[Prologue on the book of Psalms [This prologue is from M.] .]
THIS book Sauter is clepid, that is to seie, the book of songis of Dauith, and of Asaph, the chauntour of the temple of the Lord; wherynne is conteyned profesie of the comynge of Crist, of his birthe, and of his power and teching; of his passioun and his rising aȝen fro deeth, and of his ascencioun and of his comynge aȝen in the laste doom; whiche songis ben red in holi cherche in to wurschiping and preising of the Lord, knoulechinge his heiȝ maieste, and hise grete werkis; and that he do merci to vs, whanne we trespasen aȝens him, brekinge hise comaundementis, that we perische not for oure synnes.