt not ascape the hondis of hem; but thou schalt be bitakun in to the hondis of the kyng of Babiloyne, and he schal brenne this citee bi [with I.] fier. [verse 24] Therfore Sede|chie seide to Jeremye, No man wite these wordis, and thou schalt not die. [verse 25] Sotheli if the princes heren, that Y spak with thee, and comen [thei comen I.] to thee, and seien to thee, Schewe thou to vs what thou spak|est with the kyng, hide thou not fro vs, and we schulen not sle thee; and what the [verse 26] kyng spak with thee, thou schalt seie to hem, Knelyngli Y puttide [settide CEFGHIKMNPQRSUVX.] forth my preiris bifore the kyng, that he schulde not co|maunde me to be led aȝen in to the hous of Jonathan, and Y schulde die there. [verse 27] Therfor alle the princes camen to Jere|mye, and axiden hym; and he spak to hem bi alle the wordis whiche the kyng hadde comaundid to hym, and thei ceess|iden fro hym; for whi no thing was herd. [verse 28] Therfor Jeremye dwellide in the porche of the prisoun, til to the dai wherynne [in whiche I.] Jerusalem was takun; and it was don, that Jerusalem schulde be takun.