The Holy Bible, containing the Old and New Testaments, with the Apocryphal books,

CAP. XLVII.

[verse 1] Thou virgyn, the douȝtir Babiloyne, go doun, sitte thou in dust, sitte thou in erthe; a kyngis seete is not to the douȝter of Caldeis, for thou schalt no more be

clepid soft and tendir. [verse 2] Take thou a queerne stoon, and grynde thou mele; make thou nakid thi filthe, diskeuere the schuldur, schewe the hippis, passe thou floodis. [verse 3] Thi schame schal be schewid, and thi schenschipe schal be seen; Y schal take veniaunce, and no man schal aȝenstonde me. [verse 4] Oure aȝen biere, the Lord of oostis is his name, the hooli of Israel. [verse 5] Douȝter of Caldeis, sitte thou, be thou stille, and entre in to derknessis, for thou schalt no more be clepid the ladi of rewmes. [verse 6] I was wrooth on my puple, Y defoulid myn eritage, and Y ȝaf hem in thin hond, and thou settidist not mercies to hem; thou madist greuouse the ȝok [verse 7] greetli on an eld man, and thou seidist, With outen ende Y schal be ladi; thou puttidist not these thingis on thin herte, nether thou bithouȝtist on thi laste thing. [verse 8] And now, thou delicat, and dwellynge tristili, here these thingis, which seist in thin herte, Y am, and outakun me ther is no more; Y schal not sitte widewe, and Y schal not knowe bareynesse. [verse 9] These twei thingis, bareynesse and widewhod schulen come to thee sudenli in o dai; alle thingis camen on thee for the multitude of thi witchecraftis, and for the greet hardnesse of thin enchauntours, ether tre|getours [treytours S.] . [verse 10] And thou haddist trist in thi malice, and seidist, Noon is that seeth me; this thi wisdom and thi kunnyng disseyuede thee; and thou seidist in thin [verse 11] herte, Y am, and outakun me ther is noon other. Yuel schal come on thee, and thou schalt not knowe the bigynning therof; and wrecchidnesse [wickidnesse A pr. m. myschef A sec. m. marg. I.] schal falle on thee, which thou schalt not mowe clense; wretchidnesse which thou knowist not, schal come on thee sudenly. [verse 12] Stonde thou with thin enchauntours, and with the multitude of thi witchis, in whiche thou trauelidist fro thi ȝongthe; if in hap thei profiten ony thing to thee, ether if thou

maist be maad the strongere. [verse 13] Thou fail|idist in the multitude of thi councels; the false dyuynours of heuene stonde, and saue thee, whiche bihelden staris, and noumbriden monethis, that thei schulden telle bi tho [hem N.] thingis to comynge to thee. [verse 14] Lo! thei ben maad as stobil, the fier hath brent hem; thei schulen not delyuere her lijf fro the power of flawme; colis ben not, bi whiche thei schulen be warmed, nether fier, that thei sitte at it. [verse 15] So tho thingis ben maad to thee in whiche euere thou trauelidist; thi marchauntis fro thi ȝongthe erriden, ech man in his weie; noon is, that schal saue thee.