Þatt mann iss wiss þe deofless þeoww
Þurrh niþ & modiȝnesse;
& tu beo meoc, swa summ þe birrþ,
Onnȝæn hiss modiȝnesse,
& forr þe lufe off þin Drihhtin
Line 6270
Forrȝife himm wraþþe & laþþe,
& all forrwerrp þu towarrd himm
To sekenn affterr wræche;
Forr þu mihht cwemenn swa þin Godd
& oferrcumenn deofell,
Line 6275
Ȝiff þatt tu shæwesst soþ meocleȝȝc
Onnȝæness modiȝnesse,
& ȝiff þu nillt nohht hatenn himm
Þatt hateþþ þe wiþþ herrte.
Þuss mihht tu ledenn her þatt lif
Line 6280
Rihht wel, wiþþ Godess hellpe,
Þatt follȝheþþ all þatt hallȝhe swinnc
Þatt iss wiþþ Godess lefe;
& itt iss,— alls icc seȝȝde ȝuw,
An off þa tweȝȝenn lifess
Line 6285
Þatt wærenn þurrh þe sexte staff
Off Cristess name tacnedd,
Þurrh þatt tatt staff bitacneþþ uss
Þe tale off tweȝȝenn hunndredd.
Þatt oþerr lif, þatt tacnedd wass
Line 6290
Þurrh tale off tweȝȝenn hunndredd,
Iss fundenn binnenn muneclif
I þa þatt sinndenn gode.
