& all itt wass bigunnenn þær
Þurrh hirdess, & þurrh kingess;
Line 6835
& tatt wass don þurrh Jesu Crist,
Forr þatt itt shollde tacnenn
Þatt ure Laferrd Jesu Crist
Iss baþe King, & Hirde;
Forr Crist iss King, þatt steoreþþ uss,
Line 6840
& Hirde, þatt uss fedeþþ;
& ȝiff þatt tu þurrh Crisstenndom
& þurrh þe rihhte læfe
Willt follȝhenn ure Laferrd Crist,
Þe birrþ beon king, & hirde;
Line 6845
Þe birrþ beon king, þatt witt tu wel,
To steorenn rihht te sellfenn,
& ec to steorenn alle þa
Þatt arrn i þine walde,
Þatt teȝȝ ne draȝhe nohht hemm onn
Line 6850
To follȝhenn ille þæwess;
& ec þe birrþ beon hirdemann
To fedenn hemm & fosstrenn.
Þatt ta þreo kingess comenn forrþ
All wiþþ þe rihhte weȝȝe
Line 6855
Anan inntill Judealand,
Þatt newe king to sekenn,
Þatt wass forr þatt teȝȝ haffdenn herrd
Þurrh Balaamess lare
Þatt Godess Sune, Jesu Crist,
Line 6860
Þær shollde borenn wurrþenn.
