Þatt all þatt strenedd iss off Godd,
Off Godess aȝhenn kinde,
All iss itt all þatt illke whatt
Þatt Godd iss inn himm sellfenn.
Þiss wass i frummþe wiþþ soþ Godd
Line 18555
Biforenn alle shaffte;
Þiss Word wass wiþþ þe Faderr aȝȝ;
Þe Faderr iss þatt frummþe
Þatt Godess Sune, Godess word,
Wass wiþþ, wiþþutenn frummþe.
Line 18560
Þe Faderr sellf iss frummþe, acc He
Niss off nan oþerr frummþe,
Forr Godd wass æfre swa þatt He
Ne toc nan biginninnge,
Acc all þe werelld toc att Himm
Line 18565
Biginninng þanne het¯¯ wrohhte.
Þe Sune iss frummþe off frummþe, off Godd,
Off whamm þe Sune iss strenedd.
Þe Sune iss off þe Faderr wiss,
Acc þohh all efennmete
Line 18570
& efennmahhtiȝ Godd wiþþ himm,
& all off efenn elde;
Forr eȝȝþerr iss wiþþutenn ord,
& æfre all unnbigunnenn
Forrþ wiþþ þatt an Allmahhtiȝ Gast,
Line 18575
Þatt cumeþþ off hemm baþe.
Onnȝæn þatt laþe læredd follc
Þatt spækenn wrang off Criste,
