Þatt iss þe dom, þatt lihht & lem
Iss cumenn upponn erþe,
Line 16735
& menn ne lufenn nohht te lihht
Acc lufenn þessterrnesse,
Forrþi þatt teȝȝre dede iss all
Unngod & all unnclene.
Forr wha si¯¯tt iss þatt ifell doþ,
Line 16740
He shuneþþ lihht & leme,
& fleþ to cumenn to þe lihht,
Þatt he ne wurrþe tæledd
Þurrh þa þatt sen hiss fule lasst
& hiss unnclene dede.
Line 16745
& wha se follȝheþþ soþ & rihht
Inn alle gode dedess,
He cumeþþ gladdliȝ to þe lihht
To shæwenn þatt hiss dede
Iss all i Godd, & all þurrh Godd
Line 16750
& þurrh hiss hellpe forþedd.
Her endenn twa Goddspelless þuss,
& uss birrþ hemm þurrhsekenn,
To lokenn whatt teȝȝ lærenn uss
Off ure sawle nede.
Line 16755
Þiss Nicodem þatt onn anahht
Wass cumenn till þe Laferrd,
Att himm to lernenn stilleliȝ
Summwhatt off haliȝ lare,
He wass off þa þatt turrndenn hemm
Line 16760
To lefenn uppo Criste
