[Prologue on the Second book of Esdras [This prologue is from M.] .]
IN this secounde book of Esdre is contened the actis of Neemye, duyk and gouernour of the peple of Juda, which made aȝen the wallis and ȝatis of Jerusalem, and the hous of the Lord, and heeld smal houshold, and oppresside not the peple, but dredde God, and kepte hise comaundementis, in so myche that he suffride not the peple to bringe yn burthuns in to the cite, neither ledinge out, in the dai of sabat; therfor he wrouȝte alle thingis with prosperite, and God was with him.