Þiss tákenn wrohhte Jesu Crist
Þe firrste off hise tacness,
I Galile rihht i þatt tun
Line 14070
Þatt wass Cana ȝehatenn;
& tuss he toc to shæwenn þær
Hiss Goddcunndnessess mahhte,
& hise Lerninngcnihhtess þær
Tókenn onn himm to lefenn,
Line 14075
Þurrh þatt teȝȝ sæȝhenn þære inn himm
Allmahhtiȝ Godess mahhte.
Her endeþþ nu þiss Goddspell þuss,
& uss birrþ itt þurrhsekenn,
To lokenn whatt itt læreþþ uss
Line 14080
Off ure sawle nede.
Crist comm till þatt bridale himm sellf
Wiþþ hise Lerninngcnihhtess;
Acc he ne comm nohht to þatt hus,
Ne nan off hise feress,
Line 14085
Forr þatt he wollde sittenn þær,
To drinnkenn þære o bennche;
Acc ure Laferrd Crist comm þær
To shæwenn þær hiss mahhte,
Forr þatt teȝȝ sholldenn þess te bett
Line 14090
Hemm turrnenn till hiss lare,
& trowwenn þatt he wass soþ Godd
Þatt cumenn wass to manne,
& turrnenn till þe Crisstenndom
& till þe rihhte læfe,
Line 14095
