þe giwes þat weren dede alle
A non riȝht he gan heom calle,
And seide: cometh hider to me!
Line 605
ȝware habbe ȝe ȝare i beo?
Alle huy a risen and to him come,
And Jhc þo heom ladde sone
Bi fore is Moder þare heo stod,
And heo was glad in hire mod.
Line 610
Of þe giwes þe grete ferrede
Wondreden of þat childes dede.
Here eode Jhc and bar a picher and mo oþur children with him to þe welle, so þat ane childes picher to brac, and forto a legge strif Jhc it made aȝen.
To one welle fair and cler,
þat was neiȝh a riuer,
Jhc eode for to fechche watur,
Line 615
And giwene children feole to gadere
Him siweden to þat welle streme
For to fechchen watur clene.
Jhc bi fore gan to þruste
For to habbe watur furste.
Line 620
Ake on and oþur þare aȝen spac,
And in þat þrust a picher brac,
þat Jhc hauede þudere i brouȝt,
þe giwes it breken with wicke þouȝt.
Jhc, a luyte made him wrothþ,
Line 625
To maken strif him was lothþ;
þe peces þat leiȝen on þe grounde
To gadere he brouȝhte in luyte stounde,
And seide: lo here þis picher þat ȝe breke
Is hol and sound; with oute hete
Line 630
Beothþ guode felawes with oute striue,
And alle wrathþes beon fur ȝiue!
Guode freond heo weren a non
Jhesus and þis children ech on.
