To rixlenn i Judealand
Affterr hiss faderr ende;
& he ne durrste nohht forrþi
Inntill þatt ende liþenn.
& himm wass seȝȝd o slæpe þa
Line 8375
Onn hiss Drihhtiness hallfe,
Þatt he þa shollde wiþþ þe child
& wiþþ þe childess moderr
Inntill þe land off Galileo
Flittenn, & tær bilefenn.
Line 8380
& he for þiderr sone anan
& comm þær till an chesstre
Þatt wass ȝehatenn Nazaræþ,
& tær bilæf he þanne,
To fillenn þatt tatt cwiddedd wass
Line 8385
Forrlannge þurrh prophete,
Þatt Godess Sune shollde beon
Bitwenenn menn onn eorþe
Nemmnedd te Nazarisshe mann,
Off Nazaræþess chesstre.
Line 8390
Her endeþþ nu þiss Goddspell þuss
& uss birrþ itt þurrhsekenn,
To lokenn whatt itt læreþþ uss
Off ure sawle nede.
Rihht o þatt ȝer wass Crist full neh
Line 8395
Off ehhte ȝeress elde
Þatt he comm off Egippte land
Till Nazaræþess chesstre;
